အပါယ်လေးပါးမှ လွတ်လိုလျှင်

လူသားတို့သည် နတ်ရွာသုဂတိသို့ ရောက်ချင်ကြသော်လည်း အပါယ်လေးပါးသို့ ကျရောက်မည်ကိုတော့ လူတိုင်းကြောက်ရွံ့နေကြပေသည်။။ အပါယ်လေးပါး၏ ဆင်းရဲဒုက္ခကို သိကြသူများသည် အပါယ်လေးပါးအသံကြားရုံမျှဖြင့် ကြောက်လန့်မှုများ ဖြစ်နေကြ၏။ သို့သော် အပါယ်လေးပါးမှလွတ်အောင် ကျင့်သုံးနေထိုင် လိုက်စားသူများကနည်းပြီး မလေ့လာ မလိုက်စား မကျင့်သုံးသူက များနေပေသည်။


လူသားတို့သည် များသောအားဖြင့် သေရမည်ကို အလွန်အင်မတန် ကြောက်ရွံ့ထိတ်လန့်ကြသည်။ ဘာဖြစ်လို့လဲဆိုတော့ မိမိသေလျှင် မည်ကဲ့သို့သော နေရာဌာနမှာ မည်ကဲ့သို့ နေထိုင်ရမည်ကို သေချာမသိသေး၍ ရနေသော လူ့ဘ၀လေး၌ ပျော်ရွှင်စွာ နေထိုင်ချင်ကြသောကြောင့် ဖြစ်ပေသည်။ တကယ်လို့များ လူ့ဘ၀ထက် ပျော်စရာကောင်းသော နတ်ပြည်နတ်ဘုံကို ခေါ်ဆောင်သွားပြီး နတ်ပြည်၏စည်းစိမ်ချမ်းသာကိုပြ၍ နတ်ပြည်၌နေမည်လော လူ့ပြည်၌ပြန်မည်လောဟု မေးလျှင် လူ့ဘ၀လေးကို အလွယ်တကူ စွန့်ပြစ်ကြပေလိမ့်မည်။

အဲဒီတော့ သေရမည်ကိုလည်း မကြောက်ရအောင် သေလျှင်လည်း ကောင်းသောဘုံမှာဖြစ်ပြီး ကောင်းသောချမ်းသာသုခကို ခံစားရအောင် မသေခင် အချိန်လေးမှာ ပြုလုပ်ရမည့် ကောင်းမှုများကို ပြုလုပ်ပေးပါ။ သိပ်အများကြီး ပြုလုပ်စရာ မလိုပေ။ လူသားတိုင် ပြုလုပ်နိုင်မည့် သရဏဂုံသုံးပါး ယုံကြည်ခြင်းနှင့် ငါးပါးသီလကို လုံခြုံအောင်စောင့်ထိန်းလျှင် နောင်ဘ၀အတွက်တော့ စိတ်ချရပါသည်။ ဒီထက်မက မိမိက လျင်မြန်စွာ ချမ်းသာဆုံးဖြစ်သော သန္တိသုခနိဗ္ဗာန်ကိုရောက်ချင်လျှင် ဒီထက်မကသော ဘာဝနာတရားများကို ပွားများပေးရပေမည်။

မိမိက ဘ၀နာတရား အားထုတ်ဖို့မဖြစ်နိုင်လျှင်သော်မှ ခက်ခဲလှသည်မဟုတ်သော သရဏဂုံသုံးပါးကို ယုံကြည်ခြင်းနှင့်ငါးပါးသီလ ဆောက်တည်ခြင်းကိုတော့ လူသားတိုင်း လုပ်နိုင်မည်ဟု ထင်ပါသည်။

သရဏဂုံသုံးပါးကို ယုံကြည်ခြင်း၌ အပေါ်ယံ ယုံကြည်ခြင်းမျိုး မဟုတ်ဘဲ နစ်နစ်ကာကာ ယုံကြည်မှုရှိဖို့ရန်တော့ လိုပေသည်။ ဥပမာ....မြတ်စွာဘုရားကို ရှိခိုးရာဝယ် မြတ်ဗုဒ္ဓသက်တော်ထင်ရှားမရှိ၍ မြတ်ဗုဒ္ဓကိုယ်ပွားဖြစ်သော စေတီ ဆင်းတုတော်တို့ကို ရှိခိုးသောအခါ မြတ်စွာဘုရားရှင် သက်တော်ထင်ရှားရှိနေသကဲ့သို့ မြတ်ဗုဒ္ဓ၏ ဂုဏ်တော်ကျေးဇူးတော်များကို အာရုံပြုပြီး ရှိခိုးခြင်း၊ လှူဒါန်းခြင်း၊ အရိုအသေပေးခြင်း စသည်တို့ကို ပြုလုပ်ပေးရပါမည်။ ဗုဒ္ဓဘာသာဖြစ်၍ ၀တ်ကျေတန်ကျေသဘောဖြင့် ဖြစ်ကလပ်ဆန်း ရှိခိုးခြင်း လှူဒါန်းခြင်းများ မပြုလုပ်ရန် အရေးကြီးပေသည်။

ထိုအတူ တရားတော်ကို ယုံကြည်ရာ၌လည်း မြတ်စွာဘုရားရှင် ဟောကြားခဲ့သော တန်ဖိုးကြီးမားလှသော တရားတော်များဟု ယုံကြည်မှုအပြည့်အ၀ထားကာ နားယူဖတ်ရှု့ဖို့ လိုပေသည်။

တဖန် သံဃာတော်များကို ယုံကြည်ကိုးကွယ် လှူဒါန်းပေးကမ်းသောအခါ၌လည်း ပုထုဇဉ်သမုတိသံဃာဖြစ်၍ လက်လွတ်သဖွယ် မလုပ်ဘဲ မြတ်ဗုဒ္ဓ၏ လက်ယာရံ ပညာအရာဧတဒဂ် ရဟန္တမထေရ် အရှင်သာရိပုတ္တရာအစရှိသော သံဃာတော်များကို လှူဒါန်းပေးကမ်း ရိုသေရသကဲ့သို့ အာရုံပြုကာ သံဃာတော်များကို ယုံကြည်ကိုးကွယ်ဖို့ရန် လိုပေသည်။

ထို့အပြင် ငါးပါးသီလကို ဆောက်တည်ရာ၌လည်း ငယ်ရွယ်စဉ် မသိသေးသော ကာလများ၌ သီလမလုံခြုံခဲ့လို့ အားတော့မလျှော့လိုက်ပါနဲ့။ သိတတ်သည့်အချိန်တွင် သီလကို လုံခြုံစွာ စောင့်ထိန်းလျှင်လည်း အကျိုးပေးကများသောကြောင့် တက်နိုင်လျှင် တက်နိုင်သလောက် လုံခြုံအောင် စောင့်ထိန်းသင့်ပေသည်။ တစ်ရက်စောင့်ထိန်းလျှင် တစ်ရက်စောင့်ထိန်းရတဲ့ သီလအကျိုးကိုတော့ ခံစားရပေမည်။ အလုပ်တစ်ရက်လုပ်လျှင် တစ်ရက်လုပ်အားခရသလို သီလကို တစ်ရက်စောင့်ထိန်းလျှင် တစ်ရက်စောင့်ထိန်းသော အကျိုးကတော့ ဧကန်ခံစားရပါလိမ့်မည်။

ထို့ကြောင့် မိမိတို့ လူ့ဘ၀လေး မသေခင်အချိန်လေးမှာ သေရန်မကြောက်ဖို့ရန်နှင့် သေလျှင်လည်း နောင်ဘ၀မှာ ကောင်းကျိုးချမ်းသာများခံစားရရန် အနည်းဆုံးတော့ သရဏဂုံသုံးပါးကို ကောင်းမွန်မှန်ကန်စွာ သက်ဝင်ယုံကြည်ပြီး ငါးပါးသီလ ရှစ်ပါးသီလများကိုလည်း တက်နိုင်သလောက် စောင့်ထိန်းသွားမည်ဆိုလျှင် ကြောက်စရာကောင်းလှသော အပါယ်လေးပါးမှ လွတ်ကင်းပါလိမ့်မည်။

ထိုကဲ့သို့ ကျင့်သုံးနေထိုင်သွားမည်ဆိုလျှင် လူသားတိုင်း ကြောက်ရွံ့နေကြသော သေခြင်းတရားကိုလည်း ရဲရဲဝင့်ဝင့် ရင်ဆိုင်ရဲကာ နောင်ဘ၀မှာလည်း ကောင်းကျိုးချမ်းသာများ ဧကန်ခံစားရမည်ဖြစ်သောကြောင့် အပါးလေးပါးမှ ကင်းလွတ်စေတတ်သော သရဏဂုံသုံးပါးနှင့် ငါးပါးသီလတို့ကို နေ့စဉ်တတ်နိုင်သလောက် စောင့်ထိန်းကျင့်ကြံလိုက်နာ ဆောင်ရွက်ကြပါဟု ဆန္ဒပြုလိုက်ရပါပေသည်။