နိုက်ကလပ်မှ မြတ်ဗုဒ္ဓ

အပိုင်း(၁)
http://ashinayethaka.com/index.php?option=com_content&view=article&id=133:2010-12-28-00-20-44&catid=35:2010-11-13-06-53-37&Itemid=66

အပိုင်း(၂)

http://ashinayethaka.com/index.php?option=com_content&view=article&id=134:2010-12-28-20-20-03&catid=35:2010-11-13-06-53-37&Itemid=66

စိတ်ဝင်စားစရာကောင်းသလို ဗဟုသုတ အတုယုဖွယ်ကောင်းသောကြောင့် မျှဝေတင်ပေးလိုက်ခြင်း ဖြစ်ပေသည်။ တကယ့်ကို ဘာသာရေးအတွက် အရေးပါသော အကြောင်းအရာများ ဖြစ်ပေသည်။

လူ့လောက၏ ချမ်းသာသုခ(၄)မျိုး

လောကရှိ လူသားတို့သည် ချမ်းသာတယ်။ ဆင်းရဲတယ်စသည်ဖြင့် အမျိုးမျိုးပြောနေကြသော်လည်း တကယ့်အစစ်အမှန်ချမ်းသာသည် (၄)မျိုးပင် ရှိပေသည်။ ၎င်းတို့မှာ

၁။ သူတစ်ပါး နှစ်သက်တပ်မက်လောက်၍ လုယက်ခိုးယူနိုင်သော ပစ္စည်းဥစ္စာများ မရှိသူသည် သူ့မှာ သိမ်းဆည်းသိုးမှီစရာမလိုသောကြောင့် စိတ်ပူပန်ပူမရှိ၊ သွားချင်ရာသွားနိုင်ပြီး နောက်ကိုလှည့်ကြည့် တွေးတောပူပန်စရာမလိုဘဲ စိတ်လွတ်လပ် ပေါ့ပါးသော ချမ်းသာသုခ။

၂။ မိမိမှာ ပစ္စည်းဥစ္စာပြည့်စုံ၍ လှူချင်တိုင်းလှူ၊ ပေးကမ်းချင်တိုင်း ပေးကမ်းနိုင်ကာ သုံးချင်သလိုသုံးနိုင်သော ချမ်းသာသုခ။

၃။ သူတစ်ပါးကို ပေးကမ်းနိုင်အောင်လည်း မချမ်းသာ၊ သူတစ်ပါးထံမှ အကြွေး ယူလောက်အောင်လည်း မဆင်းရဲဘဲ အလယ်အလတ် သင့်တင့်လျောက်ပတ်စွာ နေနိုင်စားနိုင်၍ အကြွေးမတင် အကြွေးတောင်းခံရခြင်းမှ ကင်းဝေးသော ချမ်းသာသုခ။

၎။ မကောင်းမှုလုပ်ပြီးမှ စားရေးဝတ်ရေး နေရေးထိုင်ရေး အဆင်ပြေမှာမဟုတ်၊ လူ့ဘ၀လေးရရှိချိန်မှာ မကောင်းမှုလုပ်မှ အသက်ရှင် နေထိုင်ရမည်ဆိုတာ လက်မခံဘဲ အသက်ရှည်နေတဲ့ လူ့ဘ၀လေးကို မကောင်းမှုမလုပ်ဘဲ ကောင်းမှုများသာလုပ်ပြီး အသက်ရှင်ဟု ဆုံးဖြတ်ကာ မကောင်းမှုမှရှောင်ကြဉ်သော ချမ်းသာသုခ။

လူသားတိုင်းတွင် အထက်ဖော်ပြပါ ချမ်းသာ(၄)မျိုးအနက် တစ်မျိုးမျိုးသော် လည်းကောင်း နှစ်မျိုးသော်လည်းကောင်း ချမ်းသာသုခနဲ့ ပြည့်စုံနေသော ပုဂ္ဂိုလ်များချည်း ဖြစ်ပေလိမ့်မည်။ သို့ဖြစ်၍ မိမိမှာ ချမ်းသာသုခ ရှိတယ်ဆိုတာ မမေ့သင့်ပါ။

သို့ရာတွင် တကယ်ရခဲလှတဲ့ လူ့ဘ၀လေးရရှိနေချိန် သိနိုင်ခဲတဲ့ အသိဉာဏ်ဗဟုသုတများ ရှိနေတဲ့လူ့ဘ၀လေး တခဏတာ ရှင်သန်နေချိန်တွင် အထက်ပါချမ်းသာ(၄)မျိုးမှ နံပါတ်(၄)အချက်ကို အဓိကထား၍ ပြည့်စုံအောင် လိုက်နာ ကျင့်သုံးရန် အထူးလိုအပ်ပါလိမ့်မည်။

တကယ်တော့ လူ့ဘ၀ဆိုတာ ခဏလေးပါ။ ဒီခဏတာ ရနိုင်ခဲတဲ့ ဘ၀လေးမှာ မိမိအတွက်ပါမည့် ကောင်းမှုများမလုပ်ဘဲ မကောင်းမှုများလုပ်ပြီး ကုန်ဆုံးသွားမည်ဆိုလျှင် လူသားတို့ကိုလည်း အကျိုးမပြု မိမိကိုယ်ကိုလည်း အကျိုးမရှိ၍ အလဟဿ ဆန်ကုန်မြေလေးသော လူသားတစ်ဦးဖြစ်ကာ လူ့ဘ၀၏တန်ဖိုး နှမြောစရာ ဘယ်လောက်များ ကောင်းလိမ့်မည်နည်း။

နောင်တဆိုတာ နောင်မှရတတ်၍ နောင်တလို့ခေါ်ဆိုသော်လည်း သတိမရှိ တရားမရှိ ဉာဏ်ပညာနည်းပါးသူတို့ကြောင့် ဖြစ်ပေါ်လာသော စကားလုံးဟု သတ်မှတ်ကာ ငါသည် လူ့ဘ၀၏တန်ဖိုးကို ဒု၊ သ၊ န၊ သော သူဌေးသားလေးယောက်ကဲ့သို့ နောက်ဘ၀ မကောင်းကျိုးခံစားရမှ နောင်တမရအောင် ယခု ရနေတဲ့လူ့ဘ၀လေးကို အကျိုးရှိအောင် အသုံးချမည့်ဟု စိတ်ဆန္ဒများ ဆုံးဖြတ်ကာ ပြုလုပ်လိုက်နာကျင့်သုံးကြပါစေလို့ ဆန္ဒပြုလိုက်ရပေသည်။

သီရိလင်္ကာနိုင်ငံနှင့်ရဟန်းခံ

သီရိလင်္ကာနိုင်ငံသည် ဘုရားရှင်ပွင့်တော်မူသည့် အိန္ဒိယနိုင်ငံမှတဆင့် သာသနာထွန်းကားခဲ့သော နိုင်ငံဖြစ်ပေသည်။ ဤနိုင်ငံ၌ ရဟန်းသံဃာများအတွက် အရေးကြီးလှသော ရဟန်းခံရန်သိမ်ဝင်ရသည့် ကေလနိယီအမည်ရှိသောသိမ်သည် ယခုထက်တိုင်း ရှိနေပေသည်။

မြတ်စွာဘုရားပရိနိဗ္ဗာန်စံလွန်တော်မူပြီး (၃)ရာစုမှာ အိန္ဒိယနိုင်ငံ၌ တတိယသင်္ဂါယနာတင်ပြီးနောက် ကိုးတိုင်းကိုးဌာနသို့ အသောကမင်ကြီး၏ အကူအညီဖြင့် ရှင်မောဂ္ဂလိပုတ္တတိဿမထေရ်သည် သာသနာပြန့်ပွားရန် သာသနာပြုစေလွှတ်ခဲ့ရာ သီရိလင်္ကာနိုင်ငံ၊ မြန်မာနိုင်ငံစသောနိုင်ငံတို့သည် သာသနာထွန်းကားခဲ့ပေသည်။ သီရိလင်္ကာနိုင်ငံသည် သာသနာထွန်းကားခဲ့သောကြောင့် ယနေ့ထက်တိုင်း ရဟန္တာသီတင်းသုံးခဲ့သော နေရာဌာနများ၊ ဘုရားရှင်ကြွရောက်ခဲ့သော နေရာဌာနများ ရှိနေပေသည်။ သီရိလင်္ကာနိုင်ငံ သာသနာထွန်းကားချိန်တွင် ရဟန္တာများ၏ ဈာန်ပျံသွားလာမှုကြောင့် စပါးများနေလှန်ရာတွင် စပါးမခြောက်နိုင်အောင် ရဟန္တာများ၏အရိပ်က လွှမ်းမိုးထားသည်ဟု ကျမ်းဂန်များ၌ မှတ်တမ်းတင်ခံခဲ့ရပေသည်။

မြန်မာနိုင်ငံ ပဲခူးမြို့၌ရှိသော ကလျာဏီသိမ်ဆိုသည်မှာ မြန်မာနိုင်ငံမှ ရဟန်းတော်များ သီရိလင်္ကာနိုင်ငံရောက်ရှိချိန်ဝယ် သီရိလင်္ကာနိုင်ငံ၌ရှိသော ကေလနိယမြစ်ကို သိမ်သမုတ်ကာ မြန်မာရဟန်းတော်များကို ရဟန်းခံပေးခဲ့၍ ထိုမြန်မာရဟန်းတော်များ မြန်မာပြည်သို့ရောက်ရှိချိန် (၁၅)ရာစုခေတ်တွင် ထိုရဟန်းများမှ တဆင့် သိမ်သမုတ်ပေးခဲ့ခြင်းကြောင့် ကလျာဏီသိမ်ဟု နာမည်ပေးခဲ့ခြင်းဖြစ်ပေသည်။

သီရိလင်္ကာနိုင်ငံ၌ ရဟန္တာများ သိမ်သမုတ်ပေးခဲ့သော သိမ်များစွာအနက် ကေလနိယမြစ်အနီးရှိ ကေလနိယသိမ်သည် ယခုနေ့ထက်တိုင်း ထင်ရှားစွာရှိနေပေသည်။ ထိုသိမ်ရှိရာကျောင်းတော်၌ မဟာဗောဓိပင်လည်း ရှိနေခြင်းကြောင့် ညနေချိန်အတွင်း သီရိလင်္ကာပြည်သူများသည် ဆီးမီးပန်းနံ့သာများဖြင့် နေ့စဉ်ဝတ်ပြုကြပေသည်။

ထိုကဲ့သို့ သာသနာနဲ့ပတ်သတ်သည့် ထူးခြားသောဌာနများရှိရာ သီရိလင်္ကာနိုင်ငံသို့ အမေရိကန်နိုင်ငံ၊ ဖရီးမောင့်မြို့၌ နေထိုင်ကြသော မြန်မာဒါယိကာမများ ဘုရားဖူးရောက်ရှိလာချိန်တွင် ယခုကဲ့သို့ ထူးခြားလှသည့် ရဟန္တာများသိမ်သမုတ်ခဲ့သည် ကေလနိယသိမ်ကို မြင်တွေ့ကြားသိရသောအခါ သူတို့၏သန္တာန်၌ ရခဲလှစွာသော သာသနာ့ဒါယကာ၊ ရဟန်းအမဆိုသည့်ဘွဲ့ကို ထူးခြားသည့်သိမ်တွင် ပြုလုပ်ပေးချင်သော ဆန္ဒများ ဖြစ်ပေါ်ခဲ့ပေသည်။

ထို့ကြောင့် ကေလနိယသိမ်ရှိရာ ကျောင်းတော်သို့သွားရောက်ပြီး သီရိလင်္ကာနိုင်ငံ၌ ပညာသင်ကြားနေသော ဦးစက္ကပါလနှင့်ဦးဝေပုလ္လ ရဟန်းနှစ်ပါးအား အမေရိကန်နိုင်ငံမှ ဘုရားဖူးလာရောက်သူ ခြောက်ဦးထဲမှ ဒေါ်ညွှန့်ညွှန့်ကြည်၊ ဒေါ်မြမြဦး၊ ဒေါ်သင်းသင်းဦးတို့ သုံးဦးမှ ကံထပ်ခြင်းမင်္ဂလာကို ပြုလုပ်ပေးခဲ့ကြပေသည်။ ကံထပ်ခြင်းမင်္ဂလာပြုလုပ်သောအခါ စာရေးသူတို့ သူငယ်ချင်းများနှင့် သိမ်ရှိရာကျောင်းတော်မှ ကုလားဘုန်းကြီးတစ်ပါး စုစုပေါင်း(၁၄)ပါးဖြင့် ကံထပ်ခြင်းမင်္ဂလာကို ထူးခြားသည့် ကေလနိယသိမ်၌ ဖြစ်နိုင်ခဲ့သည့် သီရိလင်္ကာနိုင်ငံသို့ ရောက်ရှိချိန်တွင် ပြုလုပ်ပေးခဲ့ကြပေသည်။

မြတ်ဗုဒ္ဓကလည်း သာသနာ့အမွေခံ ရဟန်းဒါယကာ ဒါယိကာမဆိုသည့် အမည်သည် ဒါနကောင်းမှုများ မည်မျှပင်ပြုလုပ်စေကာမှု ရဟန်းဒါယကာ ဒါယိကာမ ပြုလုပ်ခြင်းလောက် မမြတ်ပါဟု မိန့်ခဲ့ပေသည်။ အသောကမင်းကြီးသည် ရေတွင်းပေါင်း ရှစ်သောင်းလေးထောင်၊ ကျောင်းပေါင်းရှစ်သောင်းလေးထောင်၊ ဇရပ်ပေါင်းရှစ်သောင်း လေးထောင်၊ ရေကန်ပေါင်းရှစ်သောင်းလေးထောင် လှူခဲ့သော်လည်း ရဟန်းခံပေးခြင်းဆိုတဲ့ ရဟန်းဒါယကာဘွဲ့လောက် မမြတ်သေးသည့်အတွက် သူ့၏သားကို ရဟန်းခံပေးခြင်း မင်္ဂလာပြုလုပ်ပေခဲ့သည်။

ရဟန်းခံပေးခြင်း၊ ကံထပ်ပေးခြင်းဆိုသည့် ရဟန်းဒါယကာ ဒါယိကာမဘွဲ့အမည်ကို ရဖို့ရန်အတွက် မြတ်ဗုဒ္ဓက မိမိမှဖြစ်သောသားကိုလည်းကောင်း သူတစ်ပါးကိုလည်ကောင်း ပြုလုပ်ပေးရန် တိုက်တွန်းခဲ့ပေသည်။

ထိုကဲ့သို့ ရခဲလှသည့်ရဟန်းဒါယကာ ဒါယိကာမဘွဲ့အပြင် ကြုံရခဲသည့် သီရိလင်္ကာနိုင်ငံသို့ရောက်ရှိချိန် ကေလနိယသိမ်၌ ကံထပ်ပေးခြင်းကို အမေရိကန်နိုင်ငံ၊ ဖရီးမောင့်မြို့၌ နေထိုင်ကြသော ဒါယိကာများ ပြုလုပ်နိုင်ခြင်းကို စာရေးသူမှ မှတ်တမ်းတင်ကာ ဗုဒ္ဓဘာသာဝင်များအတွက် ဗဟုသုတအဖြစ် တင်ပြပေးလိုက်ခြင်း ဖြစ်ပေသည်။

ဆန်နီနေမင်း အမေးအဖြေ

ဘုန်းဘုန်းဘုရား တပည့်တော်က ယူအေအီးမှာ အလုပ်လုပ်နေတာပါဘုရား။ တပည့်တော်သိချင်တာလေးရှိလို့ပါ။ တပည့်တော်ကို ဒီက ဘာသာခြားတယောက်က မေးပါတယ်။ ထေရ၀ါရနှင့်မဟာယာန ဘာကွာခြားလဲ။ အဲဒီကနေပြီးတော့သူက ဆက်မေးပါတယ်။ ဘာလို့ဘုန်းကြီးတွေဟာ ဆွမ်းခံစားရတာလဲတဲ့ တပည့်တော် တတ်သလောက်တော့ ရှင်းပြပါတယ်သိပ်လဲမရှင်းပြရဲဘူး မှားရင်ကိုယ့်ဘာသာကို တလွဲထင်မှာဆိုးလို့ပါ။ အဲဒါကြောင့် ဘယ်လိုရှင်းပြရင် အတိုဆုံးနဲ့အထိရောက်ဆုံး ဖြစ်မလဲဆိုတာ တပည့်တော်ကို ကူညီပါဦးဘုရား။

ထေရ၀ါဒဗုဒ္ဓဘာသာဆိုသည်မှာ မြတ်စွာဘုရားရှင် ပရိနိဗ္ဗာန်ပြုပြီးနောက် (၃)လအကြာမှာ ဘုရားရှင်ဟောခဲ့တဲ့ တရားတွေတော်ကို အရှင်အာနန္ဒာအစရှိတဲ့ ရဟန္တာ(၅၀၀)က စုစည်းကာ စုပေါင်းရွတ်ဆိုခဲ့ကြပါတယ်။


နောက်ပိုင်း နှစ်(၁၀၀)ကြာလာတဲ့အခါ အချို့ရဟန်းတော်တွေက မြတ်ဗုဒ္ဓရဲ့ တရားတွေထဲမှ အနည်းငယ်သော အချက်အလက်တွေကို ပြင်ဆင်ကျင့်သုံးကြပါတယ်။ အဲဒီလိုဖြစ်လာတဲ့အခါ အရှင်ယသအပါအ၀င် ရဟန္တာ(၇၀၀)ကနေ ဒုတိယအကြိမ် စုပေါင်းရွတ်ဆိုကြပါတယ်။ အဲဒါလို ဒုတိယအကြိမ် ရဟန္တာတွေ စုပေါင်းရွတ်ပေါင်း ရွတ်ဆိုတဲ့အခါမှာ မြတ်စွာဘုရားဟောခဲ့တဲ့တရားတွေကို ပြင်ချင်တဲ့ ပုထုဇဉ်ရဟန်းတွေ အချို့ဟာ သူတို့ဘာသာ သီးသန့်စုပေါင်းရွတ်ဆိုပွဲ ပြုလုပ်ကြပါတယ်။

အဲဒီအချိန်ကနေစပြီး ရဟန္တာတွေ စုပေါင်းရွတ်ဆိုတာကို လက်မခံ သူတို့ပြင်ချင်တာပြင်ချင်တဲ့ ပုထုဇဉ်ရဟန်းတွေဟာ သူတို့ဘာသာ စုပေါင်းရွတ်ဆိုပွဲလုပ်ပြီး စတင်၍ ကွဲခဲ့ကြပါတယ်။ ရဟန္တာတွေ စဉ်ဆက်မပြတ် ထိန်းသိမ်းရွတ်ဆိုခဲ့တာကို ယနေ့ချိန်ထိ လက်ခံကျင့်သုံးတဲ့ဘာသာကို ထေရ၀ါဒဗုဒ္ဓဘာသာလို့ခေါ်ပြီး မြတ်စွာဘုရား ဟောခဲ့တဲ့ တရားတွေထဲမှ ပုထုဇဉ်ရဟန်းတွေ ပြင်ချင်တာပြင် ထည့်ချင်တာထည့်ပြီး ကျင့်သုံးတဲ့ဘာသာကို မဟာယာနဗုဒ္ဓဘာသာဆိုပြီး ကွဲပြားသွားပါတယ်။

ရဟန်းတော်တွေ အဘယ့်ကြောင့် ဆွမ်းခံစားရသလဲဆိုတော့ ရဟန်းတွေဟာ သံသရာမှလွတ်ကြောင်း ကိလေသာတွေကို ပယ်သတ်နိုင်အောင် အကျင့်တွေကို ကျင့်နေတဲ့အတွက် ကိုယ်တိုင်လည်း စီးပွားမရှာရ၊ ကိုယ်တိုင်လည်း ချက်ပြုတ်မစားရပါ။ ကိုယ်တိုင်ရှာဖွေခြင်း၊ ကိုယ်တိုင်ချက်ပြုတ်ခြင်းများ လုပ်နေရလျှင် အချိန်ကုန်၍ တရားအားထုတ်ချိန် နည်းသွားသလို အဓိကကျတဲ့ ကိလေသာတွေ နည်းပါးအောင် လုပ်နေတဲ့အတွက် ကိုယ်တိုင်ရှာဖွေလျှင် ရလာတဲ့စည်းစိမ်းကို စုထားချင်တဲ့ လောဘစိတ်တွေဖြစ်မယ်။ ကိုယ်တိုင်ချက်စားလျှင် မနက်ညစာ နောက်တစ်နေ့စာစသည့် လောဘမသတ်နိုင်သည့် ကိလေသာတွေ ဖြစ်နေမယ်။ ဒါ့ကြောင့် ရဟန်းတွေဟာ ဆွမ်းခံ၍ရလာတဲ့ စားစရာများကို ညစာနောက်တစ်ရက်စာဟူ၍ မထားရပါ။

နောက်ပြီး ယခုလို အကျင့်မြတ်အကျင့်ကောင်းတွေကို ကျင့်သုံးနေတဲ့ပုဂ္ဂိုလ်၊ ကျင့်သုံး၍ တရားထူးများရနေတဲ့ပုဂ္ဂိုလ်တွေကို လှူဒါန်းပေးကမ်းလျှင် အလွန်တရာ အကျိုးကြီးမားတာကြောင့် သူတို့လို မလုပ်နိုင်တဲ့ပုဂ္ဂိုလ်တွေ ကောင်းကျိုးများ တစ်ဖက်တလှမ်းကရအောင်ဆိုပြီး အကျင့်မြတ်တွေကျင့်နေတဲ့ ရဟန်းတွေဟာ မိမိအလုပ် မပိုအောင်လည်ကောင်း၊ ကိုယ်တိုင်ရှာဖွေစားသောက်လျှင် နေ့စာညစာစသည့်ကိလေသာ စိတ်များ ဖြစ်နေမည်ဆိုးသောကြောင့်လည်းကောင်း၊ သူတို့လို မကျင့်နိုင်သည့် ဒါယကာ ဒါယိကာများကို အကျိုးထူးများ ရစေချင်သောကြောင့်လည်းကောင်း၊ ကိုယ်လက်လှုပ်ရှားမှု ကျန်းမာရေးကောင်းအောင်လည်းကောင်းစသည့် အချက်အလက်များကြောင့် ရှေးရှေးကမ္ဘာပေါင်း မြောက်များစွာက ပွင်ခဲ့သည့် ဘုရားများနှင့်ရဟန်းတော်များ၊ ယခု ပွင့်တော်မူခဲ့သည့် ဂေါတမမြတ်စွာဘုရားနှင့်ရဟန်းတော်များသည် ဆွမ်းခံ၍ စားရခြင်း ဖြစ်ပေသည်။

ဒီလောက်ဆို ရှင်းမည်ထင်ပါသည်။ မရှင်းပါက ဆက်လက်မေးမြန်းပါလေ။

အသုံးကျမဲ့ ဆော့ဝဲလေးပါ။

http://www.kzarboworld.com/profiles/blogs/5098850:BlogPost:14088

ဆန်နီနေမင်း အမေးအဖြေ သေခြင်းလေးမျိုးအဓိပ္ပါယ်

အရှင်ဘုရား တပည့်တော်အား သေခြင်း(၄)မျိုးကို ရှင်းပြပေးတော်မူပါဘုရား။ နောက်ဆုံးကတော့ မိမိကိုယ်ကိုသတ်သေရခြင်းသည်အများပြောနေကြတဲ့ ဝဋ္ဋ်ကြွေးရှိလို့ ခံရတာ အဖန်ငါးရာငါးကမ္ဘာခံရလိမ့်မယ်။ ထိုင်ရပ်သေရင်ဖြစ်ဖြစ် ဒါကတော့ နောက်ဆုံးဘ၀ပဲ ၀ဋ္ဋ်ကုန်ပြီ. အစရှိသည်ဖြင့်ပြောနေကြတာတွေဟာ ဘုရားဟောနဲ့ ကိုက်ညီမူရှိမရှိ တပည့်တော်သိချင်ပါတယ်ဘုရား။ အရှင်ဘုရား ကျန်းမာချမ်းသာပြီး သာသနာ့တာဝန်ကို ကျေပွန်စွာထမ်းဆောင်နိုင်ပါစေဘုရား။

အင်း။ သေခြင်း (၄)မျိုးကတော့
၁။ အသက်ကုန်၍ သေခြင်း။ ဥပမာ- မီးဇာကုန်၍ မီးခွက်ငြိမ်းသလို သေရမည့် သက်တမ်းကုန်၍ သေခြင်း။

၂။ ကံတရားကုန်၍ သေခြင်း။ ဥပမာ- မီးခွက်တွင်းရှိ ဆီကုန်၍ မီးခွက်ငြိမ်းသလို မိမိ၏ရှေးကုသိုလ်ကံသည် ဤအရွယ်လောက်နေရမည့်ကံပါ၍ သေဆုံးခြင်း။

၃။ အသက်ရော ကံတရားရောကုန်၍ သေခြင်း။ ဥပမာ- မီးခွက်တွင်းရှိ ဆီရော မီးဇာရော နှစ်ပါးလုံးကုန်၍ မီးခွက်ငြိမ်းသလို လူတို့သက်တမ်းကလည်း ဤမျှလောက်ပဲ နောက်ဆုံးသက်တမ်းဖြစ်၍လည်းကောင်း မိမိ၌ပါလာသော ကံတရားကလည်း ဤမျှနဲ့ပဲ နိဂုံးသတ်ရန် အချိန်ကျရောက်လာသောကြောင့်လည်းကောင်း သေခြင်း။

၎။ လူတို့သက်တမ်းလည်း မပြည့်သေး၊ ကံတရားကလည်း အသက်ရှည်ရန် ရှိနေပါသော်လည်း မိမိ၏ ဘ၀ပေါင်းများစွာ၌ တစ်ခုခုသောဘ၀မှာ သူတစ်ပါးကို မထင်မှတ်ဘဲ သတ်ခြင်းစတဲ့ ဥပစ္ဆေဒကကံရှိနေ၍ ရုတ်တရက် ကားတိုက်ခြင်းစသည့် သေဆုံးခြင်းမျိုးဖြင့် သေခြင်း။ ဥပမာ- မီးခွက်၌ မီးဇာရော ဆီပါရှိနေသော်လည်း အပြင်က ရုတ်တရက်တိုက်လာသော လေကြောင့် မီးခွက်ငြိမ်းသွားသလို မိမိ၌ လူသက်တမ်းလည်း မပြည့်သေး၊ ကံတရားကလည်း မကုန်သေးဘဲ ရုတ်တရက်ကပ်၍ဖြတ်ကာ သေစေ တတ်သော ကားတိုက်းခြင်း၊ ကားမှောက်ခြင်း၊ ဓါးထိုးခံရခြင်းစသည့် မထင်မှတ်ဘဲ ရုတ်တရက်သေခြင်းမျိုးဖြင့် သေဆုံးခြင်းဟူ၍ သေခြင်း(၄)မျိုး ရှိပေသည်။

ထိုတွင် နံပါတ်(၁)သည် လူတို့ (၇၅)နှစ် သက်တမ်း၌ မွေးဖွားလာလျှင် (၇၅)နှစ်ပြည့်၍ သေခြင်း။ နံပါတ်(၂)သည် သက်တမ်း(၇၅)နှစ်တွင် မွေးဖွားပါသော်လည်း မိမိ၏ ရှေးကုသိုလ်ကံ နည်းပါးမှုကြောင့် မိမိကံတရားကပါလာသည့်အချိန်ရောက်လျှင် သေခြင်း။ နံပါတ်(၃)သည် သက်တမ်းကလည်း (၇၅)နှစ်ပြည့်၊ ကံတရားကလည်း ဒီချိန်သေရမည့်ကံပါလာ၍ သေခြင်း။ နံပါတ်(၄)သည် မိမိ၏ ရှေးရှေးသော ဘ၀ပေါင်းများစွာက ဥပစ္ဆေဒကကံကြောင့် ရုတ်တရက်မထင်မှတ်ဘဲ သေခြင်းတို့ပင် ဖြစ်ပေသည်။

တကယ်တော့ မိမိကိုယ်ကို သတ်သေရင် အဖန်ငါးရာငါးကမ္ဘာခံရမည်ဟု မြတ်စွာဘုရားရှင်က တိုက်ရိုက်ဟောထားခြင်း မတွေ့ရပေ။ သို့သော် ရခဲ့လှစွာသော ကုသိုလ်ကောင်းမှု ပြုလုပ်၍ အကောင်းဆုံးဖြစ်သော လူ့ဘ၀လေးကို ရရှိလာတဲ့အချိန်မှာ လူ့ဘ၀ကို လွယ်လွယ်ကူကူနဲ့ အဆုံးမသတ်ကြဖို့ရန် ရှေးရှေးလူတွေက ထွင်၍ပြောခဲ့ခြင်း ဖြစ်နိုင်ပေသည်။

လူ့ဘ၀သည် အလွန်တရာမှ ရခဲလှပါသည်။ မြတ်စွာဘုရားရှင်ကိုယ်တိုင်က လူ့ဘ၀ကို ရဖို့ရာမှာ ဗြဟ္မာ့ပြည်က အပ်တစ်ချောင်း အောက်ကိုချလိုက်လျှင် မြေကြီးပေါ်မှာ ထောင်ထားသော အပ်နှင့်ဗြဟ္မာပြည်က ကျလာသောအပ်တို့ ထိပ်တိုက်ထိဖို့ရန်ကမှ လွယ်ပေအုန်းမည်၊ ဖြစ်နိုင်ပေအုန်းမည်။ လူ့ဘ၀ကို ရဖို့ရန်သည် ထိုထက် ခဲယဉ်းလှသည်ဟု မိန့်တော်မူခဲ့ပါသည်။

တစ်ခါ မြတ်စွာဘုရားရှင်က လူ့ဘ၀ကနေ လူပြန်ဖြစ်သော သတ္တ၀ါနှင့်အပါယ်ဘုံသို့ ကျရောက်သတ္တ၀ါ မည်သူက များသနည်းဆိုသည့် ပြဿနာကို ကမ္ဘာမြေပေါ်၌ရှိသော သဲများနှင့် မြတ်ဗုဒ္ဓ၏လက်ဝါးပေါ်၌ရှိသော သဲအရေအတွက်နဲ့ နှိုင်းယှဉ်ပြခဲ့ပါသည်။ လက်ဝါးပေါ်မှာရှိသော သဲများက လူ့ဘ၀ကနေသေပြီး လူပြန်ဖြစ်တဲ့သတ္တ၀ါတဲ့။ ကျန်တဲ့မြေကြီးပေါ်မှာရှိတဲ့ သဲများကတော့ လူ့ဘ၀ကနေသေပြီး အပါယ်ဘုံသို့ ဖြစ်ကြတဲ့သတ္တ၀ါများဖြစ်သည်ဟု မိန့်ခဲ့ပါသည်။

ထို့ပြင် စဉ်းစားကြည့်လျှင် လူ့ဘ၀၏ ရခဲပုံကို သိနိုင်ပေလိမ့်မည်။ မိမိ၏ ပတ်ဝန်းကျင်မှာရှိသော တိရစ္ဆာန်များနှင့်လူများကို နှိုင်းယှဉ်ကြည့်လျှင် မည်သူက ပိုများသနည်း၊ လူ့ဘ၀ကိုရဖို့ရန် မည်မျှခက်ခဲသနည်းဆိုတာကို သိနိုင်ပေလိမ့်မည်။ အပါယ်(၄)ဘုံဖြစ်တဲ့ ငရဲ၊ တိရစ္ဆာန်၊ ပြိတ္တာ၊ အသူရကယ်ဆိုသည့် (၄)ဘုံထဲမှ ကျန်သည့်(၃)ဘုံကို အသာထားပါ။ တိရစ္ဆာန်ဘုံနှင့်လူ့ဘုံနှိုင်းယှဉ်ကြည့်လျှင်ပင် ဘယ်ဘုံက ရရှိဖို့ရန် ခဲယဉ်းသည်ကို သိနိုင်ပေသည်။

တိရစ္ဆာန်ဘုံတောင်မှ မြစ်ပင်လယ်ချောင်းများ၌ရှိနေသော တိရစ္ဆာန်တွေ တောတောင်များနေသော တိရစ္ဆာန်တွေကို မကြည့်ပါနဲ့အုန်း။ မိမိတို့နေ့စဉ်မြင်တွေ့ နေရသည့် ခြင်၊ ယင်၊ ပုရွက်ဆိတ်စသည့် တိရစ္ဆာန်များနဲ့ လူသားတို့ နှိုင်းယှဉ်ကြည့်လျှင်ပင် လူ့ဘ၀ကရဖို့ရန် ပို၍ခက်ခဲလှပါသည်။ သို့ဖြစ်၍ ရခဲလှတဲ့လူ့ဘ၀လေးရလာတဲ့အခါမှာ မိမိကိုယ်ကို သတ်သေသောသူသည် အဘယ်မျှလောက် မိုက်မဲမည်ကို စဉ်းစားကြည့်လျှင် သိနိုင်ပါလိမ့်မည်။

၎င်းပြင် လူ့ဘုံသည် အခြားသောဘုံတွေထက် ကောင်းမှုပြုရန် ပို၍လွယ်ကူသော ကြောင့် ဘုရားလောင်းများသည်ပင် လူ့ဘ၀ရရှိတဲ့အချိန်များ၌ ပါရမီများကို ဖြည့်ကျင့်ရပေသည်။ လူ့ဘ၀သည် ကောင်းမှုကုသိုလ်ပြုလုပ်၍ ထိပ်ဆုံးရောက်အောင် လုပ်နိုင်သလို မကောင်းမှုအကုသိုလ်လုပ်၍ အောက်ဆုံးအထိရောက်အောင် ပြုလုပ်နိုင်သော ဘုံဘ၀ဖြစ်ပေသည်။

ထို့ကြောင့် မိမိကိုယ်ကို သတ်မသေကြရန်အတွက် မိမိကိုယ်ကိုသတ်သေရင် အဖန်ငါးရာငါးကမ္ဘာခံရသည်ဟု ရှေးလူကြီးများက ပြောခဲ့ကြခြင်း ဖြစ်ပေသည်။ သို့ဖြစ်၍ ရခဲလှစွာသော လူ့ဘ၀လေးမှာ ပြုလုပ်သင့်သည် ကောင်းမှုများကို နေ့စဉ်ပြုလုပ်ကာ တန်ဖိုးရှိတဲ့လူ့ဘ၀မှာ တန်ဖိုးရှိသောလူ့တစ်ယောက်ဖြစ်ကာ တန်ဖိုးရှိသောလူ့ဘ၀ကို အသုံးချနိုင်အောင် ကြိုးစားကြရန် အထူးအထူးပင် လိုအပ်ပါပေသည်။

သီရိလင်္ကာနိုင်ငံနှင့်တရားပွဲ

အင်း ယခုတင်ပြထားတဲ့ ဓာတ်ပုံတွေကတော့ သီရိလင်္ကာနိုင်ငံရဲ့ တရားပွဲအခြေအနေလေးပါ။ သံဃာတွေကို ပင့်ဖိတ်တဲ့နေရာမှာတော့ တော်တော်လေး နမှုနာယူစရာ ကောင်းပါတယ်။ မီးတွေဆင်ပြီး ကျကျနန ပင့်ဖိတ်ပါတယ်။ တရားနာတဲ့အချိန်မှာတော့ သူတို့ရဲ့ဓလေ့ထုံစံအတိုင်း ခြေဆင်းထိုင်ခြင်းစသည်တို့ဖြင့် သင့်သလို ထိုင်ကြပါတယ်။ မြန်မာပြည်နှင့်ကွာတာကတော့ အဲဒီခြေဆင်းထိုင်ခြင်းပါပဲ။ အင်း တစ်ချို့က နဘေးအုတ်ခြေရင်းမှာ ဖြစ်သလိုထိုင်ပြီးလည်း တရားနာကြပါတယ်။

သီရိလင်္ကာပြည်သူများသည် တရားပွဲကို သူ့အချိန်နှင့်သူသာ ကျင်းပလေ့ရှိကြပါတယ်။ မြန်မာပြည်လောက်တော့ တရားပွဲများ မပေါများလှပေ။ တရားနာသူလည်း မြန်မာပြည်လောက် လူမများပေ။ တရားပွဲကျင်းပရာ ကျောင်းပတ်ဝန်းကျင်ရှိ လူများသာ တရားနာလာကြသည်ဟု ထင်ပါသည်။ သီရိလင်္ကာပြည်သူများသည် တရားပွဲမှ တရားနာ၍ လိမ်မာကြခြင်း မဟုတ်သလို မိဘများ၏ သွန်သင်မှုကြောင့် လိမ်ကြနေကြသည် မဟုတ်နိုင်ပေ။ ငယ်ငယ်ကတည်းက ဘုန်းကြီးကျောင်းများမှာ Sunday school ခေါ် Dhamma school တက်ရောက်သင်ကြားထားခြင်းကြောင့် လိမ်မာယဉ်ကျေး အသိဥာဏ်ပြည့်စုံနေကြခြင်း ဖြစ်ပေသည်။

သူတို့သင်ကြားလေ့လာထားသော ဗုဒ္ဓစာပေများသည် အတော်လေးကို အဆင့်မြင့်အောင် သင်ကြားထားကြသည်ကို တွေ့ရှိပါသည်။ စာရေးသူတို့ Sunday school အကြောင်း စာအုပ်ထုပ်ရန် လေ့လာကြည့်သောအခါ သူတို့သင်ထားတဲ့ စာပေသည် စာရေးသူတို့ ဘုန်းကြီးတွေတောင် မသိသေးသည့် အကြောင်းအရာများထိ ပါနေသည်ကိုတွေ့ရသဖြင့် သူတို့ကို စာရေးသူ လေးစားမိပေသည်။ ဒီအဆင့်ထိရောက်အောင် သူတို့သင်ကြားထားကြပါလားဟု တွေးတောကာ သူတို့ကတောင် ကိုယ့်ထက် ဗုဒ္ဓစာပေများကို သိနေကြပါလားဟု အံ့သြခြင်းများ ထပ်ကာထပ်ကာ ဖြစ်မိပါသည်။

ဆက်လက်၍ Sunday school အကြောင်း ဒီနိုင်ငံရဲ့ ထူးခြားသည့်အကြောင်းအရာများကို စာရေးသူ မြန်မာပြည်မပြန်ခင် တင်ပြပေးသွားပါမည်။ ယခုတော့ ဒီမျှနဲ့ နားပါရစေ။

ကိုးပါးသီလ အဓိပ္ပါယ်

ဘုန်းဘုန်းဘုရား တပည့်တော် ကိုးပါးသီလရဲ့ အဓိပ္ပါယ်ကို အကျယ်တ၀င့်သိချင်ပါတယ်ဘုရား။ ကျေးဇူးပြု၍ ဖြေဆိုပေးတော်မူပါဘုရား။ တပည့်တော်တို့က ရှစ်ပါးသီလသာ သိကြပြီး ကိုးပါးသီလကို သေချာမသိကြပါဘုရား။ တပည့်တော်ကို ဖြေကြားပေးစေချင်ပါတယ်ဘုရား။

အင်း တကယ်တော့ ဦးဇင်းလည်း စာမေးပွဲကြောင့် ချက်ချင်းမဖြေပေးနိုင်သေးတာပါ။ ခုတော့ စာမေးပွဲပြီးပြီမို့ ဖြေပေးလိုက်ပါတယ်။

ကိုးပါးသီလ၏ အဓိပ္ပါယ်မှာ

၁။ သူတစ်ပါးအသက်ကို သတ်ခြင်းမှ ရှောင်ကြဉ်ခြင်း။
၂။ သူတစ်ပါး ကိုယ်နှုတ်ဖြင့် မပေးသော ဥစ္စာကို ခိုးယူလုယက် မတရားသောနည်းလမ်းဖြင့် ယူခြင်း။
၃။ မေထုန်အကျင့်မှ ရှောင်ကြဉ်ခြင်း။
၎။ မုသားပြောဆိုခြင်းမှ ရှောင်ကြဉ်ခြင်း။
၅။ မူးယစ်စေတတ်သော အရာများကို သောက်စားခြင်းမှ ရှောင်ကြဉ်ခြင်း။
၆။ ညစာ စားခြင်းမှ ရှောင်ကြဉ်ခြင်း။
၇။ ပန်း နံ့သာစသော မွှေးစေတတ်သော အရာများကို လိမ်ကျံသုံးစွဲခြင်းနှင့် ကခြင်း သီဆိုခြင်း တီးမှုတ်ခြင်းတို့ ပြုလုပ်နားဆင်ကြည့်ရှု့ခြင်းမှ ရှောင်ကြဉ်ခြင်း။
၈။ မြင့်မြတ်သော နေရာထိုင်းခင်းတို့ပေါ်ထိုင်ခြင်းနှင့် မိမိထက် ဂုဏ်သိက္ခာကြီးမားသူတို့ထက် အပေါ်မှ ထိုင်ခြင်းတို့ကို ရှောင်ကြဉ်ခြင်း။
၉။ သက်ရှိသတ္တ၀ါ အားလုံးတို့ကို မေတ္တာပွား၍ နေထိုင်ခြင်းတို့ပင် ဖြစ်ပေသည်။

တကယ်တော့ ကိုးပါးသီလဆိုသည်မှာ ရှစ်ပါးသီလထဲမှ အကျိုးပိုမိုရစေရန် မေတ္တာပွားဖို့ တစ်ပါးအပိုအနေဖြင့် မေတ္တာကို ထည့်ပေးထားခြင်း ဖြစ်ပေသည်။
ဒီလောက်ဆို ရှင်းမည်ထင်ပါသည်။ မရှင်းပါက ဆက်လက်မေးမြန်းနိုင်ပါသည်။

ကြီးပွားတိုးတက်ချင်လျှင်

အင်း စာမေးပွဲပြီးပြန်တော့ ကိုယ့်လုပ်နေတဲ့ အများအကျိုးရှိမဲ့ ဗဟုသုတစာလေးတွေ အမေးအဖြေစာလေးတွေကို ပြန်လည်၍ စတင်ရေးသားလိုက်ပါတယ်။ စာရေးသူတို့လုပ်နေတဲ့ Sunday School ကိစ္စလည်း ဆက်လက်၍ လုပ်ဆောင်ရအုန်းမယ်။ အင်း ခုတော့ ရေးစရာရှိတဲ့ အကြောင်းအရာလေးတွေကို ဆက်လက်ရေးသားတင်ပြလိုက်ပါတယ်။

လောကရှိ လူသားတို့သည် ကြီးပွားတိုးတက်ခြင်းကို လိုချင်တပ်မက်ကြပါသည်။ သို့သော် မည်သို့ပြုမှုနေထိုင်လျှင် မည်သို့ကျင့်သုံးလိုက်နာလျှင် ကြီးပွားတိုးတက်မည်ကို မသိသကဲ့သို့ သိလျှင်လည်း ကြီးပွားတိုးတက်ချင်သလောက် လိုက်နာကျင့်သုံးခြင်းတော့ မရှိကြပေ။

ထို့ကြောင့် စာရေးသူသည် မသိသောသူသိအောင် သိသောသူကို ထပ်မံ၍ သတိပေးပြီး ကျင့်သုံးလိုက်နာရန် တိုက်တွန်းချင်သောကြောင့် ဤကြီးပွားတိုးတက်ကြောင်း (၇)ပါးကို တင်ပြလိုက်ရပေသည်။ ကြီးပွားတိုးတက်ချင်သူသည်

၁။ မပျင်းမရိ လုံ့လရှိရမည်။

၂။ အရာရာကို ဆင်ခြင်တက်သော သတိတရား အမြဲထာဝစဉ်ရှိရပါမည်။

၃။ လုပ်ငန်း၌ ဖြစ်သလို တာဝန်ကျေသဘောမျိုး စိတ်မပါသလို မလုပ်ဘဲ သန့်ရှင်းသပ်ရပ် သေချာအောင် လုပ်ကိုင်ဆောင်ရွက်ရပါမည်။

၎။ အရာရာကို ရှေ့နောက်ဆင်ခြင်စူးစမ်း စဉ်စားကာ လုပ်ကိုင်ဆောင်ရွက်ရမည်။

၅။ ကိုယ်အမှုရာ အပြောအဆို စိတ်အကြံအစည်တို့ကို သူ့နေရာသူ ပြောဆိုလုပ်ကိုင် ကြံစည်စဉ်စားတက်ရပါမည်။

၆။ သူတစ်ပါးပစ္စည်းကို မသမာသောနည်းဖြင့် မလိုချင်ဘဲ မှန်ကန်သောနည်းလမ်းနဲ့ရအောင် လုပ်ကိုင်ရပါမည်။

၇။ အများကောင်းကျိုးလုပ်ခြင်း၊ အလှူအတန်း ပေးကမ်းရက်ရောခြင်း၊ ကျွေးမွေးခြင်း၊ မေတ္တာတရားထားရှိခြင်းစတဲ့ ကောင်းတဲ့အရာတွေကို လုပ်ဆောင်ပေးရပါမည်။

ထို့ပြင် မိတ်ဆွေသူငယ်ချင်း ပေါင်းသင်းဆက်ဆံသောအခါ၌လည်း မိတ်ဆွေခင်ပွန်းကောင်း (၇)ယောက်တွင်ပါဝင်သော သူငယ်ချင်းအပေါင်းအသင်းများနှင့် ရွေးချယ်ပေါင်းသင်းဆက်ဆံတက်ရန်လည်း လိုအပ်လှပါသည်။ ထို့ကြောင့် မိတ်ဆွေသူငယ်ချင်းကောင်း (၇)ယောက်ကို တင်ပြပေးလိုက်ပါပေသည်။

၁။ ပေးနိုင်ခဲသော သူတန်ဖိုးထားသော ပစ္စည်းဝတ္ထုကို ပေးသူ။

၂။ ပြုနိုင်ခဲစွာသော အမှုကိစ္စလုပ်ငန်းတို့ကို လုပ်ကိုင်ပေးသူ။

၃။ သည်းခံနိုင်ခဲသော အမှုကိစ္စကိုမျှ သည်းခံပေးသူ။

` ၄။ မိမိလျှို့ဝှက်ထားသော အမှုကိစ္စကို သူငယ်ချင်းအား မလျှို့ဝှက်ဘဲပြောသူ။

၅။ သူငယ်ချင်းက လျှို့ဝှက်ခိုင်းသောစကားကို အလွန်လျှို့ဝှက်ပေးသူ။

၆။ ဘေးဒုက္ခအန္တရာယ်နဲ့တွေ့သောအခါ မစွန့်ပယ်ဘဲ တက်နိုင်သမျှ ကယ်တင်သူ။

၇။ သူငယ်ချင်းမှာ စားစရာမရှိရင်တောင် ပြစ်မထား မထီမဲ့မြင်မလုပ်သူ။

ဤမိတ်ဆွေသူငယ်ချင်းကောင်း (၇)ပါးလုံး မပြည့်စုံလျှင်သော်မှ တစ်ပါးနှစ်ပါးနဲ့ပြည့်စုံသူ ပို၍ပြည့်စုံသောသူတို့နှင့်ပေါင်းသင်းဆက်ဆံပြီး ကြီးပွားတိုးတက်ကြောင်း အင်္ဂါ(၇)ပါးနှင့် ပြည့်စုံအောင် လိုက်နာကျင့်သုံးမည်ဆိုလျှင် မိမိ၏ ရည်မှန်းချက်ဘ၀ပန်းတိုင်းကို လျှင်မြန်စွာရောက်ရှိပြီး ဖြစ်လေရာမှာ အစစအရာရာ ပြည့်စုံ၍ ကိုယ်စိတ်နှစ်ဖြာ ချမ်းသာနေပါလိမ့်မည်။

အားလုံးလိုက်နာကျင့်သုံးနေထိုင်နိုင်ကြ၍ ကိုယ်စိတ်နှစ်ပါး ချမ်းသာကြပါစေလို့ ဆန္ဒပြုရင်း စာရေးသူ၏ ဘလော့တင်ခြင်းကို ပြန်လည်၍ စတင်လိုက်ပေသည်။

အရှင်ကောမလ(ခ)ဆန်နီနေမင်း

Sanninaymin@gmail.com

သာသနတက္ကသီလဓမ္မာစရိယ

B.A (Buddhism)

M.A (university of Kelaniya)

ကိုလံဘိုမြို့၊ သီရိလင်္ကာနိုင်ငံ။

ဆန်နီနေမင်း လူချင်းတူပါလျက် အဘယ့်ကြောင့် ကွဲပြားရသနည်း

လူချင်းတူပါလျက် အသက်ရှည်ခြင်း မရှည်ခြင်း၊ အနာရောဂါများခြင်း နည်းခြင်း၊ ရုပ်အဆင်းလှပခြင်း မလှခြင်း၊ မိတ်ဆွေအခြံအရံအရှိန်အ၀ါရှိခြင်း မရှိခြင်း၊ ချမ်းသာခြင်း ဆင်းရဲခြင်း၊ အမျိုးကောင်း၌ဖြစ်ခြင်း မဖြစ်ခြင်း၊ ပညာဉာဏ်ကောင်းခြင်း မကောင်းခြင်းဟူသော အချက်(၁၄)ချက်သည် မတူညီကြပေ။ အဘယ့်ကြောင့် ထိုကဲ့သို့ လူသားချင်းတူပြီး ကွဲပြားနေကြပါသနည်း။

(၁) သူတစ်ပါးအသတ်ကို မသတ်ဘဲ ရှောင်ကြဉ်သောသူသည် ဖြစ်လေရာဘ၀၌ အသက်ရှည်ပြီး သူများအသတ်ကိုသတ်လေ့ရှိသူသည် အသက်တိုကြပေသည်။

(၂) သူတစ်ပါးအား တုတ်ဓါးလက်နက်ဖြင့် နာကျင်အောင် ဒဏ်ရာရအောင် စိတ်ထိခိုက်ခံစားရအောင် ပြုလုပ်သောသူသည် ဖြစ်လေရာဘ၀၌ အနာရောဂါများ၍ ထိုအရာများကို ရှောင်ကြဉ်သောသူသည် ဖြစ်လေရာဘ၀၌ အနာရောဂါနည်းပေသည်။

(၃) ဒေါသကြီးခြင်း၊ စိတ်ဆိုးလွယ်ခြင်းတို့သည် ဖြစ်လေဘ၀၌ ရုပ်ရေအဆင်း မလှခြင်းတို့ကို ဖြစ်စေ၍ သူတစ်ပါးတို့က စိတ်ဆိုးစရာ အမျက်ဒေါသဖြစ်စရာများနဲ့ ပြောဆိုစေကာမှု စိတ်မဆိုးဒေါသမထွက်အောင် ထိန်းနိုင်ပြီး သည်းခံသော ပုဂ္ဂိုလ်တို့သည် ဖြစ်လေရာဘ၀၌ ရုပ်ရည်အဆင်းလှပကြပေသည်။

(၄) သူတစ်ပါး ချမ်းသာခြင်း၊ ရုပ်ရေလှပခြင်း၊ ကျော်စောခြင်းတို့ကို မနာလိုဖြစ်သောပုဂ္ဂိုလ်တို့သည် ဖြစ်လေရာဘ၀၌ မိတ်ဆွေအခြံအရံအရှိန်အ၀ါနည်းပါး၍ ထိုဖော်ပြပါ အချက်များကို ရှောင်ကြဉ်သောပုဂ္ဂိုလ်သည် ဖြစ်လေရာဘ၀၌ မိတ်ဆွေအခြံအရံများပြီး အရှိန်သြဇာကြီးမားပေသည်။ ထို့ကြောင့် မိမိ၏စကားကို သားသမီ ညီအကိုမောင်နှမ သူငယ်ချင်းမိတ်ဆွေ၊ တပည့်များက နားမထောင်လျှင် ဤအချက်ကို လိုက်နာကျင့်ဆောင်ပါလေ။

(၅) သူတစ်ပါးတို့အား အထူးသဖြင့် သီလ သမာဓိ ပညာ သုံးပါးဖြင့် ပြည့်စုံသောအလှူခံပုဂ္ဂိုလ်တို့အား တစ်စုံတစ်ခုသော ပစ္စည်းကိုမျှ မပေးလှူသောပုဂ္ဂိုလ်သည် ဖြစ်လေရာဘ၀၌ ဆင်းရဲ၍ ပေးလှူစွန့်ကြဲပေးကမ်းသော ပုဂ္ဂိုလ်များသည် ဖြစ်လေရာဘ၀၌ ချမ်းသာစွာ နေရပေသည်။

(၆) မိမိထက် အသက်ကြီးသူကိုလည်းကောင်း၊ ပညာကြီးမားသောသူကိုလည်းကောင်း၊ သီလရှိသောသူကိုလည်းကောင်း ရိုသေလေးစားခြင်း၊ ဆည်းကပ်ခြင်းမရှိဘဲ မာန်မာနထောင်လွှားသောပုဂ္ဂိုလ်များသည် ဖြစ်လေရာဘ၀၌ အမျိုးယုတ်၍ မိမိထက် အသက်သော်လည်းကောင်း၊ ပညာသော်လည်းကောင်း၊ သီလသော်လည်းကောင်း ကြီးမားသောပုဂ္ဂိုလ်တို့ကို မာန်မာန မထောင်လွှားဘဲ မာန်မာနချ၍ ရိုသေလေးစားသောပုဂ္ဂိုလ်သည် ဖြစ်လေရာဘ၀၌ အမျိုးမြတ်သော ဘ၀၌ ဖြစ်ရပေသည်။

(၇) ပညာရှိသူတော်ကောင်းတို့ထံ၌ ဘယ်အရာသည် ကောင်းသောကုသိုလ်တရား ဘယ်တရားသည် မကောင်းသောအကုသိုလ်တရား၊ ဘယ်အရာသည် ကျင့်သုံးရမည့်အရာ၊ ဘယ်အရာသည် မကျင့်သုံးသင့်သောတရား၊ မည်သို့သောအရာသည် အပြစ်ရှိ၍ မည်သို့သော အရာသည် အပြစ်မရှိပါသနည်း စသည်ဖြင့် မိမိသိသင့် သိထိုက်သည့် တရားများကို မစူးစမ်းမလေ့လာ မမေးမြန်း မဆွေးနွေး မကျင့်သုံးသောပုဂ္ဂိုလ်သည် ဖြစ်လေရာဘ၀၌ ဉာဏ်ပညာနည်းပါး၍ ထိုအရာများကို ပညာရှိသူတော်ကောင်းတို့ထံချဉ်းကပ်ပြီး စူးစမ်းလေ့လာ ဆွေးနွေးမေးမြန်းခြင်းတို့ကို ပြုလုပ်သောသူသည် ဖြစ်လေရာဘ၀၌ ဉာဏ်ပညာကြီးမားပေသည်။

အထက်ပါအချက်အလက်များကို သိရှိပြီးပြီဆိုလျှင် မိမိ၌သော်လည်းကောင်း တစ်ပါးသောသူ၌လည်းကောင်း ထိုအချက်များထဲက တစ်ခုခုချို့ယွင်းလျှင်လည်းကောင်း ပြည့်စုံလျှင်လည်းကောင်း တိုက်ဆိုင်ကြည့်ပါက မည်သည့်အချက်ကြောင့် မည်ကဲ့သို့ဖြစ်နေသည်ဟု စမ်းစစ်ကြည့်လိမ့်မည် ထင်ပါသည်။ ထို့ကြောင့် ကျွန်ုပ်တို့လူသားများသည် ယခုဘ၀၌ အထက်ပါ အချက်များထဲမှ မကောင်းသောအချက်များ ဖြစ်နေလျှင် နောက်နောင်ဘ၀များ၌ မဖြစ်ရလေအောင် ယခုကတည်းက ရှောင်ကြဉ်သင့်တာရှောင်ကြဉ်ပြီး လိုက်နာကျင့်သုံးသင့်တာ လိုက်နာကျင့်သုံးရန် လိုအပ်လှပေသည်။

သတ္တ၀ါတို့သည် ကံသာလျှင် မိမိဥစ္စာရှိကုန်သည်။ ကံ၏ အမွေခံတို့ ဖြစ်ကုန်သည်။ ကံသာလျှင် အကြောင်းရှိကုန်သည်။ ကံသာလျှင် ဆွေမျိုးရှိကုန်သည်။ ကံသာလျှင် မှီခိုရာ ရှိကုန်သည်။ ကံသာလျှင် သတ္တ၀ါတို့ကို အယုတ်အမြတ်စသည်တို့ ခွဲခြား၍ ဖန်တီးပေးပါသည်။ ထို့ကြောင့် ကျွန်ုပ်လူသားများသည် မိမိတို့၏ အကြံအစည် အပြောအဆို အလုပ်အကိုင်တို့ကို ကောင်းသောအရာများဖြစ်အောင် ကြိုးစားကြရန် အထူးလိုအပ်ပါပေသည်။ ထိုမိမိကြံစည်မှု ပြောဆိုမှု လုပ်ကိုင်မှုတို့သည် ကောင်းလျှင် ကောင်းကျိုးဖြစ်၍ ကောင်းကျိုးခံစားရပေမည်။ မကောင်းလျှင် မကောင်းကျိုးဖြစ်၍ မကောင်းကျိုးကို ခံစားကြရပေမည်။

ထို့ကြောင့် မိမိသည် မိမိကိုယ်ကိုချစ်တယ်နှစ်သက်တယ်ဆိုလျှင် အကြံအစည်(မနောကံ) အပြောအဆို (၀စီကံ) အလုပ်အကိုင် (ကာယကံ)တို့ကို ကောင်သောအရာများဖြစ်အောင် လုပ်ဆောင်ပေးဖို့ရန် လိုအပ်လှပေသည်။ သို့မှသာလျှင် မိမိကိုယ်ကို ချစ်ရာရောက်ပေမည်။ လူသားအားလုံး မိမိကိုယ်ကို ချစ်နိုင်ကြပါစေလို့ ဆန္ဒပြုလျှက်............။

(မဇ္ဈိမနိကယ်၊ ဥပရိပဏ္ဏာသပါဠိတော်၊ ၀ိဘင်္ဂ၀ဂ်၊ စူဠကမ္မ၀ိဘင်္ဂသုတ်)

စာရေးသူ စာမေးပွဲနီးနေပါသဖြင့် ပို့စ်တင်ခြင်းနှင့် မေးမြန်းခန်းများကို ခေတ္တရပ်ဆိုင်းခွင့် ပြုပါရန်။ ဒီဇင်ဘာ (၆)ရက်နေ့မှ (၁၈)ထိ ဖြေဆိုရမည့် စာရေးသူ၏ M.A စာမေးပွဲပြီးမှသာလျှင် ပြန်လည်၍ ပို့စ်တင်ခြင်း၊ မေးခွန်းများ ဖြေပေးခြင်းကို ပြုလုပ်ပေးပါရစေ။ အကယ်၍ သိချင်တာများ ရှိပါက အီးမေးလ်တော့ ပို့ထားနိုင်ပါသည်။

အရှင်ကောမလ(ခ)ဆန်နီနေမင်း

Sanninaymin@gmail.com

သာသနတက္ကသီလဓမ္မာစရိယ

B.A (Buddhism)

M.A (university of Kelaniya)

ကိုလံဘိုမြို့၊ သီရိလင်္ကာနိုင်ငံ။

ဆန်နီနေမင်း အမေးအဖြေ ဈာန်နဲ့ပတ်သတ်၍

တပည့်တော်သည် ဈာန်ကို အခြေခံသော အဘိဉာဏ်၏အစွမ်းနှင့် ပတ်သက်သည်ကို အထူးပင် စိတ်ဝင်စားပါသည်ဘုရား။ ပဋိဘာဂနိမိတ်ဝင်စားကာ သမာပါတ်ရှစ်ပါး အနုလုံပဋိလုံဝင်စားခြင်းအားဖြင့် ပထဝီကသိုဏ်းကိုတည်ပြီး ဖန်ဆင်းအပ်သော ရုပ်သည်မည်မျှ အရှည်ကြာဆုံး တည်နိုင်ပါမည်လဲဘုရား။ အဓိဌာန်သမျှ တည်သည်ဆိုလျှင် အဓိဋ္ဌာန်သောပုဂ္ဂိုလ်က ကြာရှည်လေးမြင့်စွာတည်တံ့နေအောင် အဓိဌာန်သော်ငြားလည်း သူ၏ဈာန်ကွယ်သော ခဏမှာ ထိုအဖန်ဆင်းခံရုပ်၏ လားရာသည် မည်သို့ဖြစ်နိုင်ပါသည်လဲဘုရား။ အကျိုးအကြောင်းကို တပည့်တော်သည် မပစ်ပယ်ပါ။
သို့သော်လည်း ဗကဗြဟ္မာလောင်း ရသေ့ကြီး၏ လူအများကို ကယ်တင်သောထုံးကိုနှလုံးမူပြီး ယခုရဟန်းသူမြတ်၊ လူသူတော် မြတ်တို့သည် သတ္တဝါတို့၏ဆင်းရဲကြောင်းကို တန်ခိုးအစွမ်းဖြင့် ဟန့်တားနိုင်စကောင်းပါသလား အရှင်ဘုရား။ ထိြု့ပင် သူ့မယားလိုချင် သူ့လင်လှံဖြင့်ထိုး ပုံဝတ္ထုထဲမှကဲ့သို့ မကောင်းသောသူအား သိကြားမင်းသည် သူ၏က္ကုဒိပါဒ်အစွမ်းဖြင့် ပယ်ရှားပေးသကဲ့သို့ ယခုမျက်မှောက်လောကတွင် ဈာန်တန်ခိုးသည် အဖြေတစ်ခု ဖြစ်နိုင်ပါမည်လား အရှင်ဘုရား။

အကြောင်းနှင့်အကျိုးတွင် ကံသည်အားကြီးသော အကြောင်းဖြစ်သော်ငြားလည်း ကံတစ်ခုတည်းသက်သက်ဖြင့် မပြည့်စုံသောအခါ ပြင်ပမှအကြောင်းတရားများဖြင့် ပံ့ပိုးပေးရသည်ဟု မှတ်သားဖူးသဖြင့် ထိုအကြောင်း တရားသည် ဈာန်တန်ခိုး ဖြစ်စကောင်းပါသလားဘုရား။ တပည့်တော်သည် မဖြစ်နိုင်သော မဟာလူစွမ်းကောင်း အဖြစ် စိတ်ကူးယဉ်ခြင်းမဟုတ်ပါဘုရား။ ဖြစ်နိုင်သည်ဟု အတိအကျ ဖော်ပြခဲ့ပြီး ရှေးသူတော်ကောင်းတို့ထုံးကို နှလုံးမူကာ နှလုံးသွင်းဆင်ခြင်ခြင်းမျှသာ ဖြစ်ပါသည်ဘုရား။

ထို့ပြင် စိတ္တသံယုတ်မှ နွေရာသီအပြန်လမ်းတွင် နွမ်းနယ်ကြသောမထေရ်မြတ်တို့အား ပင်ပန်းခြင်းကို ဖြေဖျောက်စိမ့်သောငှာ မိုးပြေးကလေးရွာစေသာအရှင်မြတ်ကဲ့သို့ လူ့၇ွာလောကအား ဈာန်တန်ခိုးသည် လိုအပ်သောနေရာများတွင် ဖြေရှင်းချက်(solution) တစ်ခုဖြစ်နိုင်စကောင်းပါသလားအရှင်ဘုရား။ ကရုဏာရှေ့ထား ဖြေကြားပေးတော်မူပါ အရှင်ဘုရား။ လက်အုပ်ချီမိုးရှိခိုးလျက်။

အင်း ဒကာမေးတဲ့ မေးခွန်းတွေက အဘိဓမ္မာကို ပြန်ကြည့်မှ ရှင်းအောင်ဖြေလို့ရမယ် ဒကာ။ ဦးဇင်းလည်း ခု သီရိလင်္ကာနိုင်ငံမှာ ကျောင်းတတ်နေတာဆိုတော့ စာအုပ်ကလည်း ဒီမှာမရှိဘူး။ နောက်ပြီး အင်တာနက်မှာ လိုက်ရှာဖို့ မအားသေးဘူးဖြစ်နေတယ်။ စာမေးပွဲကလည်း ဒီဇင်ဘာ(၆)ရက်နေ့ဆို ဖြေရတော့မှာလေ။


အဲဒီတော့ ဒကာသိချင်တဲ့အထဲက တစ်ခုကိုတော့ ဖြေပေးလိုက်ပါမယ်။ မြတ်စွာဘုရားက ဈန်တရားတန်ခိုးတွေကို လူများအထင်ကြီးအောင် ဒုက္ခရောက်အောင် မလုပ်ရဘူး။ မလိုအပ်တဲ့နေရာမှာ မသုံးရဘူးလို့ မိန့်ခဲ့တယ်။

ဈာန်တန်ခိုးကိုဖန်ဆင်ရာမှာ မိမိရဲ့စိတ်အာရုံကျက်စားမှုပေါ်မှာ မူတည်ပြီး လျင်မြန်အောင် ဖန်ဆင်အသုံးချနိုင်ပါတယ်။ ဈန်တန်ခိုးကိုဖန်ဆင်းမယ်ဆိုရင် ဈန်တရားကို ပြန်ပြီးအာရုံပြုပြီးမှ ဖန်ဆင်းလို့ရပါတယ်။ မိမိက ဈာန်တန်ခိုးကို အမြန်အသုံးချနိုင်အောင် လေ့ကျင့်ထားမယ်ဆိုရင်တော့ လေ့ကျင့်မှုပေါ်မှာ မူတည်ပြီး အနှေးအမြန် ကွာခြားပါမယ်။ ဈာန်တန်ခိုးကို တကယ်လိုအပ်တဲ့နေရာမှာသာ သုံးဖို့ဘုရားရှင်က ခွင့်ပြုခဲ့ပါတယ်။

ရှင်မောဂ္ဂလာန်က လူသားတွေ ငတ်မွတ်ခေါင်းပါးတဲ့အချိန်မှာ မြေကြီးကိုလှန်ပြီး အောက်ကမြေသြဇာတွေကို အလွယ်တကူစားလို့ရအောင် ဖန်ဆင်းမယ်လုပ်တော့ ဘုရားရှင်က လူသားတွေအတွက် မိမိကိုယ်ကို အားကျိုးချင်သောစိတ်တွေ ပျောက်မယ်၊ လူသားတွေရဲ့ဝီရိယတွေ လျှော့ပါးသွားစေမယ်ဆိုပြီး တားမြစ်ခဲ့ပါတယ်။ လူသားတွေဟာ မြေကြီးကိုလှန်ပေးလိုက်ရင် အစားအစာကို အလွယ်တကူစားလို့ရရင် မိမိကိုယ်ကို အားကိုးချင်တဲ့စိတ်ရော လူသားတွေရဲ့ဝီရိယအားထုတ်မှုတွေရော လျှော့သွားမှာမို့ ဘုရားရှင်က ခွင့်မပြုခဲ့ခြင်း ဖြစ်ပါတယ်။

နောက်တစ်ခုက နဂါးက ရဟန်းတွေကြားမှာ လူဟန်ဆောင်ကာ ဝေယျာဝစ္စလုပ်နေတဲ့အချိန် ဂဠုန်ကနဂါးကိုမြင်သွားပြီး နဂါးကိုဖမ်းမယ်လုပ်တော့ ကိုရင်တစ်ပါးက သူ့၏လျင်မြန်သောဈာန်တန်ခိုးဖြင့် နဂါးပေါ်မှာ ဂဠူန်ထက်ကြီးမားသော ခန္ဓာကိုယ်ကြီးလုပ်၍ ကာကွယ်ပေးခဲ့ပါတယ်။ အဲဒီမှာ သူတစ်ပါးကို လျှပ်တပြက်ကူညီပေးချင်တဲ့အခါမှာတော့ ဈာန်တန်ခိုးကို အသုံးပြုလို့ရပါတယ်။ ဈာန်တန်ခိုးကို ဖန်ဆင်းသူ၏ အဓိဋ္ဌာန်ပေါ်မှာမူတည်ပြီး ကြာရှည်အောင်လုပ်နိုင်ပါတယ်။ ဈာန်တန်ခိုးဖန်သူ၏ အဓိဋ္ဌာန်အလျှောက် ဈာန်တန်ခိုးဟာ ဖြစ်ပေးပါတယ်။

ဒီလောက်ဆို ကျေနပ်ပါတော့။ ကျန်တာကိုတော့ နောက်မှပဲ အေးဆေးဖြေပေးပါမယ်။ ယခုတော့ ဤမျှနဲ့နားပါရစေ။

ဆန်နီနေမင်း အမေးအဖြေ အကျိုးပေးကွာခြားပုံ

ဘုန်းဘုန်း တပည့်တော်မ စာရေးလိုက်ပါတယ်ဘုရား။ မနက်မိုးလင်းတော့ တရားနာပါတယ်ဘုရား။ အရှင်ဆန္ဒာဓိကရဲ့တရားတော်ကိုနာပါတယ်ဘုရား။ အခု တပည့်တော်မလည်း ဘုန်းဘုန်းနဲ့တွေ့ပြီးတဲ့ အချိန်က စပြီး စိတ်တွေမမွန်းကျပ်တော့ဘူးဘုရား။ ဘုန်းဘုန်းကိုကျေးဇူးတင်ပါတယ်ဘုရား။ တပည့်တော်မလည်း ကိုယ့်ဘ၀ရဲ့ အခက်အခဲတွေကို ကျော်လွှားနိုင်အောင်ကြိုးစားနေပါတယ်ဘုရား။

ဘုန်းဘုန်ုးကိုမသိတာလေး မေးပါအုံးမယ်ဘုရား။ လူတစ်ယောက်ပေါ့။ သူက နွားတို့ဆိတ်တို့ သတ်တဲ့စနေဒိုင်ပေါ့။ သူသေသွားတော့ သူဟာ လူဝင်စားဖြစ်တယ်တဲ့ ကောင်းကောင်းမွန်မွန်ပဲ သူဌေးသား ဖြစ်နေတယ်တဲ့။ ဟိုဘ၀က အကုသိုလ်လုပ်ခဲ့ပေမဲ့ နောင်ဘ၀မှာကောင်းစားနေတယ်။ နောက်လူ တစ်ယောက်က ဘုရားတရားကိုင်းရှိုင်းတယ် ကောင်းမှု့ကုသိုလ်တွေပဲအမြဲလုပ်တယ်။ ဒါပေမဲ့ သူသေတော့ ခွေးဝင်စားဖြစ်တယ်တဲ့။ လူအများအိမ်ကနှင်ထုတ်ခံရတဲ့ ခွေးဖြစ်သွားတယ်တဲ့။ တပည့်တော်ဆိုလိုတာကတော့ အဲဒီလူနှစ်ယောက်ရဲ့နောက်ဆုံးအချိန်ကွာခြားချက်ကဘာလဲဘုရား။ တပည့်တော်မရှင်းပါဘူးဘုရား။ ဖြေရှင်းပြ ပါဘုရား။ ရိုသေစွာဖြင့် ဘုန်းဘုန်းရဲ့တပည့်မ

အင်း အဲဒီလိုအကျိုးပေး ကွာခြားချက်မှုများကို ကံ(၄)ပါးနဲ့ ယှဉ်ကြည့်ရင် သိပါလိမ့်မယ်။ ကံ(၄)ပါးကား (၁) မျက်မှောက်ဘ၀တွင် အကျိုးပေးသာကံ၊ (၂) ဒုတိယဘ၀မှ အကျိုးပေးသောကံ၊ (၃) တတိယဘ၀မှစ၍ နောက်ဆုံးနိဗ္ဗာန်ရသည့် ဘ၀တိုင်အောင် အခွင့်သာတိုင်း အကျိုးပေးသောကံ၊ (၄) အကျိုးပေးရမည့်ကာလ၌ အကျိုးပေးခွင့်မရဘဲ ပျောက်ပျက်သွားသောကံဆိုပြီး ကံလေးမျိုးရှိပါတယ်။

အဲဒီတော့ မိမိလုပ်တဲ့ ကောင်းမှုမကောင်းမှုသည် ဘယ်အချိန်ဘယ်ဘ၀မှာ အကျိုးပေးမယ်ဆိုတာ သေချာပြောလို့မရပါဘူး။ မရေတွက်နိုင်သော ဘ၀ပေါင်းများစွာက မိမိပြုလုပ်ခဲ့တဲ့ ကောင်းကံမကောင်းကံတွေကလည်း မိမိမှာ ရှိနေတယ်လေ။

နောက်ပြီး ကံအပြား(၄)ပါးဆိုတာလည်း ရှိပါသေးတယ်။ ကံအပြား(၄)ပါးကတော့ (၁) ပဋိသန္ဓေတည်ရုံ ပဋိသန္ဓေတည်ပြီး ဖြစ်ရမည့်ဘ၀မှာ ဆက်လက်ဖြစ်အောင် ဖြစ်စေတတ်သောပ၀တ္တိကံ။ (၂) ဖြစ်လာတဲ့ဘ၀မှာ နောက်ကနေ ကောင်းကျိုးမကောင်းကျိုးကို ထောက်ပံ့ပေးသောကံ။ (၃) ကပ်၍နှိပ်စက်တတ်သောကံ။ ဥပမာ-လူအဖြစ်ကိုရပါသော်လည်း အမျိုးယုတ်ခြင်း၊ အင်္ဂါမစုံခြင်းစသောကံ။ (၄) ကပ်၍ဖြစ်တတ်သောကံ။ ဥပမာ-သက်တမ်းမကုန်ဘဲ ရောဂါနဲ့ဖြစ်စေ တစ်ခုခုသောအကြောင်းကြောင့်ဖြစ်စေ သေရခြင်းစသည်ကံဆိုပြီး ကံအပြားလေးမျိုးလည်း ရှိပါတယ်။ အဲဒီတော့ မိမိရဲ့ ကောင်းကံမကောင်းကံသည် ဘယ်လိုချိန်မှာ ဘယ်လိုတွေအကျိုးပေးမယ်ဆိုတာ ပြောလို့မရလေ။

နောက်ပြီး ကောင်းကံမကောင်းကံ အကျိုးပေးကွဲပြားခြားနားရတဲ့ ကံအပြား(၄)ပါး ရှိပါသေးတယ်။ အဲဒါတွေကတော့ (၁) အမိသတ်ခြင်း၊ အဖသတ်ခြင်း၊ ရဟန္တာကိုသတ်ခြင်း၊ မြတ်စွာဘုရားကို သွေးစိမ်းတည်အောင် ပြုလုပ်ခြင်း၊ သံဃာတော်အချင်းချင်း ကွဲပြားအောင်လုပ်ခြင်းဆိုတဲ့ ဂရုကံကိုလုပ်ခြင်း။ (၂) သေခါနီးကာလ၌ကပ်ပြီး ပြုလုပ်အပ်သော ကောင်းကံမကောင်းကံနှင့် သေခါနီး အာရုံထဲ၌ မိမိလုပ်ခဲ့သော ကောင်းကံမကောင်းကံတို့ စိတ်ထဲပေါ်လာခြင်း။ (၃) နေ့စဉ်မပြတ် လေ့ကျင့်ပြုလုပ်လေ့ရှိသော တစ်ကြိမ်တစ်ခါပင် ပြုလုပ်မိသော်လည်း စိတ်ထဲမှာ အမြဲစွဲနေသော ကောင်းကံမကောင်းကံ။ (၄) ရှေးရှေးဘ၀က ပြုခဲ့ဖူးသောကံဆိုပြီး ကံလေးပါးရှိပါသေးတယ်။

ထို့ကြောင့် မိမိတို့လုပ်ခဲ့သော ကောင်းကံမကောင်းများသည် မရေတွက်နိုင်သောဘ၀ပေါင်းများစွာက ပြုလုပ်ခဲ့သော ကံများရှိသလို ယခုမျက်မှောက်နေ့စဉ် ပြုလုပ်နေသော ကံများစွာလည်း ရှိနေသည်မို့ ကံတရားသည် ဒီဘ၀မှာ ကောင်းတာဖြစ်ပေမဲ့ နောက်ဘ၀မှာ ကောင်းတာဆက်ဖြစ်မယ်လို့ မပြောနိုင်ပါဘူး။ အရင်ဘ၀တွေကလုပ်ခဲ့တဲ့ ကံများစွာကလည်း အကျိုးပေးဖို့ ကျန်နေတာဖြစ်တဲ့အတွက် ခုချိန်ကံကောင်းနေပေမဲ့ တော်ကြာ ကံဆိုးချင် ဆိုးပါတယ်။

ယခုဘ၀တွင် ကောင်းတာများလုပ်သော်လည်း နောက်ဘ၀၌ ကောင်းသောဘုံမှာဖြစ်ပြီး ကောင်းကျိုးများကို ခံစားရမည်ဟု သေချာမပြောနိုင်သလို ယခုဘ၀တွင် မကောင်းတာများလုပ်၍ နောက်ဘ၀၌ မကောင်းသောဘုံမှာဖြစ်ပြီး မကောင်းကျိုးများကို ခံစားရမည်ဟုလည်း သေချာမပြောနိုင်ပေ။ အဘယ့်ကြောင့်ဆိုသော် မိမိတို့ပုထုဇဉ်ပုဂ္ဂိုလ်သည် အမှားအမှန်ကို မခွဲခြားတတ်သေး၍ ဘ၀ပေါင်းများစွာက ပြုလုပ်ခဲ့သော ကောင်းကံမကောင်းကံတို့ ရောနှော၍ ရှိနေခြင်းကြောင့်ဖြစ်သည်။ အရိယာမဖြစ်သေးသော ပုထုဇဉ်ပုဂ္ဂိုလ်များသည် အမှန်အမှားကို သေချာမခွဲခြားတတ်သော ဒိဋ္ဌိနှင့်ယုံမှားသံသယဖြစ်ခြင်း ၀ိကိစ္ဆာနှစ်ပါးရှိနေသေးသည်။

ယခုဘ၀တွင် ကောင်းတာလုပ်မှုများသော်လည်း တစ်ချို့သည် သေခါနီးကာလ၌ မကောင်းမှုအနည်းငယ်လေးကိုပင် အာရုံထဲပေါ်လာတက်၍ မကောင်းသောဘုံမှာ မကောင်းကျိုးကို ခံစားရတတ်သလို တစ်ချို့သည် မကောင်းတာလုပ်မှုများသော်လည်း သေခါနီးကာလ၌ ကောင်းမှုအနည်းငယ်ကို အာရုံထဲပေါ်လာ၍ ကောင်းသောဘုံမှာ ကောင်းကျိုးများကို ခံစားရသည်လည်း ရှိတက်ပေသည်။

ထို့ပြင် ယခုဘ၀၌ ကောင်းမှုများသော်လည်း အရင်အရင်ဘ၀ပေါင်းများစွာက မကောင်းမှုများခဲ့လျှင်လည်း အရင်ဘ၀က ၀ဋ်ကြွေးများကို ဆပ်ရန်ကျန်သေးသည့်အတွက် မကောင်းသောဘုံ၌ မကောင်းကျိုးကို ခံစားရတတ်ပေသည်။

အရေးကြီးသည်မှာ မိမိတို့သည် သေခါနီးအချိန်တွင် အဓိကကျနေသောကြောင့် မိမိတို့စိတ်ထဲ၌ အမြဲစွဲနေအောင် ကောင်းမှုကုသိုလ်များကို နေ့စဉ်မပြတ်ပြုလုပ်နေဖို့ အရေးကြီးပါသည်။ မိမိပြုလုပ်ခဲ့သော ကောင်းမှုများတွင် မိမိ၏ခွန်းအား ဉာဏ်အား ငွေအားများဖြင့် စိတ်ပါလက်ပါပြုလုပ်ခဲ့သော ကောင်းမှုကို အဓိကအနေဖြင့် စိတ်ထဲမှာ အမြဲအောက်မေ့နေပေးပါ။ မိမိတွင် အရင်ဘ၀တွေက မကောင်းမှုများခဲ့လျှင်သော်မှ ယခုမျက်မှောက်ဘ၀တွင် ကောင်းမှုများကို နေ့စဉ်ပြုလုပ်ပေးသွားမည်ဆိုလျှင် မိမိမှာ ကောင်းမှုများနေ၍ မကောင်းမှုများသည် ကောင်းမှုများသာ ဆက်တိုက်အကျိုးပေးနေသဖြင့် အကျိုးပေးခွင့်မရဘဲ ပျောက်ပျက်သွားနိုင်ပါသည်။

ထို့ကြောင့် မိမိတို့သည် ယခုလို လူ့ဘ၀မှာကောင်းမှုမကောင်းမှုကို ခွဲခြားတက်သောအသိဉာဏ်ရှိနေချိန်တွင် ကောင်းမှုများ နေ့စဉ်မပြတ်ပြုလုပ်ရန် အခါကောင်းရောက်နေလေးချိန်၌ မကောင်းမှုများအား တက်နိုင်သမျှရှောင်ကြဉ်ပြီး ကောင်းမှုများဖြင့် မွေ့လျော်နိုင်အောင် ကြိုးစားရန် အထူးလိုအပ်ပါပေသည်။

ယခုတော့ ဤမျှနဲ့နားပါရစေ။

နိဗ္ဗာန်ဆိုတာ ဆင်းရဲငြိမ်းခြင်းလား၊ ဘာမှမရှိခြင်းလား

မေး။ ။ ဆရာတော်ဘုရား။ တပည့်တော် ရိုသေစွာ လျှောက်ထားပါသည်။ နိဗ္ဗာန်ဆိုတာ လူ့ဘဝ၌ ဆင်းရဲငြိမ်းခြင်းကို ခေါ်ပါသလား။ ဘဝကုန်ဆုံးပြီး ဘာမှမရှိခြင်းကို ခေါ်ပါသလား။ ကောင်းကင်မှာ ရှိပါသလား။ (မစိုးမိုးသူ၊ ဒုတိယနှစ် အင်္ဂလိပ်စာ၊ ရန်ကုန်တက္ကသိုလ်)

ဖြေ။ ။ ဟုတ်ပါတယ်။ နိဗ္ဗာန်ဆိုတာ ဆင်းရဲငြိမ်းခြင်းကို ခေါ်ပါတယ်။ ဘာမှ မရှိတာကို နိဗ္ဗာန်လို့ မခေါ်ပါဘူး။ အဘာဝပညတ်လို့ ခေါ်ပါတယ်။ နိဗ္ဗာန်ဟာ ကောင်းကင်မှာ မရှိပါဘူး။ ဘယ်မှာမှ မရှိပါဘူး။ နိဗ္ဗာန်ဟာ အမှန်ရှိပါတယ်။ သို့သော် ဘယ်မှာမှမရှိပါဘူး။ နားထွေး သွားပါသလား။ ဆိုလိုတာက ဆင်းရဲမရှိခြင်းဆိုတဲ့ အငြိမ်းဓာတ်ကြီးဟာ တည်ရာဌာန မရှိပါဘူး။ ဒီသဘာဝကြီးဟာ အကြောင်းတစုံတရာကြောင့် ဖြစ်ပေါ်လာတဲ့ (သင်္ခတ)သဘာဝ မဟုတ်ပါဘူး။ မူလကတည်းက သဘာဝအလျောက်ရှိနေတဲ့ အရှိ(အသင်္ခတ) သဘာဝကြီးပါ။ ဒီနေရာမှာ သင်္ခတနဲ့ အသင်္ခတရဲ့ အဓိပ္ပါယ်ကို သဘောမပေါက်သေးသူများအတွက် အနည်းအကျဉ်း ရှင်းပြဖို့လိုမယ် ထင်ပါတယ်။ ‘သင်္ခတ’ဆိုတာ “အကြောင်းတို့ စုပေါင်း ပြုလုပ်ပေးလို့ ဖြစ်ပေါ်လာတဲ့တရား”လို့ ဆိုလိုပါတယ်။ တိုတိုရှင်းရှင်း ပြောရရင် “အကြောင်းကြောင့်ဖြစ်တဲ့တရားဟာ သင်္ခတတရား”ပါပဲ။ ရုပ်နဲ့နာမ်ကို သက်ဆိုင်ရာ အကြောင်းတွေကြောင့် ဖြစ်ပေါ်လာတာမို့ ‘သင်္ခတတရား’လို့ ခေါ်ရပါတယ်။ မဖောက်မပြန် အမှန်တကယ်ရှိတဲ့ တရားများဖြစ်လို့ “သင်္ခတပရမတ်”တရားများလို့ ခေါ်ရပါတယ်။ သို့သော်လည်း အကြောင်းကြောင့်ဖြစ်တဲ့ ‘အဖြစ်တရား’များမို့ သူတို့ဟာ ပျက်ပါတယ်။ ဘာကြောင့် ပျက်သလဲဆိုတာ့ ဖြစ်လို့ ပျက်တာပါပဲ။

ဒါကြောင့် ‘သင်္ခတနယ်’ဟာ ဖြစ်ပျက်နယ်ပါ။ ဖြစ်ပျက်နယ်ထဲမှာရှိလို့ သင်္ခတဖြစ်တဲ့ ရုပ်နာမ်မှန်သမျှဟာ ဖြစ်ပျက်ဆင်းရဲ သင်္ခါရဒုက္ခချည်းပါပဲ။ ‘အသင်္ခတ’ဆိုတာကတော့ သင်္ခတရဲ့ ပြောင်းပြန်သဘာဝပါ။ “အကြောင်းတို့ စုပေါင်း မပြုလုပ်အပ်တဲ့ သဘာဝ”လို့ ဆိုလိုပါတယ်။ တိုတိုရှင်းရှင်း ပြောရရင် “အကြောင်းကြောင့်ဖြစ်တဲ့ အဖြစ်တရား မဟုတ်ဘူး”လို့ ဆိုလိုပါတယ်။ အဖြစ်တရားမဟုတ်တဲ့ ဒီအသင်္ခတ သဘာဝဟာ မဖောက်မပြန် အမှန်တကယ်ရှိတဲ့တရားဖြစ်လို့ မူလသဘာဝအနေနဲ့ရှိနေတဲ့ “အရှိပရမတ်”တရားပါ။ “အသင်္ခတပရမတ်”ပေါ့။ အဲဒီအရှိတရားဟာ ဘာလဲဆိုတော့ သူဟာသင်္ခတရဲ့ ပြောင်းပြန် သဘောဖြစ်လို့ သင်္ခတခေါ်တဲ့ ရုပ်နာမ်ငြိမ်းနေခြင်း၊ ရုပ်နာမ်မရှိခြင်း သဘောပါပဲ။

ရုပ်နဲ့နာမ် ရှိနေသမျှ ဆင်းရဲနေတယ်။ ရုပ်နာမ်ငြိမ်းသွားတော့ ဆင်းရဲ မရှိတော့ဘူး။ အဲဒီ ဆင်းရဲငြိမ်းနေတာဟာ တကယ်ရှိတဲ့ အရှိသဘာဝပါပဲ။ ဒါကိုပဲ နိဗ္ဗာန်လို့ ခေါ်ရပါတယ်။ အဲဒါဟာ အသင်္ခတတရားပါပဲ။ ဒီဆင်းရဲငြိမ်းနေတဲ့ ဆင်းရဲကင်းနေတဲ့ သဘာဝဟာ မူလကတည်းက ရှိနေတဲ့ အရှိသဘာဝမို့ သူဟာ အကြောင်းကြောင့် ဖြစ်တာမဟုတ်လို့ သူ့ကို အသင်္ခတလို့ ခေါ်ရပါတယ်။ အဖြစ်တရားမဟုတ်၊ အရှိတရားလို့ ဆိုလိုပါတယ်။ အရှိတရားဖြစ်လို့ မဖြစ်တဲ့အတွက် ပျက်လည်း မပျက်ပါဘူး။

ဒါကြောင့် အသင်္ခတနယ်လို့ခေါ်တဲ့ နိဗ္ဗာန်ဟာ ဖြစ်ပျက်နယ်ကို လွန်မြောက်နေပြီဖြစ်လို့ ဆင်းရဲမရှိဘဲ ဆင်းရဲငြိမ်းနေပါတယ်။ ဒီတော့ အကျဉ်းချုပ်လိုက်ရင် သင်္ခါရလို့လည်းခေါ်တဲ့ သင်္ခတအဖြစ်တရားများဟာ ဖြစ်ပျက်မကင်းလို့ ဆင်းရဲတယ်။ အသင်္ခတခေါ်တဲ့ အရှိတရားဟာ ဖြစ်ခြင်းပျက်ခြင်းမရှိလို့ ဆင်းရဲငြိမ်းတယ်။ ဒါကိုပဲနိဗ္ဗာန်လို့ ခေါ်ပါတယ်။

ဒါကြောင့် ပဋိသမ္ဘိဒါမဂ် ပါဠိတော် (စာ-၁၅) မှာလည်း “ဥပ္ပါဒေါ - အဖြစ်တရားသည်၊ သင်္ခါရာ - ရုပ်နာမ်သင်္ခါရတို့ပေတည်း။ အနုပ္ပါဒေါ - မဖြစ်တရား (အရှိတရား)သည်၊ နိဗ္ဗာနံ - နိဗ္ဗာန်ပေတည်း။”လို့ အဖြစ်တရားနဲ့ အရှိတရားကို ခွဲခြား မိန့်တော်မူခဲ့တာပါပဲ။ ဒီဆင်းရဲငြိမ်းတဲ့ သဘာဝ အရှိပရမတ်တရားဟာ တည်ရာဌာနမရှိလို့ ဘယ်နေရာမှာ ရှိတယ်လို့ ပြောမရသလို အဖြစ်တရား မဟုတ်လို့ ဘယ်အချိန် ဘယ်ကာလက ဖြစ်တယ်လို့လည်း ပြောလို့မရပါဘူး။

ဒါကြောင့် အပတိဋ္ဌ = တည်ရာဌာနမရှိတဲ့တရား၊ ကာလဝိမုတ္တ = အတိတ် အနာဂတ် ပစ္စုပ္ပန်ဆိုတဲ့ အချိန်ကာလမှ လွတ်တဲ့တရားပါ။ ( Nibbanna is beyond time and space. )လောဘ၊ ဒေါသ၊ မောဟ၊ မာန၊ ဒိဋ္ဌိစတဲ့တရားတွေဟာ သတ္တဝါကို ပူလောင်စေတဲ့တရား၊ ဆင်းရဲစေတဲ့ တရားတွေပါ။ ဒါကြောင့် သူတို့ကို ကိလေသာလို့ ခေါ်ပါတယ်။

ဒီကိလေသာတွေရှိနေသမျှ ဆင်းရဲနေတာပါပဲ။ ဒီကိလေသာတွေ မရှိရင် ဆင်းရဲငြိမ်းပြီး ချမ်းသာတော့တာပါပဲ။ ဒါကြောင့် ကိလေသာငြိမ်းခြင်းဟာ ဆင်းရဲငြိမ်းခြင်း = နိဗ္ဗာန်ပါပဲ။ ကိလေသာငြိမ်းသော်လည်း ရုပ်နဲ့နာမ်တချို့က ရှိနေသေးတော့ ဖြစ်ပျက်ဆင်းရဲ = သင်္ခါရဒုက္ခ ကျန်နေပါသေးတယ်။ အဲဒီရုပ်နာမ်သင်္ခါရတွေ အဖြစ်ရပ်ပြီး နောက်ထပ်မဖြစ်တော့ဘဲ သင်္ခါရဒုက္ခပါ အပြီးသတ် ငြိမ်းမှပဲ သန္တိသုခခေါ်တဲ့ တကယ်အငြိမ်းသဘာဝ နိဗ္ဗာန်ကြီးကို တွေ့ရပါတယ်။

လောကမှာ မီးမရှိဘဲ အေးနေတဲ့ သဘာဝဟာ မူလကတည်းကရှိနေတဲ့ အရှိသဘာဝပါ။ သို့သော်လည်း မီးရှိနေတဲ့အခါမှာတော့ မီးမရှိဘဲ အေးနေတဲ့ သဘာဝကို မတွေ့နိုင် မသိနိုင်ပါဘူး။ မီးငြိမ်းသွားတဲ့အခါကျတော့မှပဲ မူလကတည်းကရှိနေတဲ့ ဒီအေးတဲ့ သဘာဝကို သေသေချာချာ တွေ့ရသိရပါတယ်။

အဲဒီအတိုင်းပဲ ဒီဆင်းရဲငြိမ်းတဲ့ သဘာဝ၊ ဆင်းရဲမရှိတဲ့ သဘာဝကြီးဟာ မူလကတည်းက ရှိနေတဲ့ အရှိသဘာဝကြီးပါ။ ရုပ်နာမ်သင်္ခါရ အဖြစ်ရပ်သွားမှ ဖြစ်ပေါ်လာတာ မဟုတ်ပါဘူး။ တစ်ဘက်က ဆင်းရဲရှိနေသလို တခြားတစ်ဘက်ကလည်း ဆင်းရဲငြိမ်းတဲ့ ဆင်းရဲမရှိတဲ့ သဘာဝဟာ ရှိနေပါတယ်။ သို့သော်လည်း ရုပ်နာမ်သင်္ခါရတွေ ဖြစ်နေခိုက်မှာတော့ ရုပ်ဆင်းရဲ နာမ်ဆင်းရဲ သင်္ခါရဆင်းရဲတွေက ဖုံးကွယ်ထားလို့ ဆင်းရဲမရှိတဲ့ သဘာဝကြီးကို မဆိုက်ရောက်နိုင် မသိနိုင်ဘဲ ဖြစ်နေတာပါ။

ရန်ကုန်ကနေ မန္တလေးအမြန်ရထားစီးသွားတော့ လမ်းဆုံးရင် မန္တလေးမြို့ကြီးကို ရောက်တယ်။ ဒီတော့ ရထားဆိုက်မှပဲ မန္တလေးမြို့ကြီး ဖြစ်ပေါ်လာသလားဆိုတော့ မဟုတ်ပါဘူး။ အများသိတဲ့အတိုင်းပဲ မန္တလေးမြို့ကြီးက အရင်ကတည်းက ရှိနေတာ မဟုတ်လား။ (ဟုတ်ပါတယ်ဘုရား)

အဲဒီအတိုင်းပဲ ဆင်းရဲမရှိတဲ့ သဘာဝကြီးဟာလည်း အကြောင်းကြောင့် ဖြစ်ပေါ်လာတဲ့ အဖြစ်တရား (သင်္ခတ)မဟုတ်။ မူလကတည်းကရှိနေတဲ့အရှိတရား (အသင်္ခတ)ပဲ။ မဂ္ဂင်ရှစ်ပါး ယာဉ်ရထားကို လမ်းဆုံးအောင်စီးသွားနိုင်တဲ့ လူကတော့ လမ်းဆုံးရင် အသင်္ခတ သဘာဝ အငြိမ်းဓာတ်ကို ဆိုက်ရောက်သွားမှာပဲ။

တကယ်လို့သာ နိဗ္ဗာန်ဟာ အကြောင်းတစုံတရာကြောင့်ဖြစ်တဲ့ သဘာဝဆိုရင် ပျက်ရတာ ဓမ္မတာဖြစ်လို့ နိဗ္ဗာန်ကိုလည်း ပျက်တယ်လို့ဆိုရာ ရောက်ပေလိမ့်မယ်။ ဒီလိုဆိုရင် နိဗ္ဗာန်ဟာ ဖြစ်တတ်ပျက်တတ်လို့ ဆင်းရဲပင် ဖြစ်နေတဲ့အတွက် ဆင်းရဲငြိမ်းတဲ့ ချမ်းသာလို့ မဆိုနိုင်ပြန်ဘူး။ တကယ်တော့ နိဗ္ဗာန်ဟာ အရှိသဘာဝဖြစ်လို့ ဖြစ်လည်း မဖြစ်၊ ပျက်လည်း မပျက်ဘူး။ အဲဒီလို မဖြစ်မပျက်လို့ဘဲ ဆင်းရဲငြိမ်းတဲ့ သဘာဝအနေနဲ့ အမြဲ တည်ရှိနေတာပါပဲ။
ဒါကြောင့် “ဓုဝံ = အမြဲရှိနေတဲ့ သဘော”လို့ ဆိုရပါတယ်။ ပြီးတော့ မဖြစ်တဲ့ သဘာဝမို့ သူ့ကို ဖြစ်ပေါ်အောင် လုပ်ပေးတဲ့ အကြောင်းတရားလည်း မရှိဘူး။

ဒါဖြင့်ရင် မဂ္ဂရှစ်ပါးဟာ နိဗ္ဗာန်ရဲ့ အကြောင်းတရား မဟုတ်ဘူးလား။ မဂ္ဂင်ရှစ်ပါး ကျင့်ကြံပွားများမှ ဆင်းရဲငြိမ်းတာဆိုတော့ မဂ္ဂင်ရှစ်ပါးဟာ ဆင်းရဲငြိမ်းခြင်းဆိုတဲ့ နိဗ္ဗာန်ရဲ့ အကြောင်းတရားပေါ့လို့ စောဒကတက်စရာ ရှိပါတယ်။ အဖြေကတော့ မဂ္ဂင်ရှစ်ပါး ပွားများမှ ဆင်းရဲငြိမ်းတာ မှန်ပါတယ်။ ဒါကြောင့် မဂ္ဂင်ရှစ်ပါးဟာ နိဗ္ဗာန်ရဲ့ အကြောင်းတရားဆိုတာလည်း မှန်ပါတယ်။ သို့သော်လည်း မဂ္ဂင်ရှစ်ပါးပွားခြင်းက ဆင်းရဲငြိမ်းခြင်းကို ဖြစ်စေတာ မဟုတ်ပါဘူး။ မဂ္ဂင်ရှစ်ပါး ပွားခြင်းကြောင့် ဆင်းရဲငြိမ်းတဲ့ ဆင်းရဲမရှိတဲ့ သဘာဝကို ဆိုက်ရောက်သွားခြင်းသာ ဖြစ်ပါတယ်။ မီးရထားစီးသွားလို့ မူလကတည်းကရှိနေတဲ့ မန္တလေးမြို့ကြီးကို ရောက်သွားသလိုပါပဲ။

ဝိသုဒ္ဓိမဂ် (ဒု၊ ၁၄၀)မှာ “ပတ္တဗ္ဗမေဝ ဟေတံ မဂ္ဂေန၊ န ဥပ္ပါဒေတဗ္ဗံ = ဤ နိဗ္ဗာန်ကို မဂ်သည် ရောက်အပ်သည်သာလျှင် ဖြစ်၏။ ဖြစ်စေအပ်သည်ကားမဟုတ်ပေ။”လို့ မိန့်ဆိုထားပါတယ်။ ပိုရှင်းအောင် ပြောရရင် မဂ္ဂင်ရှစ်ပါးဟာ နိဗ္ဗာန်ကို ဖြစ်စေတဲ့ အကြောင်း (=ဇနကဟိတ်) မဟုတ်။ နိဗ္ဗာန်ကို ရောက်စေတဲ့အကြောင်း (=သမ္ပာပကဟိတ်)သာ ဖြစ်ပါတယ်။

ဒါကြောင့် နိဗ္ဗာန်ကို ဖြစ်စေတဲ့အကြောင်း မရှိလို့ နိဗ္ဗာန်ဟာ အဖြစ်တရား (သင်္ခတ) မဟုတ်။ အရှိတရား (အသင်္ခတ)သာ ဖြစ်ပါတယ်။ ဖြစ်တဲ့တရား မဟုတ်လို့ ပျက်လည်း မပျက်ပါဘူး။ ဒါကြောင့် ဓုဝံ =အမြဲရှိနေတဲ့ ဆင်းရဲငြိမ်းခြင်း သဘာဝကြီးပါ။ ဆင်းရဲမရှိဘဲ ဆင်းရဲငြိမ်းနေတဲ့ သဘာဝကြီးဟာ အရှိတရားဖြစ်သော်လည်းပဲ အဲဒီဆင်းရဲငြိမ်းတဲ့ သဘာဝကို ရဖို့ ဆိုက်ရောက်ဖို့ကတော့ ဖြစ်ပေါ်နေတဲ့ ရုပ်နာမ်ခန္ဓာ ဆင်းရဲငြိမ်းမှပဲ ရနိုင်ဆိုက်ရောက်နိုင် ပါတယ်။

အဲဒီ ရုပ်နာမ်ခန္ဓာ ဆင်းရဲငြိမ်းအောင် ဘယ်လိုလုပ်ရမလဲ။ အဲဒီ ဆင်းရဲရဲ့အကြောင်းကို ပယ်သတ်ရပါမယ်။ မီးခိုးကို မမြင်မတွေ့ချင်ရင် မီးခိုးရဲ့အကြောင်းဖြစ်တဲ့ မီးကို ငြိမ်းသတ်ရပါမယ်။ အဲဒီအတိုင်းပဲ ရုပ်နာမ်ခန္ဓာ ဆင်းရဲကို မလိုချင်ရင် အဲဒီ ဆင်းရဲရဲ့အကြောင်းကို ပယ်သတ်ရမှာပဲ။ ဒီရုပ်နာမ်ခန္ဓာ ဆင်းရဲရဲ့ အကြောင်းက လိုချင် တပ်မက် နှစ်သက် တွယ်တာမှု တဏှာလောဘပဲလို့ မြတ်စွာဘုရား မိန့်ကြားခဲ့ပါတယ်။ မှန်ပါတယ်။ တစုံတရာကိုလိုချင်ရင် ဆင်းရဲတော့တာပဲ။ ငွေလိုချင်ရင် ငွေလိုချင်စိတ်ကြောင့် ဆင်းရဲတယ်။ ကားလိုချင်ရင် ကားလိုချင်စိတ်ကြောင့် ဆင်းရဲတယ်။ အဝတ်အစား တစုံတခုကို တပ်မက်ရင်လည်း အဲဒီတပ်မက်စိတ်ကြောင့် ဆင်းရဲတယ်။ သူဌေးသူကြွယ်စတဲ့ ဘဝကောင်း ဘဝမွန်တွေကို လိုချင်ရင်လည်း အဲဒီလိုချင်စိတ်ကြောင့် ဆင်းရဲတယ်။ အဲဒီဆင်းရဲမှန်သမျှ ရုပ်ဆင်းရဲ နာမ်ဆင်းရဲချည်းပဲ။ ဒါကြောင့် ရုပ်နာမ်ခန္ဓာဆင်းရဲ ငြိမ်းချင်ရင် အကြောင်းဖြစ်တဲ့ လိုချင်တပ်မက်နှစ်သက် တွယ်တာမှု တဏှာလောဘကို ပယ်သတ်မှပဲ ဆင်းရဲငြိမ်းနိုင်မယ်။

ဆက်ပြောပါဦးမယ်။ ရုပ်အသစ် နာမ်အသစ်နဲ့ ဘဝသစ်တစ်ခု ဖြစ်တယ်ဆိုတာလည်း ဘဝဖြစ်ချင်တဲ့ တဏှာလောဘကြောင့် ဖြစ်တာပဲ။ ဘဝတစ်ခု ဖြစ်လာပြီဆိုလို့ရှိရင် ရုပ်အသစ် နာမ်အသစ်ဖြစ်လာတယ်။ ရုပ်နဲ့နာမ်ဖြစ်လာရင် ဆင်းရဲများသလား ချမ်းသာများသလား။ (ဆင်းရဲများပါတယ်ဘုရား။) ဆင်းရဲများတယ်။ သို့သော် သင်္ခါရဒုက္ခဆိုတဲ့ ဖြစ်ပျက်ဆင်းရဲအနေနဲ့ ဆိုရင်တော့ ဆင်းရဲချည်းပဲ။ ဟုတ်ကဲ့လား။ (ဟုတ်ပါတယ်ဘုရား။) ကျန်တဲ့ ဒုက္ခဒုက္ခ၊ ဝိပရိဏာမဒုက္ခ ဆိုတာတွေနဲ့ တွက်လို့ရှိရင်တော့ ဆင်းရဲများတယ်။ ချမ်းသာနည်းတယ်။ သေချာသလား။ (သေချာပါတယ်ဘုရား။) ဒီတော့ ဆင်းရဲများပြီးတော့ ချမ်းသာနည်းပါလျက်နဲ့ သတ္တဝါဟာ ဘဝတစ်ခု ဖြစ်ပြီးတော့ အသက်ရှင်ချင်မနေဘူးလား။ (ရှင်ချင်နေပါတယ်ဘုရား။)

ကဲ...မေးရဦးမယ်။ ဒီပရိသတ်ထဲ ဘယ်သူသေချင်သလဲ။ (ဘယ်သူမှ မသေချင်ပါဘုရား။) သေချင်သလား၊ ရှင်ချင်သလား။ (ရှင်ချင်ပါတယ်ဘုရား။) ရှင်ချင်တယ်ဆိုတာ ရုပ်နဲ့နာမ် နှစ်ခုတွဲပြီးတော့ အဆက်မပြတ် ဖြစ်ပျက် ဖြစ်ပျက် အစဉ်အတိုင်းဖြစ်နေတာ ပြောတာမဟုတ်လား။ (ဟုတ်ပါတယ် ဘုရား။)

အဲဒီတော့ ရှင်ချင်တယ်ဆိုတာ ရုပ်နာမ်နှစ်ခု ဆက်ပြီးတော့ ဖြစ်ပျက်နေတာကို ဆိုလိုတာ မဟုတ်လား။ (ဟုတ်ပါတယ်ဘုရား။) အဲဒီတော့ ဒီဘဝမှာ သေသွားတာကို ဘယ်သူလိုချင်မလဲ။ (ဘယ်သူမှ မလိုချင်ပါဘုရား။) ဒီတော့ အချို့က ပြောကောင်း ပြောမယ်။ “အမယ်လေး...ဆရာတော်၊ မကြာခင်က (၁၀)တန်း စာမေးပွဲကျကြတုန်းကလေ သေချင်တဲ့ လူတွေ အများကြီးဘုရား။ တပည့်တော်တို့ တားထားရတယ်” လို့။

ဒီတော့ တစုံတခုသော အဆင်မပြေမှုကြောင့် သေချင်တယ်ဆိုတဲ့ အဲဒီလူတွေ တကယ်သေချင်သလားဆိုတော့ အဲဒီဆင်းရဲနဲ့ တွေ့တဲ့ကြုံတဲ့ အခိုက်မှာတော့ သေချင်ပါလိမ့်မယ်။ ဒါပေမယ့် ‘ဒီလိုဆိုရင် ကြိုးဆွဲချသေမယ်’ဆိုပြီး ကြိုးကွင်းစွပ်လိုက်တဲ့ အခါကျတော့ ဘယ့်နှယ်...သူသေချင်စိတ် ရှိပါဦးမလား။ (မရှိပါဘုရား။) ဆန့်ငင် ဆန့်ငင် ဖြစ်နေတာ သေချင်လို့လား၊ မသေချင်လို့လား။ (မသေချင်လို့ပါ ဘုရား။) အဲဒီတော့ ရှင်ချင်လို့ မဟုတ်ပေဘူးလား။ (ဟုတ်ပါတယ် ဘုရား။) အဲဒီရှင်ချင်စိတ်ကြောင့် နောက်ဘဝအသစ် ရုပ်အသစ် နာမ်အသစ်ဆိုတဲ့ ရှင်မှုဖြစ်ရတာ။ စားချင်စိတ်ကြောင့် စားရတယ်။ ဝတ်ချင်စိတ်ကြောင့် ဝတ်ရတယ်၊ ဟုတ်တယ် မဟုတ်လား။ (ဟုတ်ပါတယ်ဘုရား။)

အသက်ရှင်ချင်စိတ်ကြောင့် ရှင်ရတယ်ဆိုတာ အဲဒါကိုပဲ စကားလုံးထွားထွားနဲ့ ပြောရရင် “ဘဝတဏှာကြောင့် ဘဝတစ်ခု ဖြစ်ရတယ်”လို့ ပြောရတယ်။ ရှင်ချင်စိတ်ကြောင့် ဘဝဖြစ်တယ်။ ဒီတော့ အဲဒီရှင်ချင်စိတ်ဟာ သမုဒယသစ္စာ။ ဟိုဘက်မှာ ဘဝအသစ် ရုပ်အသစ်နာမ်အသစ်ဖြစ်ပြီးတော့ ဆင်းရဲတွေ တွေ့နေတာဟာ ဘာတွေလဲ။ (ဒုက္ခသစ္စာပါ ဘုရား။) ဒုက္ခသစ္စာ။ အဲဒီတော့ သမုဒယသစ္စာကြောင့် ဒုက္ခဖြစ်တယ်။ ဒီတော့ ဆင်းရဲရဲ့ အကြောင်းတရားဟာဘာလဲ။ (သမုဒယသစ္စာ တဏှာလောဘပါဘုရား။) လိုချင်မှု၊ နှစ်သက်မှု၊ ချစ်ခင်မှု၊ တွယ်တာမှု၊ ဒါပဲ မဟုတ်လား။ (ဟုတ်ပါတယ်ဘုရား။)

ဒီတော့ လိုချင်တပ်မက်နှစ်သက်တွယ်တာခြင်းရဲ့ အကြောင်းတရားက ဘာလဲဆိုတော့ ဒါတွေကို ဆင်းရဲလို့ အမှန်အတိုင်းမသိတဲ့ အဝိဇ္ဇာပဲမဟုတ်လား။ (ဟုတ်ပါတယ်ဘုရား။) “အဲဒီ ရုပ်တရား နာမ်တရားတွေ ဖြစ်နေတာဟာ ဆင်းရဲပဲ”လို့ အမှန်အတိုင်း မသိတာ။ အဲဒါကို ‘အဝိဇ္ဇာ’လို့လည်းခေါ်တယ်။ ‘မောဟ’လို့လည်းခေါ်တယ်။ သူ့ကြောင့်ပဲ လိုချင်တပ်မက် နှစ်သက်တဲ့ တဏှာတွေ ဖြစ်တယ်။ ဒီတဏှာတွေနဲ့ လိုချင်တဲ့အခါကျတော့ အဲဒီ ဘဝအသစ်တွေ ဖြစ်လို့ ဆင်းရဲတယ်။ တစ်ခါ အဲဒီ ဘဝမှာလည်းပဲ ကားလိုချင်လို့ ကားဝယ်ဖို့ ငွေရှာရ၊ ကားရှာရနဲ့ ဆင်းရဲတွေ ဖြစ်ရတယ်။

စာမေးပွဲအောင်ချင်လို့ အမျိုးမျိုးကြိုးစားရတဲ့ ဆင်းရဲတွေ ဖြစ်တယ်။ “ဒီလိုဆို မအောင်ချင်ရဘူးလား ဘုရား”လို့ မေးရင် ..(အောင်ချင်ပါတယ်ဘုရား။) အောင်ချင်ရမှာပေါ့။ လောဘကိုပယ်မှ မပယ်နိုင်သေးတော့ လူ့ဘဝ အဆင်ပြေအောင်တော့ ဒီလောဘ ရှိသလောက်ရှိမှာပဲ။ ဒီတော့ လိုချင်တပ်မက် နှစ်သက်တွယ်တာမှု တဏှာသမုဒယသစ္စာဟာ ဆင်းရဲခြင်းရဲ့အကြောင်းပဲ။ သူ့ကြောင့်ဖြစ်ပေါ်တဲ့ ဆင်းရဲမှန်သမျှ ရုပ်ဒုက္ခ နာမ်ဒုက္ခအပါအဝင် လောကမှာတွေ့ရတဲ့ ဒုက္ခမှန်သမျှဟာ ဒုက္ခသစ္စာ=ဆင်းရဲ အမှန်တွေပဲ။

ဒါဖြင့်ရင် အဲဒီဆင်းရဲတွေ ဘယ်အခါ ငြိမ်းမလဲ။ အဲဒီ လိုချင်တပ်မက်တဲ့ တဏှာ မရှိတဲ့အခါမှာ ဆင်းရဲငြိမ်းမယ်။ မဟုတ်ဘူးလား။ (ဟုတ်ပါတယ်ဘုရား။) မသေချာဘူးလား။ (သေချာပါတယ်ဘုရား။) သေချာတယ်နော်။ တဏှာတစ်ခုမရှိရင် အဲဒီတဏှာကြောင့်ဖြစ်မယ့် ဆင်းရဲတစ်ခုငြိမ်းတာပဲ။

ကိုင်း....မေးမယ်။ ဟောဒီ ပရိသတ်မှာ ကျောင်းရှိသလား။ ကျောင်းဆိုတာ ဘုန်းကြီးကျောင်းပြောတာ။ ကိုယ်ပိုင်ဘုန်းကြီးကျောင်းရှိသလား။ (မရှိပါဘုရား။) မရှိရင် ငါ့ကျောင်းမှာ မိုးတွေများ စိုနေမလားဟဲ့၊ မိုးကလည်း ရွာတော့မယ်။ အဲဒီ စိုးရိမ်စိတ်ရှိပါ့မလား။ (မရှိပါဘူးဘုရား။) ဘာကြောင့်မရှိသလဲ။ (ကျောင်းမရှိလို့ပါဘုရား။) ကျောင်းမရှိတော့ ကျောင်းပေါ်မှာ တွယ်တာတပ်မက်တဲ့ တဏှာရှိသလား။ (မရှိပါဘုရား။) အဲဒီလို ကျောင်းပေါ်မှာ တွယ်တာတပ်မက်တဲ့ တဏှာငြိမ်းတော့ ကျောင်းနဲ့ပတ်သက်တဲ့ ဆင်းရဲမငြိမ်းဘူးလား။ (ငြိမ်းပါတယ်ဘုရား။) တဏှာငြိမ်းရင် ဆင်းရဲငြိမ်းတယ်။ ဟုတ်လား။ (ဟုတ်ပါတယ်ဘုရား။)

ဒါကြောင့် ဘုန်းကြီးများဆိုရင် ဘယ်သားဘယ်သမီးအတွက်မှ ဘုန်းကြီး ဆင်းရဲမဖြစ်ဘူး။ (ပရိသတ် ရယ်ကြသည်။) အမယ် ... မရယ်နဲ့လေ။ ဟုတ်တာ ပြောတာ။ ကဲ အဲဒါ ဘာကြောင့်လဲ။ သားသမီးမရှိတော့ သားသမီးကို တပ်မက်တဲ့ တဏှာရှိသလား။ (မရှိပါဘုရား။) အဲဒီတဏှာ မငြိမ်းဘူးလား။ (ငြိမ်းပါတယ်ဘုရား။) ဒီတဏှာငြိမ်းတော့ ဘုန်းကြီးမှာ သားသမီးနဲ့ ပတ်သက်တဲ့ ဆင်းရဲမငြိမ်းဘူးလား။ (ငြိမ်းပါတယ်ဘုရား။) အဲဒါ ထင်ရှားတဲ့ သာဓကတွေ မဟုတ်ပေဘူးလား။ (ဟုတ်ပါတယ်ဘုရား။)

ဒီတော့ တရားကျင့်ကြံ ပွားများ အားထုတ်လို့မို့ ရုပ်နဲ့နာမ်ကို သတိဦးစီးတဲ့ စိတ်နဲ့မပြတ် ရှုလို့ ရုပ်နာမ်ရဲ့သဘာဝအမှန်ကို သိပြီး အနိစ္စ၊ ဒုက္ခ၊ အနတ္တ လက္ခဏာတွေ သိမြင်တဲ့အခါ ဝိပဿနာဉာဏ်တွေ တဆင့်ထက်တဆင့် တက်သွားပြီး သောတာပတ္တိမဂ်ဉာဏ်ဖိုလ်ဉာဏ် ရတော့ ဒိဋ္ဌိနဲ့ ဝိစိကိစ္ဆာကိလေသာ ငြိမ်းတယ်။ သကဒါဂါမိမဂ်ဉာဏ်ဖိုလ်ဉာဏ်ရတော့ ကြမ်းတမ်းတဲ့ လောဘဒေါသ ကိလေသာတွေ ငြိမ်းတယ်။ အနာဂါမိမဂ်ဉာဏ်ဖိုလ်ဉာဏ် ရတော့ ကာမဘုံမှာ တွယ်တာ တပ်မက်တဲ့ လောဘနဲ့ ဒေါသအားလုံး ငြိမ်းတယ်။ အရဟတ္တမဂ်ဉာဏ်ဖိုလ်ဉာဏ်ရတော့ ကျန်တဲ့ကိလေသာအားလုံး အကြွင်းမဲ့ ငြိမ်းတယ်။

အဲဒီ ငြိမ်းတဲ့ ကိလေသာထဲမှာ အခုနက ပြောခဲ့တဲ့ မသိမှု အဝိဇ္ဇာရော၊ တပ်မက်မှု တဏှာရော ရှေ့ဆုံးက ပါတယ်။ မပါပေဘူးလား။ (ပါ,ပါတယ် ဘုရား။) မငြိမ်းနိုင်ဘူးလား။ (ငြိမ်းနိုင်ပါတယ်ဘုရား။) ငြိမ်းနိုင်တာကို ကျောင်းသူကျောင်းသား ဆရာ ဆရာမတွေမှာ ဘုန်းကြီးကျောင်းကို တပ်မက်တဲ့ တဏှာမရှိလို့ တဏှာငြိမ်းတာ သာဓက ပြခဲ့တယ်။ ဘုန်းကြီးမှာ သားသမီးကို တပ်မက်တဲ့ တဏှာငြိမ်းတာကို သာဓက ပြခဲ့တယ်။ တဏှာဆိုတာ ငြိမ်းနိုင်တယ်။ ငြိမ်းအောင် လုပ်လို့ရှိရင် ငြိမ်းနိုင်တယ်။ ဒါကို ပြောချင်တာပါ။

ဒီမှာလည်းပဲ အရဟတ္တမဂ်ဉာဏ်နဲ့ အရိယသစ္စာကို အမှန်အတိုင်း သိမြင်တဲ့ အခါကျတော့ ဘာကိလေသာ ဘာအဝိဇ္ဇာ ဘာတဏှာမှ မရှိတော့ဘူး။ ကိလေသာအားလုံး အမြစ်မကျန် (အနုသယပါ) ငြိမ်းကုန်ကြတယ်။ ဒိဋ္ဌိလည်းမရှိတော့ဘူး။ ကိလေသာတွေ အကုန်လုံး ငြိမ်းသွားကြပြီ။

ဒီတော့ ဆင်းရဲရဲ့ အကြောင်းဖြစ်တဲ့ တွယ်တာတပ်မက်မှု တဏှာငြိမ်းတဲ့ အခါကျတော့ ဒီရဟန္တာပုဂ္ဂိုလ်မှာ ဘာဆင်းရဲ ရှိဦးမလဲ။ (ဘာဆင်းရဲမှ မရှိပါဘုရား။) မရှိတော့ဘူး။ သို့သော် အဲဒီရဟန္တာပုဂ္ဂိုလ်မှာ ရုပ်ခန္ဓာ နာမ်ခန္ဓာတော့ ကျန်မနေဘူးလား။ (ကျန်နေပါတယ်ဘုရား။) ကျန်နေတော့ ရုပ်နာမ်တို့ရဲ့ ဖြစ်ပျက်မှု သင်္ခါရဒုက္ခဆိုတာတော့ မရှိဘူးလား။ (ရှိပါတယ် ဘုရား။)

ဒါကြောင့် အဲဒီ ရဟန္တာရတဲ့ အာရုံပြုတဲ့ ဆင်းရဲငြိမ်းမှုသဘော = နိဗ္ဗာန်ကို ရုပ်နာမ်ခန္ဓာ အကြွင်းအကျန်ရှိတဲ့နိဗ္ဗာန်=သဥပါဒိသေသနိဗ္ဗာန်လို့ ခေါ်တယ်။ အဲဒါဟာ ဒီဘဝတင်ပဲ ရနိုင်တဲ့ နိဗ္ဗာန်ပဲ။ ဒီတော့ လုပ်ရင် မရဘူးလား။ (ရပါတယ်ဘုရား။) ရတယ်။ ဒါပေမယ့် သင်္ခါရဒုက္ခဆိုတဲ့ ရုပ်နာမ်ခန္ဓာရဲ့ ဖြစ်မှုပျက်မှု ကျန်နေသေးတယ်။

အဲဒီ ရဟန္တာပရိနိဗ္ဗာန်စံပြီးတဲ့အခါကျတော့ ရှင်ချင်တယ်ဆိုတဲ့ တဏှာမရှိတော့တဲ့ အတွက် နောက်ဘဝမှာ အသက်ရှင်မှုဆိုတဲ့ ရုပ်သစ်နာမ်သစ် ပြန်ဖြစ်ဦးမလား။ (မဖြစ်တော့ပါ ဘုရား။) မဖြစ်တော့ ရုပ်ခန္ဓာ နာမ်ခန္ဓာမှာရှိတဲ့ သင်္ခါရဒုက္ခဆိုတဲ့ ဆင်းရဲကော ရှိသေးသလား။ (မရှိပါဘုရား။) မရှိတော့ ဒီဆင်းရဲအားလုံး ငြိမ်းမသွားဘူးလား။ (ငြိမ်းသွားပါတယ်ဘုရား။) အဲဒါကို အနုပါဒိသေသနိဗ္ဗာန်လို့ ခေါ်တယ်။ ရုပ်နာမ်ခန္ဓာ အကြွင်းအကျန် မရှိတော့ဘဲ လုံးဝ ငြိမ်းသွားတဲ့ နိဗ္ဗာန်ပဲ။

ဒီတော့ “ဒီနေရာမှာ ဘာမှမရှိတာကိုများ နိဗ္ဗာန်ခေါ်ရသလား”လို့ဆိုတော့ မဟုတ်ဘူး၊ ရှိတယ်။ ဘာရှိတာလည်းဆိုတော့ ဆင်းရဲငြိမ်းတဲ့ သဘာဝကြီး ရှိနေတယ်။ မဟုတ်ဘူးလား။ (ဟုတ်ပါတယ်ဘုရား။) ဆင်းရဲငြိမ်းတဲ့ သဘာဝ ရှိမနေဘူးလား။ (ရှိနေပါတယ်ဘုရား။) ဒါဖြင့် ရှိတာလား၊ မရှိတာလား။ (ရှိတာပါဘုရား။) ဘာရှိတာလဲ။ (ဆင်းရဲငြိမ်းတဲ့ သဘာဝ ရှိတာပါဘုရား။) ဆိုကြပါစို့။ ဒီမှာ မီးတောက်နေတယ်။ မီးပုံကြီး မီးတောက်နေတဲ့အခါကျတော့ “ဟဲ့ ... မီးတွေ တောက်နေတယ်။ ငြိမ်းလိုက်စမ်း”လို့ ခိုင်းတော့၊ ငြိမ်းပစ်လိုက်တယ်။ ဘာရှိသေးသလဲ။ (ဘာမှ မရှိပါဘုရား။) ရှိတယ်။

မီးငြိမ်းတဲ့ သဘာဝမရှိဘူးလား။ (ရှိပါတယ်ဘုရား။) မီးရှိတုန်းက မပူဘူးလား။ (ပူပါတယ်ဘုရား။) အခု မီးငြိမ်းသွားတဲ့အခါကျတော့ ပူသေးလား။ (မပူတော့ပါဘုရား။) အဲဒီတော့ အပူငြိမ်းတဲ့ သဘာဝ မရှိဘူးလား။ (ရှိပါတယ်ဘုရား။) အဲဒီအတိုင်းပဲ ရုပ်ဒုက္ခ နာမ်ဒုက္ခ သင်္ခါရဒုက္ခပါ မရှိတဲ့အခါကျတော့ အဲဒီသင်္ခါရဒုက္ခ သင်္ခါရဆင်းရဲပါ ငြိမ်းနေတဲ့ သဘာဝကြီးရှိနေတယ်။ အဲဒါကို နိဗ္ဗာန်ခေါ်တယ်။

ရဟန္တာ ပရိနိဗ္ဗာန်စံတဲ့အခါ ရုပ်နာမ်ခန္ဓာအားလုံး အဖြစ်ရပ်သွားတာနဲ့ နောက်ထပ် ရုပ်နာမ်အသစ်မဖြစ်ပေါ်တော့ဘဲ အဲဒီဆင်းရဲငြိမ်းတဲ့ မူလသဘာဝကြီးကို ဆိုက်ရောက်သွား တာပဲ။ အဲဒါ အနုပါဒိသေသနိဗ္ဗာန်ပဲ။ အဲဒါဟာ နိဗ္ဗာန်ချမ်းသာပါပဲ။ လောကီစည်းစိမ်ချမ်းသာလို ခံစားရတဲ့ ချမ်းသာတော့ မဟုတ်ဘူး။ ဆင်းရဲငြိမ်းနေလို့ ဆင်းရဲမရှိလို့ ချမ်းသာလို့ ခေါ်ရတဲ့ သန္တိသုခ=ငြိမ်းအေးချမ်းသာပဲ။ ခံစားရတဲ့ ချမ်းသာမဟုတ်ဘူး။ ချမ်းသာခံစားရရင် မကြာခင် ဆင်းရဲက ပေါ်လာဦးမှာပဲ။ ပြီးတော့ ခံစားရတဲ့ ချမ်းသာ =ဝေဒယိတသုခဟာ ဖြစ်မှုပျက်မှု ရှိနေတော့ ချမ်းသာစစ် မဟုတ်ဘူး။ သင်္ခါရဒုက္ခပဲ။ ဒါကြောင့် ဆင်းရဲ လုံးဝငြိမ်းနေတဲ့ သန္တိသုခ=ငြိမ်းအေးခြင်း ချမ်းသာမှသာ ချမ်းသာစစ် ချမ်းသာမှန်ပဲ။

ဒီတော့ “ဒီလိုဆိုရင် ဘုရား၊ ဘာမှ မရှိတာကြီး လို့ တပည့်တော်တို့ မြင်နေပါတယ်။ မလိုချင်ပါဘူး”လို့များ စိတ်ထဲမှာ ဖြစ်မိရင် ဒီလို စဉ်းစားကြည့်ပါ။ လူတစ်ယောက် ကင်ဆာရောဂါ ဖြစ်နေတယ်။ အော်ဟစ် ညည်းညူနေရတယ်။ ဝေဒနာက သိပ်ပြင်းထန်နေတယ်။ ဆရာဝန်တွေလည်း ကုပါရဲ့။ ဓာတ်လည်း ကင်ပါရဲ့။ ဒါပေမယ့် ရောဂါဝေဒနာက ပြင်းထန်တော့ မသက်သာဘူး။ တအော်အော် တအင်အင်နဲ့ နေရတယ်။ နေ့လည်း အော်၊ ညလည်း အော်နဲ့။

အဲဒါ ဆင်းရဲလား၊ ချမ်းသာလား။ (ဆင်းရဲပါဘုရား။) ဒီဆင်းရဲ ကြိုက်သလား၊ မကြိုက်ဘူးလား။ (မကြိုက်ပါဘုရား။) မကြိုက်တာ သေချာလား။ (သေချာပါတယ်ဘုရား။) ဒါဖြင့် အဲဒီဆင်းရဲငြိမ်းအောင် ဘယ်လိုလုပ်မလဲ။ အခက်သားပဲနော်။ ဘုန်းကြီး Newsweek မဂ္ဂဇင်းထဲမှာတွေ့တယ်။ အနောက်နိုင်ငံများမှာတော့ ကင်ဆာရောဂါ ပျောက်တဲ့နှုန်းဟာ အားရစရာ ကောင်းလောက်အောင် တိုးတက်လာပါပြီတဲ့။ အဲဒါ သုတေသနတွေရဲ့ ဆေးကောင်းဝါးကောင်းတွေကြောင့် တိုးတက်လာပါပြီတဲ့။ ဒါကြောင့် အခုကင်ဆာရောဂါဟာ စောစောသိရင် ပျောက်နိုင်ပြီတဲ့။

ဒါပေမယ့် အခု ဒီလူမမာကတော့ ဝေဒနာ အင်မတန် ပြင်းထန်နေလို့မို့ အလွန့်ကို နာနေကိုက်နေတယ်။ ကိုင်း ညလည်း မအိပ်ရ၊ နေ့လည်း မအိပ်ရနဲ့ အအိပ်ကလည်းပျက်။ နာတာ ကျင်တာကလည်း ပြင်းထန်နဲ့။ ဆင်းရဲလိုက်တာ လွန်ရော။ ငါ့နှယ် သေတာ ကောင်းပါရဲ့လို့ ခဏခဏ သေပစ်လိုက်ချင်စိတ် ပေါ်နေတယ်။ အဲဒီလို မစဉ်းစားမိပေဘူးလား။ (စဉ်းစားမိပါတယ်ဘုရား။) စဉ်းစားမိတယ်။ ဒါပေမယ့် တကယ်သေပါဆိုရင် သူသေဝံ့ပါ့မလား။ (မသေဝံ့ပါဘုရား။) မသေဝံ့လို့ ဆေးတွေကုနေတာပေါ့။ မဟုတ်ဘူးလား။ (ဟုတ်ပါတယ် ဘုရား။) ဒီတော့ ဆရာဝန်က ကဲလေ ဒီလောက်တောင်မှ ခံစားနေရတာ ဒီနေ့ညတော့ ချမ်းသာရစေမယ်ပေါ့ဆိုပြီးတော့ ကုပေးလိုက်တယ်။ ဘယ်လို ကုပေးသလဲဆိုရင် အားကောင်းတဲ့ အိပ်ဆေးထိုးပေးလိုက်တယ်။ အိပ်ဆေးထိုးပြီးလို့ နာရီဝက်လောက် ကြာတော့ အိပ်ပျော်သွားရော။ ည (၁၀) နာရီလောက်ကနေ နှစ်နှစ်ခြိုက်ခြိုက်ကြီး အိပ်လိုက်တာ နံနက် ၈နာရီလောက်ကျမှ နိုးတယ်။ အဲဒီ အိပ်ပျော်နေတုန်းမှာ သူဆင်းရဲကို သိသလား။ (မသိပါဘုရား။) မသိဘူးနော်။ အဲဒီအိပ်ပျော်နေတဲ့အချိန်မှာ သူခံစားနေရတဲ့ ဆင်းရဲ ငြိမ်းမနေပေဘူးလား။ (ငြိမ်းနေပါတယ်ဘုရား။) ငြိမ်းနေတယ်နော်။ ဒါပေမယ့် ဘာတော့ ခံစားနေရသလဲ။ (ဘာမှ မခံစားရပါဘုရား။) ဘာမှ မခံစားရဘူးလား။ (မခံစားရပါဘုရား။) ကောင်းတာဆိုလို့ ဘာမှတော့ မခံစားရဘူး။ သို့သော် ဆင်းရဲကတော့ ငြိမ်းနေတယ်။ ဆင်းရဲငြိမ်းတဲ့ သဘာဝထဲတော့ ဆိုက်ရောက်မနေဘူးလား။ (ဆိုက်ရောက်နေပါတယ် ဘုရား။) နံနက် (၈)နာရီမှာ နိုးလည်းလာရော၊ နိုးလာတာနဲ့ တပြိုင်နက်တည်း အနာက နာလာတာပဲ။ အမေရယ် အဘရယ်နဲ့ အော်နေရတယ်။ ပြန်ဆင်းရဲပြန်တာပဲ။

ကိုင်း စဉ်းစားကြည့်။ အဲဒီ ဆင်းရဲနေတဲ့ လူမမာ တောက်လျှောက်ကြီးသိလျက် ဆင်းရဲနေတာကို သူကြိုက်မလား။ ဒါမှမဟုတ် ခံစားမှုမရှိဘဲ ဆင်းရဲငြိမ်းနေတာကို သူကြိုက်မလား။ (ခံစားမှုမရှိဘဲ ဆင်းရဲငြိမ်းနေတာကို သူကြိုက်ပါတယ်ဘုရား။) အဲဒီလိုဆိုရင် ခံစားမှုမရှိဘဲ ဆင်းရဲငြိမ်းတဲ့သဘောဟာ မလိုလားအပ်ဘူးလား။ (လိုလားအပ်ပါတယ်ဘုရား။)

အဲဒါ ဘုန်းကြီး ဥပမာ ပြောတာ။ ခုနက အနုပါဒိသေသနိဗ္ဗာန်ဆိုတာ အဲဒါမျိုးပဲ။ ခံစားမှု မရှိဘဲ ဆင်းရဲခပ်သိမ်းအပြီးသတ် ငြိမ်းနေတဲ့သဘောပဲ။ ဆင်းရဲငြိမ်းတော့ ချမ်းသာရနေတာ ပေါ့။ ခံတော့မခံစားရဘူး။ ဝေဒယိတသုခ = ခံစားရတဲ့ ချမ်းသာမရှိဘူး။ သန္တိသုခ= ငြိမ်းချမ်းသာပဲ ရှိတယ်။

ဒီတော့ နောက်တစ်ခုက နိဗ္ဗာန်ဆိုတာ ဘယ်မှာရှိပါသလဲ။ ကောင်းကင်မှာ ရှိပါသလားတဲ့။ ကိုင်း ... ဘယ်မှာ ရှိတယ်လို့ ပြောရမလဲ။ ဆင်းရဲတာ ဘာရှိလို့ ဆင်းရဲနေသလဲ။ (ရုပ်နဲ့နာမ်ရှိလို့ ဆင်းရဲနေပါတယ်ဘုရား။) ရုပ်နဲ့နာမ် ခန္ဓာကိုယ်နဲ့စိတ်ရှိလို့ ဆင်းရဲနေတာ မဟုတ်လား။ (ဟုတ်ပါတယ် ဘုရား။)

အဲဒီတော့ ရုပ်နဲ့နာမ် ခန္ဓာကိုယ်နဲ့စိတ် နှစ်ခုရှိတဲ့အနက်က နာမ်ထဲက ဆင်းရဲကို ဖြစ်စေတဲ့ အဝိဇ္ဇာတဏှာ အစရှိတဲ့ ကိလေသာတွေ ငြိမ်းသွားရင်ပဲ မချမ်းသာဘူးလား။ (ချမ်းသာပါတယ်ဘုရား။)

တဝက်မက ချမ်းသာသွားပြီ။ အများကြီး ချမ်းသာသွားပြီ။ ဆယ်ပုံပုံရင် ကိုးပုံ ချမ်းသာသွားပြီ။ တစ်ပုံပဲ ကျန်တော့တယ်။ ဒီတော့ အဲဒီကိလေသာငြိမ်းလို့မို့ ဆင်းရဲငြိမ်းတာဟာ ကောင်းကင်မှာ ရှိတာလား။ မြေကြီးထဲမှာ ရှိတာလား။ ဗြဟ္မာ့ဘုံမှာလား၊ နတ်ဘုံမှာလား။ ကိုင်း ဘယ်မှာရှိလဲ။ (ဘယ်မှာမှ မရှိပါဘုရား။)

အဲဒီ ကိလေသာငြိမ်းတဲ့ ပုဂ္ဂိုလ်ရဲ့ သန္တာန်မှာ မရှိပေဘူးလား။

(ရှိပါတယ် ဘုရား။)

ဒါဖြင့် နိဗ္ဗာန် ဘယ်မှာလဲ။

(ခန္ဓာကိုယ်မှာပါ ဘုရား။)

ဟုတ်ကဲ့လား။

(ဟုတ်ပါတယ်ဘုရား။)

မြတ်စွာဘုရား လက်ထက်တော်အခါက တစ်ချိန်မှာ ရောဟိတဿနတ်သားက မြတ်စွာဘုရားကို ဒီလို လျှောက်ဖူးတယ်။ မြတ်စွာဘုရား၊ တပည့်တော်ဟာ ရှေးဘဝတစ်ခုမှာ အလွန်တန်ခိုးကြီးတဲ့ ရသေ့ဖြစ်ခဲ့ပါတယ်။ ကျွမ်းကျင်တဲ့ လေးသမား ပစ်လွှတ်လိုက်တဲ့ မြားတစ်စင်း ထန်းပင်ရိပ်တစ်ခုကို ကျော်လွန်တဲ့အချိန်နှင့် တပည့်တော် စကြာဝဠာတစ်ခု ဖြတ်ကျော်တဲ့အချိန် ညီမျှသည်အထိ လျင်မြန်လှတဲ့အဟုန် ရှိခဲ့ပါတယ်။ အဲဒီလောက် တပည့်တော် အသွားလျင်မြန်ခဲ့ပါတယ်။

အဲဒီလောက် အသွားလျင်မြန်လှတဲ့ တပည့်တော်ဟာ စကြာဝဠာအနန္တရှိတဲ့ လောကကြီးရဲ့ အဆုံးကို ရောက်ချင်တဲ့အတွက် ဆွမ်းခံချိန်၊ စားချိန်၊ သောက်ချိန်၊ အနည်းငယ်မျှဖြစ်တဲ့ အနားယူချိန်၊ တပိုတပါး သွားချိန်မှတပါး အချိန်ပြည့် နှစ်ပေါင်းတစ်ရာလုံးလုံး အဲဒီလောက်လျင်မြန်တဲ့ အဟုန်နဲ့ လောကကြီးရဲ့ အဆုံးကို သွားခဲ့ဖူးပါတယ်။ သို့သော်လည်း လောကကြီးရဲ့ အဆုံးကို မရောက်မီ လမ်းမှာပဲ သေဆုံးခဲ့ရပါတယ်။ အဲဒီလို လျှောက်ထားပါတယ်။

ဒီတော့ မြတ်စွာဘုရားက မအိုမနာ မသေရာဖြစ်တဲ့ လောကရဲ့ အဆုံးကို သွားခြင်းဖြင့် မရောက်နိုင်ကြောင်း မိန့်တော်မူပြီးတော့ ဒီလို မိန့်တော်မူပါတယ်။ “ဣမသိံ္မယေဝ ဗျာမမတ္တေ ကဠေဝရေ သသညိမှိ သမနကေ လောကဉ္စ ပညပေမိ လောကသမုဒယဉ္စ လောကနိရောဓဉ္စ လောကနိရောဓဂါမိနိဉ္စ ပဋိပဒံ” ခု ရွတ်ပြခဲ့တဲ့ ရောဟိတဿသုတ်မှာ မြတ်စွာဘုရား မိန့်ကြားတော်မူတာက စိတ်ရှိတဲ့ တစ်လံမျှလောက်သော ခန္ဓာကိုယ်မှာပဲ လောကကို ငါဘုရား ဟောတော်မူတယ်တဲ့။ (ဒုက္ခသစ္စာကို ဆိုလိုပါတယ်။)

လောကဖြစ်ခြင်းရဲ့ အကြောင်းလည်း ဒီခန္ဓာကိုယ်မှာပဲတဲ့။ (သမုဒယသစ္စာ= တဏှာကို ဆိုလိုပါတယ်။) ရုပ်နာမ်ဆိုတဲ့ လောကချုပ်ငြိမ်းတာလည်း ဒီခန္ဓာကိုယ်မှာပဲတဲ့။ (ဒါ ဆင်းရဲချုပ်ငြိမ်းခြင်း = နိရောဓသစ္စာကို မိန့်တော်မူတာပါ။)

အဲဒီလောက ချုပ်ငြိမ်းအောင်ကျင့်တဲ့ အကျင့်လမ်းမှန်လည်း ဒီခန္ဓာကိုယ်မှာပဲတဲ့။ (မဂ္ဂင်ရှစ်ပါး မဂ္ဂသစ္စာတရားကို ဆိုလိုပါတယ်။)

ဒီတော့ ဆင်းရဲငြိမ်းခြင်းဆိုတဲ့ နိဗ္ဗာန် ဘယ်မှာရှိသလဲ။

(ခန္ဓာကိုယ်မှာ ရှိပါတယ်ဘုရား။)

အဲဒီတော့ နိဗ္ဗာန် ဘယ်မှာလဲ။

(ခန္ဓာကိုယ်မှာပါဘုရား။)

ကောင်းကင်မှာလား။

(မဟုတ်ပါဘုရား။)

မြေကြီးထဲမှာလား။

(မဟုတ်ပါဘုရား။)

သေချာရဲ့လား။(သေချာပါတယ်ဘုရား။) နားလည်ပြီနော်။

သို့သော်လည်း ပြောစရာက နည်းနည်း ကျန်နေပါသေးတယ်။ အခုပြောခဲ့တဲ့ ရောဟိတဿသုတ်မှာ လောကဆိုတာ ရုပ်နဲ့နာမ်ပါပဲ။ အဲဒီရုပ်နဲ့နာမ်ဟာ ဒုက္ခသစ္စာတရားပါပဲ။ ဒီတော့ လောကဆိုတာ ဒုက္ခကိုပဲ ရှင်တော်မြတ်ဘုရား မိန့်ကြားတော်မူတာ ဖြစ်ပါတယ်။ ဒီတော့ ဒီဒေသနာတော်အရ ဒုက္ခ၊ သမုဒယ၊ နိရောဓ၊ မဂ္ဂဆိုတဲ့ သစ္စာလေးပါးဟာ ခန္ဓာကိုယ်မှာ ရှိတယ်လို့ နားလည်ရပါတယ်။

ဒုက္ခသစ္စာကတော့ သတ္တဝါတိုင်းရဲ့ ခန္ဓာကိုယ်မှာ ရှိပါတယ်။ သမုဒယသစ္စာကတော့ ဘုရား ရဟန္တာတို့ရဲ့ ခန္ဓာကိုယ်မှာ မရှိပါဘူး။ တခြား သတ္တဝါများရဲ့ ခန္ဓာကိုယ်မှာသာ ရှိပါတယ်။ မဂ္ဂသစ္စာကတော့ ဝိပဿနာရှုဆဲ ပုဂ္ဂိုလ်များရဲ့ ခန္ဓာမှာ ပုဗ္ဗဘာဂမဂ်ရှိပြီး အရိယာပုဂ္ဂိုလ်တို့ရဲ့ မဂ်ဖိုလ်အခိုက်မှာ အရိယမဂ် ရှိပါတယ်။ မြတ်စွာဘုရားကတော့ ယထာလာဘ = ရသင့်သလို ယူဖို့ရာ ပေါင်းပြီး ဟောတော်မူခဲ့ခြင်း ဖြစ်ပါတယ်။ နိရောဓသစ္စာ = ဆင်းရဲငြိမ်းခြင်း အမှန်တရား = နိဗ္ဗာန်။ ဒီသစ္စာလည်း တစ်လံမျှလောက်သော ခန္ဓာကိုယ်မှာ ရှိတယ်လို့ ဟောတော်မူတော့ နိဗ္ဗာန်ရဲ့ တည်ရာဟာ ခန္ဓာကိုယ်ပဲလို့ ဆိုရာ ရောက်နေပါတယ်။

ဒါကြောင့် နိဗ္ဗာန်ဟာ တည်ရာ မရှိတဲ့တရား မဟုတ်၊ တည်ရာရှိတဲ့ တရားလို့ ယူဆစရာ ဖြစ်ပါတယ်။ တကယ်တော့ ဒီဒေသနာတော်ဟာ မုချဒေသနာတော် မဟုတ်ပါဘူး။ တင်စားပြီး ဟောတော်မူတဲ့ ဥပစာဒေသနာတော်သာ ဖြစ်ပါတယ်။ လောင်နေတဲ့ မီး ငြိမ်းသွားတဲ့အခါ “မီးဘယ်မှာ ငြိမ်းသလဲ”လို့ မေးရင် “ဟိုမှာငြိမ်းတယ်”လို့ မီးလောင်ပြီးရာ နေရာကို လက်ညှိုးထိုးပြရသော်လည်း တကယ်တော့ မီးငြိမ်းသွားမှုကို မြင်ရတွေ့ရတာ မဟုတ်ပါဘူး။ မီးငြိမ်းသွားမှု၊ မီးမရှိဘဲ ဖြစ်နေမှုကို မမြင်ရ မတွေ့ရလို့ ဘယ်နေရာမှာ ငြိမ်းတယ်လို့ လက်ညှိုးထိုး ပြောလို့ မရပါဘူး။ မီးငြိမ်းတယ်ဆိုတာ မကြာမီကလေးက ရှိနေတဲ့ မီး၊ အခု မရှိဘဲ ဖြစ်သွားတာကိုပဲ ငြိမ်းတယ်လို့ ပြောကြရတာဖြစ်တော့ မီးငြိမ်းတာကို ပြောချင်ရင် မကြာမီက မီးရှိခဲ့တဲ့နေရာကိုပဲ မီးငြိမ်းတဲ့ နေရာလို့ တင်စား ပြောကြရပါတယ်။

အဲဒီအတိုင်းပဲ ရုပ်နာမ်ခန္ဓာ ရှိနေသမျှတော့ ဆင်းရဲ မငြိမ်းနိုင်ဘူး။ ရုပ်နာမ်ခန္ဓာ ချုပ်ငြိမ်းပြီး နောက်ထပ် မဖြစ်ပေါ်တော့မှဘဲ ဆင်းရဲ လုံးဝငြိမ်းသွားတယ်။ ဆင်းရဲငြိမ်းမှုဟာ ဆင်းရဲအမှန်ဖြစ်တဲ့ ရုပ်နာမ်ခန္ဓာနဲ့ ဆက်စပ်နေတယ်။ ဒါကြောင့် ဆင်းရဲငြိမ်းခြင်းဆိုတဲ့ နိဗ္ဗာန်ကို ဆင်းရဲမငြိမ်းမီက ရှိနေတဲ့ ရုပ်နာမ်ခန္ဓာမှာ ရှိတယ်လို့ တင်စားပြီး မြတ်စွာဘုရား ဟောတော်မူတာ ဖြစ်ပါတယ်။

နောက်ပြီးတော့ နိဗ္ဗာန်နှင့် ပတ်သက်လို့ “ရွှေပြည်နိဗ္ဗာန် ဝင်စံတော်မူသည်”လို့ သုံးနှုန်းတဲ့ အရာမှာလည်း တင်စားမှုပါပဲ။ နိဗ္ဗာန်ဟာ တည်နေရာ တိုင်းကြီး ပြည်ကြီး မဟုတ်ပါဘူး။ ရွှေပြည်တော်ကြီးဟာ ရောက်ချင်နေချင်စရာ သာယာစည်ကားသလို နိဗ္ဗာန = အငြိမ်းဓာတ်ကြီးဟာလည်း ဆင်းရဲလုံးဝမရှိလို့ ရချင် ရောက်ချင်စရာ မျက်မှောက်ပြုချင်စရာ ကောင်းလှကြောင်း အတူပြုပြီး တင်စား သုံးနှုန်းတာပါပဲ။ သဒိသူပစာ လို့ ခေါ်ပါတယ်။

သို့သော် ဒီနေရာမှာ တစ်ခုတော့ သတိပြုရလိမ့်မယ်။ မဟာယာနဗုဒ္ဓဘာသာရဲ့ ဂိုဏ်းခွဲတစ်ခုဖြစ်တဲ့ သုခဝတီဗျူဟာဂိုဏ်းကတော့ အနောက်ဘက် ကောင်းကင်မှာ အလွန်သာယာလှတဲ့ နိဗ္ဗာန်ရွှေပြည်ကြီး ရှိတယ်လို့ ယူဆပါတယ်။ သုခဝတီနိဗ္ဗာန်လို့ ခေါ်ပါတယ်။ အဲဒီနိဗ္ဗာန်မှာ ပရိနိဗ္ဗာန်စံတော်မူပြီးတဲ့ ရှေးရှေး ရှင်တော်မြတ်ဘုရားများ ချမ်းသာစွာ စံတော်မူလျက်ရှိကြောင်း ယူဆပါတယ်။ အဲဒါ ဘုန်းကြီးတို့ ထေရဝါဒဗုဒ္ဓဘာသာနဲ့ မသက်ဆိုင်ပါဘူး။ နောက်တစ်ခုက လွန်ခဲ့တဲ့(၂၅)နှစ်လောက်က အငြိမ်းစား တရားလွှတ်တော်ချုပ် တရားသူကြီးတစ်ယောက်က ဘုန်းကြီးကို မေးဖူးတာ ရှိပါတယ်။

သူက ရှေးဆရာတော်ကြီးများ ပြုစုတော်မူကြတဲ့ ကျမ်းဂန်တွေမှာ သင်္ခတဓာတ်မှ အသင်္ခတဓာတ်သို့ ရောက်သွားတယ်ဆိုတဲ့ အဓိပ္ပာယ်ကို ဖတ်ရ မှတ်ရပါတယ်။ နိဗ္ဗာန်ဟာ အသင်္ခတဓာတ်ဆိုတော့ ပထဝီစတဲ့ ဓာတ်ကြီးများလို ရုပ်ဓာတ်ပါလား။ ဒါမှမဟုတ် ဝိညာဏဓာတ်လို နာမ်ဓာတ်ပါလားလို့ မေးပါတယ်။ မေးလည်း မေးစရာပါပဲ။ နိဗ္ဗာန်ဟာ ရုပ်ဓာတ်လည်း မဟုတ်။ စိတ်စေတသိက်လို နာမ်ဓာတ်လည်း မဟုတ်ပါဘူး။ (ဤနေရာ၌ ‘နာမ်ဓာတ်လည်း မဟုတ်ဘူး’ဆိုသည်မှာ ‘စိတ်,စေတသိက်တို့ကဲ့သို့ အာရုံသို့ညွတ်တတ်သော နာမ်မဟုတ်ဟု ဆိုလိုပါသည်။ မိမိသို့ အာရမ္မဏိကတရားတို့ကို ညွတ်စေတတ်သောကြောင့် နာမ်မည်၏ဟူသော ဝစနတ္ထအရမူ နိဗ္ဗာန်ကို နာမ်တရား၌ သွင်းယူရပါသည်။) ဓာတု =ဓာတ်ဆိုတာ သဘာဝတရားကို ဆိုလိုပါတယ်။ ဒါကြောင့် အသင်္ခတဓာတ်ဆိုတာ အသင်္ခတ သဘာဝ = အကြောင်းကြောင့် ဖြစ်တာမဟုတ်ဘဲ မူလကတည်းကရှိနေတဲ့ အရှိသဘာဝ တရားလို့ ဆိုလိုတာပါပဲ။ ကဲ ဒါလောက်ဆိုရင် နိဗ္ဗာန်မေးခွန်းရဲ့ အဖြေ တော်သင့်လောက်ပါပြီ။

“ချမ်းမြေ့ဆရာတော်ဘုရားကြီး၏ “တက္ကသိုလ်ဓမ္မသဘင်” မှ အမေးအဖြေကို လူသားများ သိသင့်သိထိုက်သည့်အရာများမို့ ဖော်ပြပေးလိုက်ခြင်း ဖြစ်သည်။