ဝဋ်ကြွေးကို ဘာ့ကြောင့်ဖြေဖျက်လို့ မရတာလဲ

အမေး။ ။ အင်္ဂုလိမာလဟာ လူပေါင်းထောင်ဂဏန်းအထိ သတ်လာခဲ့တဲ့ ပါဏာတိပါတကံကို ရဟန္တာဖြစ်တော့ သူ့ရဲ့ သီလ သမာဓိ ပညာက ထိုပါဏာတိပါတကံကို ချေဖျက်လိုက်တယ်လို့ ဖတ်ဖူးပါတယ်။ ဒါ့အပြင် ရောဟိဏီမင်းသမီးဟာ အတိတ်ကပြုခဲ့တဲ့ကံကြောင့် စွဲကပ်လာတဲ့ နူနာရောဂါကို အစ်ကိုတော်သူ အရှင်အနုရုဒ္ဓါက ခိုင်းတဲ့အတိုင်း ကုသိုလ်ပြုလုပ်တဲ့အတွက် ရောဟိဏီမင်းသမီး ဟာ နူနာရောဂါ ပျောက်သွားရတယ်လို့ ဖတ်ရပါတယ်ဘုရား။ တပည့်တော်သိချင်တာက ဘုရားလက်ထက်က ရဟန္တာတစ်ပါး လာဘ်လာဘချို့တဲ့စွာနဲ့ ပရိနိဗ္ဗာန်စံဝင်ခဲ့ရတယ်လို့ ဖတ်သိခဲ့ရပါတယ်။ အဲဒီရဟန်းရဲ့ အတိတ်က၀ဋ်ကြွေးကို ယခုနောက်ဆုံးဘ၀ ရဟန္တာဆိုတဲ့ သီလ သမာဓိ ပညာနဲ့ (အင်္ဂုလိမာလတို့လို) ဘာ့ကြောင့်များ မကယ်နိုင်တာပါလဲဘုရား။ သိချင်၍ အဖြေပေးတော်မူပါဘုရား။

မြကြာဖြူ
ဘန်ကောက်

အဖြေ။ ။ အင်္ဂုလိမာလ၊ ရောဟိဏီမင်းသမီး၊ လောသကတိဿထေရ်တို့ဟာ သူတို့ပြုခဲ့တဲ့ ကံများက အကုသိုလ်ကံချည်းဖြစ်ပါလျက် အင်္ဂုလိမာလနှင့်ရောဟိဏီမင်းသမီးကျတော့ သူတို့ရဲ့ သီလ သမာဓိ ပညာနဲ့ ချေဖျက်နိုင်ပြီး၊ လောသကတိဿထေရ်ကျတော့ ရဟန္တာဖြစ်သော်လည်း ဘာ့ကြောင့်များ မချေဖျက်နိုင်ရတာလဲလို့ မေးထားပါတယ်။ မေးသင့်တဲ့မေးခွန်းပါပဲ။ အင်္ဂုလိမာလနှင့် ရောဟိဏီ မင်းသမီးတို့ ပြစ်မှားခဲ့တဲ့အကြောင်းကို ပြန်ကြည့်ရင် သူတို့ပြစ်မှားတာက သာမာန်လူကို ပြစ်မှားတာဖြစ်တဲ့ အတွက် သူတို့ရရှိတဲ့ သီလ သမာဓိ ပညာက သူတို့ရဲ့ အကုသိုလ်အကျိုးကို ချေဖျက်နိုင်တယ်လို့ ယူဆရပါ့မယ်။

လောသကတိဿမထေရ်ကျတော့ အတိတ်ဘ၀တုံးက မနာလို ၀န်တိုဖြစ်ပြီး ရဟန္တာအရိယာပုဂ္ဂိုလ်ကြီး အပေါ် ပြစ်မှားခဲ့မိတဲ့အတွေက်ကြောင့် နောက်ဆုံးဘ၀ ရဟန္တာဖြစ်သော်လည်း လာဘ်လာဘရှားပါးခဲ့ရတယ်လို့ ယူဆမိပါကြောင်း ဖြေကြားလိုက်ရပါတယ်။

ဦးကောဝိဒ(မြိတ်) http://venkawwida.com မှ