သားဖြစ်သူရဲ့ တရားဓမ္မများနဲ့ ကျေးဇူးဆပ်မှု၊ သူတို့ဖြစ်ချင်တာကို ဖြစ်အောင်လုပ်ပေးမှုတို့ကြောင့် အဖေဖြစ်သူရော၊ အဖေဖြစ်သူပါ တရားဓမ္မများကို နားလည်လာကြပြီး သူတို့ကိုယ်တိုင် တရားသိ၊ တရားရအောင်ဆိုပြီး ဦးဇင်းရေးထားတဲ့ မိဘကျေးဇူးဆပ်တဲ့ အမေအတွက် ဆောင်းပါး၊ အဖေ့အတွက် ဆောင်းပါးများကို ဖတ်ရပြီးတဲ့နောက်မှာ မိဘများဟာ တစ်ခါမှမ၀င်ဘူးတဲ့ ရိပ်သာကို တရားစခန်းဝင်ရောက် အားထုတ်နေကြတယ်ဆိုတာ ကြားသိရလို့ သားဖြစ်သူမှာလည်း ၀မ်းသာမဆုံး ဖြစ်မိနေရပါတယ်။
အရင်က မိဘများဟာ ရိပ်သာဝင်ပြီး တရားအားထုတ်တာမရှိဘဲ အိမ်မှာပဲ တရားမှတ်လေ့ရှိကြပါတယ်။ ဒါပေမဲ့ သားဖြစ်သူရဲ့ တရားဓမ္မများနဲ့သူတို့အပေါ် ကျေးဇူးဆပ်ဆောင်းပါးများကို ဖတ်ရှု့ရတဲ့အခါမှာတော့ အိမ်မှာနေပြီး တရားမှတ်တာထက် ရိပ်သာဝင်ပြီး ပိုမိုတရားရအောင် အားထုတ်မယ်ဆိုပြီး ရိပ်သာမှာစခန်းဝင် အားထုတ်ကြတယ်လို့ မိဘများက ပြန်လည်ပြောပြခဲ့ကြပါတယ်။
ဒါကြောင့် စာဖတ်သူအားလုံးလည်း မိဘကျေးဇူးရှိတယ်ဆိုတာသိပြီး မိဘကျေးဇူးဆပ်ခွင့်ကြုံနေချိန်လေးမှာ မိဘများရဲ့ ကျေးဇူးကို မဖြစ်ဖြစ်တဲ့နည်းနဲ့ ဆပ်ဖြစ်အောင် ပြုလုပ်ကြပါလို့ တိုက်တွန်းချင်ပါတယ်။ မိဘကျေးဇူးကို ဆပ်တဲ့နေရာမှာလည်း အထူးသဖြင့် တရားဓမ္မသိအောင်၊ တရားရအောင်နဲ့ဆပ်ပေးခြင်းက ပိုမိုသာလွန်အကောင်းဆုံးဖြစ်တာမို့ မိဘများအား ဘယ်လိုပြုလုပ်ပေးရင်တော့ သူတော်ကောင်းတရားတွေ ရရှိနိုင်မလဲဆိုတာ စဉ်းစားကြည့်ပြီး ပြုလုပ်ဆောင်ရွက်ကြပါလေ။ ဒါမှသာ မိမိတို့သားသမီးများကိုယ်တိုင် လည်း မိဘကျေးဇူးဆပ်လို့ ကောင်းမှုကုသိုလ်များရသလို မိဘများမှာလည်း သူတော်ကောင်းတရားများ ရရှိသွားကြသဖြင့် နောက်ကာလများစွာအတွက် စိတ်ချသွားရပါလိမ့်မယ်။
(မိခင်အတွက် ဆောင်းပါး) ခက်လှပါလား သံယောဇဉ်ရယ်
သတ္တ၀ါတွေဟာ လောကကြီးထဲမှာ ဘာ့ကြောင့်ပျော်ရွှင်နေကြပြီး မိမိရဲ့ပန်းတိုင်ကိုရောက်အောင် မလုပ်နိုင်ကြတာလို့ စဉ်းစားကြည့်တဲ့အခါ ကိုယ့်မှာရှိတဲ့ သံယောဇဉ်ကို မဖြတ်နိုင်ကြလို့ဆိုတာ သိသာနေပါတယ်။ ခက်တာက နည်းနည်းခြင်းကိုဖြတ်တောက်ဖို့ မကြိုးစားကြတာပဲ။ ခုလိုသိတတ်တဲ့အချိန်လေးမှာ သံယောဇဉ်ကို နည်းနည်းခြင်းဖြတ်တောက်ပေးမယ်ဆိုရင် နောက်နောင် မကြာခင်မှာ သံယောဇဉ်တွေကုန်ပြီး အေးချမ်းလှတဲ့နေရာကို ရောက်ရှိကြမှာ အမှန်ပါ။ သံယောဇဉ်ဆိုတာ ဖြတ်တောက်ဖို့ရန်၊ စွန့်လွှတ်ဖို့ရန် ခဲယဉ်းတယ်ဆိုတာ မှန်ပါတယ်။ ဒါပေမဲ့ လောကကြီးကနေပေးနေတဲ့ ဒုက္ခတွေမှ လွတ်မြောက်ပြီး ငြိမ်းချမ်းမှုချမ်းသာကို ရရှိဖို့ရန်အတွက်က ဒီသံယောဇဉ်တွေကို ဖြတ်တောက်မှရမှာပါ။ အဲဒီလို ချမ်းသာမှုတွေ ခံစားရဖို့ရန်အတွက် သံယောဇဉ်နည်းနည်းဖြတ်ကြပါလို့ စာရေးသူရဲ့အမေအား ဒီလိုလေး ပြောခဲ့တာကို စာဖတ်သူများလည်း သံယောဇဉ်ဖြတ်နိုင်ဖို့ရန် တင်ပြပေးလိုက်ပါတယ်။
ပြည်ပကို ပညာသင်ထွက်နေတဲ့ သားဖြစ်သူကို တွေ့ချင်လှပါတယ်ဆိုပြီး အမေဖြစ်သူဟာ အင်တာနက်ဆိုင် ရောက်လာခဲ့ပါတယ်။ ဒီလိုနဲ့ သားဖြစ်သူနဲ့တွေ့တဲ့အခါ အမေဖြစ်သူက “သားလေး ပြန်မလာသေးဘူးလား။ အလည်တော့ ပြန်လာဦးလေ၊ အမေ သားကိုတွေ့ချင်နေလှပြီ၊ သားကိုမတွေ့ရလို့ အမေ့မှာ သတိတွေနေ့စဉ်ရပြီး လွမ်းဆွတ်မှုတွေ ဖြစ်နေရတယ်သားရေ” လို့ ပြောရှာပါတယ်။
ဒါနဲ့ စာရေးသူက “သားလည်းလွမ်းတာပေါ့ အမေရယ်။ ဒါပေမဲ့ သံယောဇဉ်ဆိုတာ နည်းနည်းကလေးမှ စွန့်လွှတ်နိုင်အောင် မကြိုးစားဘူးဆိုရင် အားလုံးကိုစွန့်လွတ်နိုင်ဖို့ ဘယ်လွယ်မလဲ။ ဒီလိုပဲ သိတတ်တဲ့လူသားဖြစ်ချိန်လေးမှာ တစ်စတစ်စချင်း စွန့်လွတ်မှ ဘ၀နောက်နောင်မှာ သံယောဇဉ်တွေကုန်အောင် လုပ်နိုင်လိမ့်မယ်အမေ။ အမေပဲ သားကို သံယောဇဉ်ဖြတ်ထားနိုင်တယ်ဆိုပြီး သာသနာ့ဘောင်မှာ အများအကျိုးလုပ်ရအောင် ပို့ပေးလိုက်တာမို့လား။ တကယ်လို့ အမေသာ သားအပေါ်မှာ သံယောဇဉ်မဖြတ်နိုင်ဘူးဆိုရင် အမေ့နားမှာ နေခိုင်းမှာပေါ့။ သားကို သာသနာ့ဘောင်မှာ ဘယ်ထားမလဲ။ တကယ်တော့ အမေ့လိုလူမျိုးက ရှားပါတယ် အမေ။ တကယ်ဆို ကိုယ့်မွေးတဲ့သားကို ကိုယ့်ကပဲ နေ့စဉ်မြင်တွေ့ချင်ပြီး ကိုယ့်မွေးတဲ့သားက လုပ်ကိုင်ကျွေးမွေးတာကို ဇိမ်လေးနဲ့ စားနေရမှာပါ။ ခုတော့ အမေက အများအတွက် ဦးစားပေးပြီး အမေ့အတွက် အနစ်နာခံကာ သားကို သာသနာဘောင်မှာ နေခိုင်းတာလေ။ ခုလို နေခိုင်းလိုက်တဲ့အခါကျတော့ အမေ လွမ်းဆွတ်တွေ ဖြစ်ရတယ်။ သားက လုပ်ကိုင်ကျွေးမဲ့အရာကို လက်မခံဘဲ ကိုယ့်ဘာသာလုပ်ကိုင် စားသောက်ရတဲ့အတွက် အမေ ပင်ပန်းပါတယ်။ ဒါပေမဲ့ အမေဟာ ဒီလို မိမိအကျိုးတွေကို အများအကျိုးအတွက် စွန့်လွတ်လိုက်ခြင်းကြောင့် သံယောဇဉ်နည်းနည်းခြင်း ဖြတ်နိုင်မှုအကျိုးတွေ၊ အများအကျိုးအတွက် ကိုယ့်သားကို သာသနာ့ဘောင်မှာ နေခိုင်းခြင်းအကျိုးတွေကို အမေရရှိပါတယ်။
ဒီလို အကျိုးတရားတွေကို ကမ္ဘာပေါ်မှာရှိတဲ့ မိဘတိုင်းမရကြဘူး အမေ။ အမေ့လို အများကောင်းစားရေးကို ဦးစားပေးတတ်တဲ့လူမျိုးသာ ရရှိတာပါ။ အမေဟာ တန်ဖိုးရှိတဲ့ အမေတစ်ယောက်ဖြစ်တယ်ဆိုတာ အမေရော အဖေပါ သိလိမ့်မယ်လို့ သားယူဆပါတယ်”လို့ သားကိုလာတွေ့တဲ့ အမေကို အင်တာနက်ပေါ်ကနေ ပြောလိုက်မိပါတယ်။ အဲဒီအခါ အမေဟာ သူဖန်တီးခဲ့တဲ့ဇာတ်မို့ သူရဲ့အလွမ်းတွေကို သားပေါ်မှာ ဖြတ်ထားရမယ်ဆိုတာသိပြီး ဒီလိုသားမျိုးကို ငါအများအတွက် ပေးဆပ်ပြီး သားပဲလို့တွေးကာ အမေ၀မ်းနည်းမှုကနေ ၀မ်းသာမှုတွေ ဖြစ်သွားခဲ့ပါတယ်။
ဒါနဲ့ပဲ သားအတွက် အမေဂုဏ်ယူသလို သားလည်း အမေ့အတွက် ဂုဏ်ယူပါတယ်။ သားရောအမေပါ အကျိုးရှိအောင် သားလည်း ကောင်းမွန်စွာနဲ့ သာသနာ့အကျိုးကို ထမ်းဆောင်ပါမယ်လို့ ကတိပေးရင်း တစ်နှစ်နေမှ တစ်ခါလောက်သာ အင်တာနက်ပေါ်ကနေ လာတွေ့ခွင့်ရတဲ့ အမေကို ငြိမ်းချမ်းမှုသာရှိတဲ့ မြတ်နိဗ္ဗာန်ကို ရရှိဖို့ရန်အတွက် သံယောဇဉ်ဖြတ်နိုင်အောင် ပြောပြလိုက်ပါတယ်။ အဲဒီလို ပြောပြပြီးတဲ့နောက်မှာ အမေဟာ သံယောဇဉ်ဖြတ်နိုင်မှ ချမ်းသာသုခကို ရရှိမယ်ဆိုတာသိရှိပြီး အခုတရားဓမ္မများနဲ့ ပျော်မွေ့ပြီး ၀ိပဿနာတရားတွေကို အားထုတ်နေပြီးလို့ ကြားသိရတဲ့အတွက် သားဖြစ်သူမှာ မိဘကိုကျေးဇူးဆပ်တရားဟောရကျိုး နပ်သွားပါပြီ။ ဒါကြောင့် စာဖတ်သူအားလုံးလည်း သံယောဇဉ်နည်းနည်းခြင်း ဖြတ်တောက်နိုင်အောင်ကြိုးစားကာ ငြိမ်းမှုတွေသာရှိတဲ့နေရာကိုရောက်အောင် ကြိုးစားစေချင်ပါတယ်။
ဒါနဲ့ ဆက်စပ်ပြီး တွေးမိပါသေးတယ်။ စာရေးသူ သာသနာ့တက္ကသိုလ်က ဘွဲ့ရပြီးတော့ မိမိယခုတတ်ထားတဲ့ပညာနဲ့ အများတကာကို စာသင်ပေး အများအကျိုးလုပ်ရတာ မကျေနပ်သေးဘဲ ဒီထက်ပိုမိုပညာတွေရရှိရန်အတွက် ပြည်ပထွက်ပညာသင်ချင်တဲ့ စိတ်ကူးဖြစ်ခဲ့ပါတယ်။ ဒါနဲ့ သာသနာတက္ကသိုလ်ဘွဲ့ရပြီးတော့ ပြည်ပထွက်ပြီး ပညာသင်လို့ရတဲ့ အခြေအနေတော့ ရောက်သွာပြီ။ ပညာသင်ဖို့ ငွေပဲလိုတာနဲ့ ပညာသင်စရိတ်အတွက် မိမိရတဲ့ ၀တ္ထုငွေကို သာသနာ့တက္ကသိုလ်ကနေ ကျောင်းပြီးကတည်းက သုံးနှစ်တိုင်တိုင် စုထားပါတယ်။
ပြည်ပထွက်ဖို့ ငွေလည်း နည်းနည်းစုမိတာနဲ့ မိဘများကို ပြည်ပထွက် ပညာသင်ချင်တယ်။ သားမလောက်သေးတဲ့ငွေကို ပေးပါဦးလို့ သွားတောင်းတဲ့ခါ မိဘများက သူတို့သားအား ပြည်ပ လုံးဝမထွက်စေချင်ပါဘူး။ ဒါဟာလည်း မိဘတိုင်းက ကိုယ့်သားသမီးနဲ့ ဝေးရာကို မနေချင်ကြတာ ဓမ္မတာမို့ မိဘများအား နားလည်ပါတယ်။ ဒါပေမဲ့ ဦးဇင်းက အများအတွက်ကြောင့် ထွက်ချင်တာဆိုတော့ မိဘတွေ လက်မြှောက်အရှုံးပေးလိုက်ရပါတယ်။ ဘာဖြစ်လို့လဲဆိုတော့ သူတို့မိဘတွေပဲ ကိုယ့်သားကို အများအတွက်ဆိုပြီး သာသနာဘောင်မှာ နေခွင့်ပေးထားပြီးသား ဖြစ်နေလို့ သူတို့တားမရတော့တာပါ။ ဒါကြောင့် သံဃာများရဲ့ မိဘဆိုတာ ကျန်တဲ့နေရာကို မကြည့်ပါနဲ့ ဒီလို မိမိသားကို အများအတွက် စွန့်လွှတ်ပေးထားခြင်းကိုပဲ အတော်တော်တဲ့ မိဘတွေလို့ ချီးကျုးထိုက်နေပါပြီ။
ဒါကြောင့် ဦးဇင်းမိဘတွေဟာ ကိုယ့်သားကို အများအတွက် စွန့်လွှတ်ပြီးသားမို့ ရင်ကွဲခံကာ ပြည်ပကိုထွက်ခွင့်ပြုပေးလိုက်တဲ့အပြင် သူတို့ရှိတာလေးတွေကို စာရေးသူ ပညာသင်စရိတ်အတွက် ဖြည့်ပေးလိုက်ပါတယ်။ အဲဒီအခါတုန်းက ဦးဇင်းကိုယ်တိုင်လည်း မိဘများ သားသမီးပေါ်ထားတဲ့ စေတနာမေတ္တာတွေ။ အများအတွက် ကိုယ့်သားကို စွန့်လွှတ်ပေးမှုတွေကို နားလည်ခံစားရပြီး မျက်ရည်မကျအောင်ထိန်းခဲ့ရပါတယ်။ ရင်ထဲမှာ ၀မ်းနည်းမှုတွေဖြစ်ခဲ့ပေမဲ့ စိတ်ထဲမှာတော့ မိဘတွေကို ဒီလိုလုပ်ပေးနိုင်တဲ့အတွက် ချီးကျုးမိပြီး ၀မ်းမြောက်မှုတွေ ဖြစ်ခဲ့ပါတယ်။ အဲဒီလို စာရေးသူဖြစ်ရပ်လေး ပြန်လည်တွေးကြည့်ပြီး သားနဲ့အမေအကြောင်း ရေးသားရင်း နဲ့ မြတ်ဗုဒ္ဓလက်ထက်က ကုမာရကဿပသားမိနှစ်ယောက် ဇာတ်လမ်းလေးကလည်း စာရေးသူတို့ဖြစ်ရပ် လို တူနေတာနဲ့ သတိရမိလိုက်ပါသေးရဲ့။
မြတ်ဗုဒ္ဓလက်ထက်က ကုမရကဿပမထေရ်ကလည်း မိခင်ဖြစ်သူကို တရားထူးရအောင်၊ သံယောဇဉ်ဖြတ်နိုင်အောင် လုပ်ပေးခဲ့သူတစ်ဦးပါပဲ။ ကုမာရကဿပရဲ့ မယ်တော်လောင်းဟာ ငယ်စဉ်ကတည်းက သာသနာ့ဘောင်ဝင်ပြီး ဘိက္ခူနီမ၀တ်ချင်ခဲ့တာပါ။ ဒါပေမဲ့ မိဘတွေက ၀င်ခွင့်မပေးတာနဲ့ အိမ်ထောင်ပြုခဲ့ရပါတယ်။ ဒီလိုနဲ့ အိမ်ထောင်ကျပြီး မကြာခင် သာသနာဘောင်ဝတ်ဖို့ရန် လင်ယောက်ျားထံမှ ခွင့်ပြုချက်ရတာနဲ့ ဘိက္ခူနီမ၀တ်ခဲ့ပါတယ်။ ဘိက္ခူနီမ၀တ်ပြီးမှ မိမိမှာ သန္ဓေသားပါလာတာ သိရတဲ့အတွက် ကျောင်းအမကြီး ၀ိသာခါတို့ရဲ့ အကူညီနဲ့ သားလေး မွေးဖွားခဲ့ပါတယ်။ မိခင်ဖြစ်သူက ဘိက္ခူနီမဖြစ်နေတော့ သားကိုစောင့်ရှောက်ဖို့ရန် မဖြစ်နိုင်တဲ့အတွက် သားဖြစ်သူကို ဘုရင်ကောသမင်းက မွေးစားလိုက်ပါတယ်။ ဒါနဲ့ သားဖြစ်သူ ကုမာရကဿပအရွယ်ရောက်လာတဲ့အခါ အမေဖြစ်သူသာသနာဘောင်မှာနေတာကို သိရှိရလို့ သူလည်း သာသနာဘောင်မှာနေမယ်ဆိုပြီး သာသနာဘောင်ရောက်ခဲ့ပါတယ်။ အဲဒီလိုနဲ့ ကုမာရကဿပဟာ (၁၂)နှစ်တိုင်တိုင် တောထဲသွားတရားထုတ်လိုက်တာ ရဟန္တာဖြစ်ပြီး နောက်ပိုင်းတွင် နာမည်ကျော် ဓမ္မကထိကဖြစ်လာပါတယ်။
သားမိနှစ်ယောက်ဟာ သာသနာဘောင်မှာ အတူနေပေမဲ့ တစ်ယောက်နဲ့တစ်ယောက် မတွေ့ဖြစ်ကြပါဘူး။ သားဖြစ်သူကသာ ရဟန္တာဖြစ်နေပေမဲ့ သူရဲ့အမေကတော့ သားကိုလွမ်းဆွတ်သတိရတွေဖြစ်နေတဲ့ အတွက် သံယောဇဉ်မကုန်ဘဲ ဖြစ်နေပါတယ်။ ဒီလို သံယောဇဉ်တွေဖြစ်နေလို့ တရားထူးမရတာကို သားဖြစ်သူကသိတဲ့အတွက် အမေဖြစ်သူ သူ့ကိုမတွေ့အောင် တမင်သက်သက် ရှောင်နေတာပါ။
ဒါပေမဲ့ တစ်နေ့သားဖြစ်သူက ဆွမ်းခံသွား၊ အမေဖြစ်သူကလည်း ဆွမ်းခံသွားရင်းနဲ့ သားမိနှစ်ယောက် လမ်းပေါ်မှာ ဆုံမိကြပါတယ်။ ဒါနဲ့ အမေဖြစ်သူက သားကိုတွေ့ချင်လွန်းလို့ဆိုပြီး တစ်ခါတည်း သပိတ်ပွေ့ပြီးအတင်းလိုက်ပါတယ်။ ဒီလိုလိုက်ရင်းနဲ့ သားကို မှီခါနီးလည်းရောက်ရော သားဖြစ်သူက စဉ်းစားတယ်။ “အော်-ငါက ဒကာာမကြီးလို့ခေါ်လိုက်ရင် ငါ့ကို ခင်သေးတယ်၊ ချစ်ရှာတယ်၊ တွေ့တော့ လည်း ခေါ်ရှာသားပဲဆိုပြီး သားအပေါ်သံယောဇဉ်တွေဖြစ်ကာ သံယောဇဉ်မဖြစ်နိုင်သေးတာနဲ့ တရားရမှာ မဟုတ်ဘူး။ ဒါကြောင့် မခေါ်ဘဲနေတာ ကောင်းပါတယ်”လို့တွေးပြီး အသံမပေးဘဲ ထွက်သွားပါတယ်။ ဒီလိုမှ သူ့အမေကို မစိမ်းကားဘူးဆိုရင် အမေဖြစ်သူဟာ သားအပေါ်မှာ သံယောဇဉ်တွေဖြစ်ပြီး သံယောဇဉ်မကုန်ဘဲ ဖြစ်နေမှာမို့ ခုလိုအမေနောက်ကလိုက်နေတာကို ရပ်မပေးဘဲ သွားနေရှာတာပါ။ အမေဖြစ်သူ သူ့ကိုစိတ်ကုန်ပြီး သံယောဇဉ်ပြတ်အောင် လုပ်နေရှာရတာ။ သံယောဇဉ်ဆိုတာ ကိုယ့်ကိုကိုယ်ဖြတ်မှ မဂ်ဖိုလ်ရမှာ။ သံယောဇဉ်တွေဖြစ်ပြီး သူတစ်ပါးကို ချစ်ခင်နေမယ်၊ အားကိုးနေမယ်ဆိုရင် မဂ်ဖိုလ်ကို မရနိုင်ဘူး။ ဒါကြောင့် သားဖြစ်သူက အမေဖြစ်သူကို တမင်သက်သက် သံယောဇဉ်ပြတ်နိုင်အောင် လုပ်နေတာ။
သားဖြစ်သူက သံယောဇဉ်ပြတ်အောင်လုပ်နေပါသော်လည်း အမေဖြစ်သူကတော့ နောက်ကနေ မရမကလိုက်ကာ သပိတ်ကြီးပွေ့ပြီး အတင်းလိုက်ရင်းလိုက်ရင်းနဲ့ မှီလုမှီခင်လေးမှာ သင်္ကန်းတအားဆွဲမလို့ လုပ်လိုက်တော့ အမေဖြစ်သူ မှောက်လျက်ကြီးလဲသွားရှာတယ်။ လဲသွားတဲ့အခါကျတော့ သူ့စိတ်ထဲမှာ “သြော်-ငါ့သားမှာ နည်းနည်းမှ အမေ့စိတ်မရှိဘဲပါလား။ ငါ့မှာဖြင့် နှစ်ပေါင်းနှစ်ဆယ်ကျော် သားကိုလွမ်းဆွတ်သတိရနေလိုက်တာ မျက်ရည်နဲ့မျက်ခွက်ဖြစ်ပြီး ဘယ်တရားမှလည်း အားမထုတ်နိုင်ခဲ့ ဘူး။ ငယ်ငယ်ကတည်းက သားလေးကို နို့ချိုတိုက်ကျွေးချင်ခဲ့ရတာ။ ခုတော့ သားဖြစ်သူက ငါ့ကိုတွေ့တာတောင် အရေးမလုပ်ပါလား။ ငါကသာ သားလေးမွေးပြီးကတည်းက နို့ချိုမတိုက်ကျွေးခဲ့ရလို့ တိုက်ကျွေးချင်စိတ်တွေ ဖြစ်နေရတယ်။ ဒါကို သားက မသိပါလား။ ငါကသာ သံယောဇဉ်တွေ ဖြစ်နေရတာ။ သူက ငါ့ကို ဘာသံယောဇဉ်မှ မဖြစ်ပါလား။ တော်ပြီ ဒီနေ့ကစပြီး မင်းကို သံယောဇဉ်လည်း မထားတော့ဘူး”လို့ စိတ်ဆုံးဖြတ်ချက်ချပါလိုက်တယ်။
အဲဒီလိုဆုံးဖြတ်ချက်ချပြီးသကာလ ဘိက္ခုနီမကျောင်းပြန်သွားပြီး သားအပေါ်ထားတဲ့ သံယော ဇဉ်ဖြတ်ထားတဲ့စိတ်နဲ့ တရားအားထုတ်လိုက်တာ အဲဒီနေ့မှာပဲ ရဟန္တာဖြစ်သွားပါတယ်။ သားဖြစ်သူကသာ ဒီလို မစိမ်းကားဘူးဆိုရင် သားအပေါ်မှာ သံယောဇဉ်တွေဖြစ်နေမှာမို့ ဘယ်လိုတရားအားထုတ်ပါသော် လည်း သံယောဇဉ်တော့ ကုန်မှာမဟုတ်ပေ။ ဒါကြောင့် စာရေးသူကလည်း အမေဖြစ်သူကို အမေရေ သားတို့လည်း ဒီလို သံယောဇဉ်တွေ နည်းနည်းခြင်းဖြတ်နိုင်မှ သံယောဇဉ်ကုန်ရာဖြစ်တဲ့ မြတ်နိဗ္ဗာန် ကို ရောက်နိုင်လိမ့်မယ်လို့ပြောပြီး အမေ့ကို နှစ်သိမ့်လိုက်ရပါတယ်။
ဒါကြောင့် လူသားအားလုံးလည်း သူတစ်ပါးကို သံယောဇဉ်တွေ အားကြီးမနေဘဲ လုပ်ပေးသင့်တဲ့အရာ လုပ်ပေးပြီးသကာလ မိမိကိုယ်ကိုအားကိုးကာ သံယောဇဉ် နည်းနည်းခြင်းဖြတ်ပြီး အမြတ်ဆုံးဖြစ်တဲ့ နိဗ္ဗာန်ရွှေပြည်ကို ရောက်လှမ်းနိုင်အောင် အားထုတ်နိုင်ကြပါစေလို့ ဆန္ဒပြုလိုက်ရပါပေတယ်။
(ဖခင်အတွက် ဆောင်းပါး) မကျေနပ်တဲ့ အဖေ့သံ
မိဘတွေက သားဖြစ်သူပြည်ပမှာမို့ အကျိုးအကြောင်းသိရအောင် တစ်လတစ်ခါ ဖုန်းဆက်ပါဆိုတာနဲ့ မိဘများစိတ်ချမ်းသာအောင် ဖုန်းဈေးကြီးပေမဲ့လည်း တစ်လတစ်ခါတော့ ဆက်ပေးခဲ့ပါတယ်။ ဒီလိုနဲ့ ရွာကိုဖုန်းဆက်တော့ အမေဖြစ်သူက ဖုန်းလာကိုင်ပါတယ်။ အရင်ကလည်း အမေဖြစ်သူပဲ သူသားရဲ့ဖုန်းလာရင် သူပဲကိုင်ပြောနေကြပါ။ ဒါပေမဲ့ ခုတစ်ခါကျတော့ မကျေနပ်သံတွေဖြစ်နေတဲ့ ဖခင်ဖြစ်သူက ဖုန်းကိုသူလည်းပြောမယ်ဆိုပြီး ဒီလိုလေး မကျေနပ်သံ အဖေ့သံကို ကြားလိုက်ရပါတယ်။
သားရေတဲ့။ ဗုဒ္ဓဘာသာဝင်သားသမီးတိုင်းဟာ ဖခင်ဖြစ်သူကို အနန္တဂိုဏ်းဝင် ကျေးဇူးရှင်၊ အမေကမွေး၊ အဖေကကျွေးတဲ့ ကျွေးဖခင်ဆိုပြီး အဖေ့တို့ကို ဂုဏ်ပုဒ်တွေ အများကြီးနဲ့ ပြောဆိုသတ်မှတ်နေကြတာကို အဖေအပါဝင် ဖခင်ဖြစ်သူတိုင်း ကြားသိနေရပါတယ်။ ဒါပေမဲ့ အဲဒီစကားဟာ သားတို့သားသမီးတွေရဲ့ ရင်ထဲက လှိုက်လှိုက်လှဲလှဲလာတဲ့စကားလား၊ ဒါမှမဟုတ် သူများပြောလို့ လိုက်ပြောနေကြတာလား။ အဖေကတော့ သားတို့သားသမီးတွေ လက်လွတ်စပယ် ပြောဆိုဂုဏ်ပြုတဲ့စကားပဲလို့ ထင်မိတယ်။
ဘာဖြစ်လို့ အဖေဒီလိုပြောရတာလဲဆိုတော့ သားတို့ပြောတဲ့ ဒီစကားတွေဟာ ဖခင်ဖြစ်တာနဲ့ အလိုလိုတွဲဖက်ပါလာတယ်ဆိုတာ အဖေသိပါတယ်။ ဒါပေမဲ့ အဖေဟာ ဒီတာဝန်ကိုကျေပွန်အောင်ဆိုတဲ့ စိတ်နဲ့ သားတို့ကို ပြုစုလုပ်ကိုင်ကျွေးမွေးနေတာ မဟုတ်ပါဘူး။ အဖေ့ရင်ထဲမှာ သားတို့မွေးလာပြီးဆို ကတည်းက သားတို့အပေါ်ချစ်ခြင်းမေတ္တာတွေအပြည့်နဲ့ သားတို့ကို အဖေတက်နိုင်သမျှ လိုလေစိတ်မရှိအောင် ပြုစုလုပ်ကိုင်ကျွေးမွေးပေးခဲ့ပါတယ်။ ဒါဟာ အဖေ့ရင်ထဲက တကယ်ခံစားချက်ပါ။
ဒါကို သားတို့က မသိနားမလည်တာလား၊ မိခင်ဖြစ်သူကပဲ ဖခင်ဖြစ်သူထက် သားတို့အပေါ် ပိုမိုချစ်ခင်တယ်လို့ သားတို့က ထင်နေတာလား၊ အဖေကပဲ သားတို့ကို မိခင်လောက် ချစ်မပြနိုင် လို့လား။ အဖေက သားတို့ကို မိခင်လောက်တော့ ဘယ်ချစ်ပြနိုင်မလဲ။ အဖေက ယောက်ျားသား လေ။ မိခင်မိန်းမသားတွေလောက်တော့ သားတို့အပေါ် နွဲ့နွဲ့နှောင်းနှောင်း ဘယ်ချစ်ပြနိုင်မလဲ။ ဒါဟာလည်း ယောက်ျားလေးနဲ့ မိန်းကလေးတို့ရဲ့ သဘာဝကွာဟချက်မို့ အပြစ်မမြင်သင့်ပါဘူး။ နောက်ပြီး မိခင်နဲ့ဖခင်မှာ ဖခင်ကပဲ အိမ်မှာမနေရဘဲ အပြင်ကိုအလုပ်ထွက်လုပ်ရတာ များတယ်လေ။ ဒါကြောင့် အိမ်မှာအဖေတို့ထက် နေခွင့်ရှိတဲ့ မိခင်က သားတို့ကို ပိုမိုပြုစုချစ်ခင်မြတ်နိုးနိုင်တာပေါ့။ ဒါပေမဲ့ သားတို့ သိထားရမှာက အဖေဟာ မိခင်ဖြစ်သူလို သားတို့နဲ့အနီးကပ် ပြုစုယုယချစ်မပြနိုင်ပေမဲ့ အဖေသားတို့အပေါ် ချစ်တဲ့အချစ်မေတ္တာ သံယောဇဉ်ဟာ မိခင်ဖြစ်သူထက်တော့ မလျှော့သလို မိခင်လိုပဲ သားတို့ကို လွမ်းတယ်ဆိုတာ တော့ သိထားသင့်ပါတယ်။
ဒီလို အဖေဖြစ်သူမှာလည်း သားတို့အပေါ် လွမ်းမှု၊ ချစ်ခင်မှုတွေ တူညီမှုရှိနေတာကို သားတို့သိမယ်ဆိုရင် အမေဖြစ်သူကို သားတို့ စကားပြောသလို အဖေဖြစ်တဲ့ ငါ့ကိုလည်း စကားပြောဖို့၊ သားရဲ့အကျိုးအကြောင်းပြောဖို့၊ အမှတ်ရဖို့၊ သတိရဖို့တွေ ပြောသင့်တာပေါ့။ အော်-အဖေကသာ သားတို့အပေါ်ကို ချစ်ခြင်းမေတ္တာတွေ ရင်ထဲမှာ မဖော်ပြနိုင်အောင်ဖြစ်နေတာကို မျိုးသိမ့်ထားရပေမဲ့ သားတို့ကတော့ အဖေဖြစ်သူကို မိခင်ဖြစ်သူလောက် ချစ်ခင်မှုမရှိတာ၊ သတိရမှုမရှိတာ၊ လွမ်းဆွတ်မှုမရှိတာ၊ စကားပြောပေးမှုမရှိတာကို အဖေသိမြင်ရတဲ့အခါတိုင်း ၀မ်းနည်းမှုတွေ ဖြစ်နေ တယ်ဆိုတာ သားသိရဲ့လား။ ဒါတွေကို အဖေက သားကို မချစ်ခင်လို့၊ အပြစ်မြင်လို့ပြောတာမဟုတ်ပါဘူး။ အဖေ့ရင်ထဲက ခံစားချက်တွေကို မအောင့်နိုင်တော့လို့ သားသိအောင် အဖေပြောပြတာပါ သားရယ်။
ဒါနဲ့ အဖေ့ဖြစ်သူက သူရဲ့မကျေနပ်သံတွေကို ပြောပြပြီးတဲ့အခါ သားဖြစ်သူကလည်း အဖေ့ကို ပြန်ပြောပြလိုက်ပါတယ်။ အဖေရေ သားလည်း အဖေ့ကို အမေနည်းတူ ချစ်ခင်လွမ်းဆွတ်မှုတွေ ဖြစ်ပါတယ်။ ဒါပေမဲ့ ဖုန်းဆက်တဲ့အခါမှာတော့ အမေဖြစ်သူက မိန်းမသားမို့ အားနွဲ့တတ်သူပီပီ လွမ်းဆွတ်မှုကို ထိန်းသိမ်းထားမှုအားနည်းတတ်တာကြောင့် အမေဖုန်းလာပြောရင် သားက အမေ့ကိုပဲ သားရဲ့အကျိုးအကြောင်းတွေကို အကုန်ပြောပြလိုက် ရတာပါ။ နောက်ပြီး သားအမေကိုပြောတဲ့စကားကို အဖေ့ဆီကိုလည်း ရောက်မယ်ဆိုတာ သားသိတဲ့အတွက် အဖေ့ကို ဖုန်းပြောဖို့ရန် တကူးတက မခေါ်မိတာပါ အဖေ။ သားအဖေတို့ဆီ ရောက်ရင် မိဘနှစ်ပါးလုံးကို သားတန်းတူချစ်တယ်၊ မိဘနှစ်ပါးလုံးရဲ့စကားကို သားနားထောင် တယ်ဆိုတာ အဖေသိမှာပါ။
ခုလည်း သားအဖေတို့ရဲ့ မိဘကျေးဇူးကို ဆပ်ချင်တဲ့အတွက် အဖေတို့ဖြစ်စေချင်တဲ့ သာသနာ့ဘောင်မှာ ပညာတတ်သာသနာပြုရဟန်းတော်တစ်ပါးဖြစ်အောင် သားလုပ်နေတာပဲ အဖေ။ သားဘ၀များစွာမှာ မိဘကျေးဇူးကို ကျေပွန်အောင်မဆပ်နိုင်ခဲ့တာ များမယ်ဆိုတာ မျက်မှောက်အသိဉာဏ်ရှိတဲ့ လူသားဖြစ်တဲ့ဘ၀နဲ့နှိုင်းယှဉ်ကြည့်ရင်ပင် သိနိုင်ပါတယ်။ မျက်မှောက် အသိဉာဏ်ရှိတဲ့ လူသားများကိုကြည့် လိုက်ရင် မိဘကျေးဇူးမဆပ်တဲ့လူတွေ၊ မဆပ်နိုင်တဲ့လူတွေ အများကြီးရှိတယ်။ ဒါကိုကြည့်မယ်ဆိုရင် လွန်ခဲ့တဲ့ဘ၀များစွာမှာ မိဘကျေးဇူးကျေခဲ့တဲ့လူဆိုတာ အလွန်နည်းပါးလိမ့်မယ်ဆိုတာ သိနိုင်ပါတယ်။
ဒါကြောင့် သားကတော့ ဒီဘ၀မှာ မိဘကျေးဇူးကို ကျေပွန်အောင်ဆပ်မယ်ဆိုပြီး အဖေတို့ ဖြစ်စေချင်တာကိုဖြစ်မြောက်အောင် လုပ်နေတာပါအဖေ။ ဒီလောက်ဆို သားရဲ့ အဖေတို့မိဘအပေါ်ထားတဲ့ စေတနာချစ်ခြင်းကျေးဇူးသိတတ်ပုံတွေကို အဖေသိမယ်ထင်ပါတယ်။
ဒါနဲ့ အဖေရော တစ်ခါတလေ ရွာမှာသောက်လေ့ရှိတဲ့ ထန်ရည်ကို သောက်ဖြစ်သေးလား။ အဲဒါကိုလည်း အဖေမသောက်ဖြစ်အောင် ရှောင်ကြဉ်ပါလို့ သားပြောချင်တယ် အဖေ။ ဘာဖြစ်လို့လဲဆိုတော့ အဖေပဲ စဉ်းစားကြည့်လေ၊ သားဖြစ်သူက အများအကျိုး သယ်ပိုးနေတဲ့ ရဟန်းတစ်ပါး၊ လူတကာကို လူကောင်းတစ်ယောက်ဖြစ်အောင် လမ်းညွှန်ဆုံးမပေးနေတဲ့ ရဟန်းဖြစ်ပြီး ဖခင်ဖြစ်သူက လူကောင်း မဖြစ်သေးဘဲ မကောင်းတဲ့အရည်ကို တစ်ခါတလေ သောက်နေတာ သူများမြင်ရင် ဘယ်လိုထင်ကြ မလဲ။ အော်-သားဖြစ်သူက လူတကာကိုသာ ဆုံးမနေတာ၊ ကိုယ့်အဖေမကောင်းတာလုပ်နေတာကျတော့ မဆုံးမနိုင်၊ လမ်းညွှန်မပေးနိုင်ပါလားဆိုပြီး သားရောအဖေပါ သိက္ခာကျစေတဲ့ စကားတွေ ပေါ်လာနိုင်တယ် အဖေ။ အဲဒါကြောင့် အဖေ မကောင်းတဲ့ထန်ရည်ကိုလည်း တစ်ခါမှမသောက်ဖြစ်အောင် ရှောင်ကြဉ်ပေး ပါနော် အဖေ။
စကားဆက်စပ်မိတာနဲ့ တချို့သောလူမိုက်တွေကို လူကောင်းကဆုံးမရင်မရဘဲ သူတို့ထက်ဆိုးတဲ့လူက ဆုံးမမှရတဲ့ ဇာတ်လမ်းလေးတစ်ခု ပြောပြပါဦးမယ်။ တစ်ခါက အရက်အလွန်သောက်တဲ့ သူဌေးတစ်ယောက်ရှိခဲ့ပါတယ်။ သူဟာ စီးပွားရေးလုပ်ငန်းရှင်မို့ လုပ်ငန်းရှင်အချင်းချင်း ပွဲလမ်းတွေ ဂုဏ်ပြုပေးရင်းနဲ့ သူငယ်ချင်းမကောင်းသူများရဲ့ တိုက်တွန်း ပေးမှုကြောင့် အရက်၊ ဘီယာတွေကို စွဲလန်းသွားခဲ့ပါတယ်။ ဒါနဲ့ မိခင်ဖြစ်သူက သူသားကို အရက်ပြတ်အောင်ဆိုပြီး ဒုလ္လဘရဟန်း ၀တ်ခိုင်းခဲ့ပါတယ်။ သူဒုလ္လဘ၀တ်တဲ့ကျောင်းဆရာတော် ကလည်း သူ့ကို အရက်မသောက်အောင် အမျိုးမျိုး ဆုံးမသြ၀ါဒတွေပေးခဲ့ပါတယ်။ ဒါပေမဲ့ အဲဒီသူဌေးဟာ လူဘောင်ပြန်ရောက်တဲ့အခါမှာ အရက်ကိုပြန်သောက်ပြန်ပါသတဲ့။ မိခင်ဖြစ်သူ လည်း ဘယ်လိုမှ ဆုံးမပြောဆိုလို့မရတာနဲ့ သားဖြစ်သူကို လက်လွတ်အရှုံးပေးခဲ့ရပါတယ်။
ဒီလိုနဲ့ တစ်နေ့မှာတော့ သူ့ကိုဆုံးမမဲ့လူ ရောက်လာပါတယ်။ သူဌေးဟာ နဂိုလိုပုံမှန်အတိုင်း စီးပွားရေးသမားများစုပေါင်းပြီး ဂုဏ်ပြုပွဲလုပ်ရင်း စားသောက်ဆိုင်တစ်ခုမှာ စားသောက်နေကြတဲ့အခါ သူတို့စားပွဲနဲ့မနီးမနားကနေ အရူးတစ်ယောက်က ဖြတ်သွားပါတယ်။ ဒါနဲ့ သူဌေးဖြစ်သူက မူးမူးနဲ့ အရူးကို ဟေ့-အရူး လာကွာ။ မင့်ကို ငါတို့ အရက်လည်းတိုက်မယ်၊ အမြည်းရောကျွေးမယ်ဆိုပြီး လှမ်းခေါ်လိုက်ပါတယ်။ အဲဒီအခါ အရူးဖြစ်သူက တော်ပါပြီးကွာ၊ ငါ့မှာ အရင်ဘ၀က အမူးတောင်မပြေသေးဘူး။ နောက်ထပ် မမူးပါရစေနဲ့လို့ ပြန်ပြောလိုက်ပါတယ်တဲ့။ အရူးပြောတဲ့စကားရဲ့ ဆိုလိုရင်းက သူဟာ အရင်ဘ၀တွေက အခုလို မူးယစ်စေတဲ့ အရက်စတာတွေကို သောက်သုံးမိခဲ့တဲ့ အတွက် အဲဒီအကျိုးဆက်ရဲ့ဓာတ်သဘာဝကြောင့် အခုလူဖြစ်တဲ့ဘ၀မှာ ဦးနှောက်ကြည်လင်မှုမဖြစ်ဘဲ ဦးနှောက်မကောင်းတဲ့ အရူးဘ၀ကို ရောက်နေရတာ။ ဒါကြောင့် နောက်နောင်မှာတော့ ဒီလိုအဖြစ်မျိုး မဖြစ်အောင် ရှောင်ကြဉ်မယ် ဆိုတာကို ပြောလိုက်တာပါ။
ဒီစကားကို သူဌေးဖြစ်သူလည်းကြားရော သတိသံဝေဂတွေရပြီး ငါလည်း သူလို နောက်နောင်ဘ၀တွေမှာ ခုလို မူးယစ်စေတာတွေကိုသောက်နေမယ်ဆိုရင် ဦးနှောက် မကြည်လင်မှုအကျိုးဆက်ဓာတ်သဘာဝကြောင့် အရူးဖြစ်မှာ သေချာတယ်။ အဲဒီတော့ ငါ နောက်နောင်ဘ၀တွေမှာ အရူးတော့ အဖြစ်မခံနိုင်ဘူး။ ဒါကြောင့် ယခုအချိန်ကစပြီး အရက်တွေကို မသောက်တော့ဘူးလို့ စိတ်ဆုံးဖြတ်ချကာ အရက်ပျက်သွားပါတယ်တဲ့။ ဒါဟာ မကောင်းတဲ့လူကို သူထက်မကောင်းတဲ့လူက ဆုံးမပေးလိုက်တာကြောင့် အသိတရားရသွားတာပါ။
ခုလည်း သားက အဖေ့ကို မကောင်းတာတွေမလုပ်ခိုင်းတာဟာ အဖေ့ရဲ့ သံသရာ အတွက်ရော၊ မျက်မှောက်အတွက်ရော ကောင်းစားစေချင်တဲ့အပြင် သားရဲ့အဖေတို့မိဘအပေါ် ကျေးဇူးဆပ်ချင် လို့ ပြုလုပ်ဆောင်ရွက်ပေးနေတဲ့ သားရဲ့လမ်းခရီးမှာလည်း အနှောက်အယှက် မရှိအောင် အဖေကို ခုလိုပြောရခြင်း ဖြစ်ပါတယ် အဖေ။ ဒီလောက်ဆို သားရဲ့ အဖေ့ကို ချစ်ခင်မှု၊ လွမ်းဆွတ်သတိရမှု၊ မိဘကျေးဇူးသိတတ်မှုတွေကို အဖေသိလောက်ပါပြီနော်။ ဒါတွေ အားလုံးဟာ သားရင်ထဲကလာတဲ့ စကားတွေပါ အဖေ။ ဒါကြောင့် အဖေမကျေနပ်ဖြစ်နေတဲ့ အဖေရင်ထဲက ခံစားချက်တွေကို သားရင်ထဲက ခံစားချက်နဲ့ပြန်လည်ချေပလိုက်တဲ့အခါ အဖေရင်ထဲမှာ ပေါ့ပါးသွားပြီး အဖေစိတ်ကျေနပ်မှုရှိလိမ့်မယ်လို့ သား မျှော်လင့်ပါတယ် အဖေ။
သားဖြစ်သူက အခုလို ပြန်ပြောပြလိုက်တော့လည်း အဖေဖြစ်သူဟာ သူရဲ့ မကျေနပ်သံတွေကို အဝေးလွင့်အောင်ပြောဆိုပေးလို့ သားရဲ့ချစ်ခင်မှု၊ သတိရမှု၊ ကျေးဇူးသိတတ်မှုတွေကို ရင်ထဲမှာ သိမ်းထားရင်း သားရဲ့ဂုဏ်ပုဒ်ကို ထိခိုက်မှာဆိုးတာရယ်၊ သူ့ကျေးဇူးကိုဆပ်တဲ့အနေနဲ့ သူဖြစ်ချင်တာကို ပြု လုပ်ပေးနေတဲ့ သားရဟန်းစကားနားထောင်ပြီး မကောင်းမှုတွေကို ရှောင်ကြဉ်သွားပြီးဖြစ်ကြောင်း သိလိုက်ရပါတော့တယ်။
စာဖတ်သူအားလုံးလည်း မိဘကျေးဇူးကိုသိတတ်ပြီး မိဘကျေးဇူးဆပ်နိုင်ကြတဲ့အပြင် မကောင်းမှုမှ ရှောင်ကြဉ်နိုင်ကြပါစေလို့ ဆုတောင်းမေတ္တာပို့သရင်း အဖေနဲ့သားတို့ရဲ့ စကားပြောခန်းလေးကို ဒီမှာပဲ နိဂုံးချုပ်လိုက်ပါရစေ။
အရှင်ကောမလ(ခ)ဆန်နီနေမင်း
