လူဝင်စားဟာ ဘ၀အဆက်ဆက် တစ်ယောက်ထဲများလား

အမေး။ ။ အမေရိကန်နိုင်ငံက အသက်(၁၁)နှစ်အရွယ်ခလေးတစ်ယောက်ဟာ လွန်ခဲ့တဲ့နှစ်ပေါင်း (၁၂၅၀)လောက် ပျံလွန်တော်မူခဲ့တဲ့ ဗုဒ္ဓဘုရားဝင်စားတယ်လို့ပြောကာ ကျောင်းဆက်မတက်တော့ဘဲ အိမ်ကို ပြန်လာခဲ့တယ်လို့ သိရပါတယ်။ Bostonမှာမွေးတဲ့ Jigme Wangchukလို့ခေါ်တဲ့ခလေးဟာ အခုဆိုရင် အိန္ဒိယနိုင်ငံ အရှေ့ပိုင်းမှာရှိတဲ့ Darjeeling မြို့ရှိ ဗုဒ္ဓဘာသာဂိုဏ်းတစ်ခုမှာ ခေါင်းဆောင်အကြီးအကဲလုပ်ဖို့ ထွက်ခွာသွားပါပြီ။ သူ့ရဲ့ မိဘနှစ်ပါး ပြောကြားခဲ့တာကတော့ သူတို့ရဲ့သားဟာ ငယ်ငယ်ကတည်းက တခြားခလေးတွေနဲ့ မတူသလို စပြီးစကားပြောတတ်ချိန် (၂)နှစ်သားအရွယ်လောက်ကတည်းက သူ့ရဲ့ဘ၀ဟောင်းတွေကို စတင်ပြောခဲ့ပါတယ်။ ဒါတွေကို တပည့်တော် အင်တာနက်စာမျက်နှာတစ်ခုမှာ ဖတ်လိုက်ရပါတယ်ဘုရား၊ တပည့်တော်သိချင်တာက လူဝင်စားအကြောင်းနဲ့ ပတ်သက်ပြီး ဘုရားဟောနှင့်ညှိပြီး ဖြေကြားပေးစေလိုပါတယ်။

အောင်ကျော်နိုင်
ဆစ်ဒနီ၊ သြစတေးလျား

အဖြေ။ ။ ဗုဒ္ဓလူဝင်စားတယ်ဆိုတာ ဗုဒ္ဓ၀ါဒအရ လုံးဝမဖြစ်နိုင်ပါဘူး။ ဗုဒ္ဓဟာ အရဟတ္တမဂ်၊ အရဟတ္တဖိုလ်ကို မျက်မှောက်ပြုတော်မူပြီး ဖြစ်တဲ့အတွက် နောက်တဖန် ဘ၀အသစ် ပဋိသန္ဓေဆိုတာ မရှိတော့ပါဘူး။ ဒါကြောင့် ဗုဒ္ဓလူဝင်စားဟာ လုံးဝမဖြစ်နိုင်ပါဘူး။

လူဝင်စားဆိုတာ ဖြစ်ခဲ့တဲ့ အတိတ်ဘ၀များကို ပြန်လည်အမှတ်ရနိုင်သူပါ၊ မနေ့ကလုပ်ခဲ့ပြောခဲ့တဲ့ အကြောင်းအရာများကို ဒီနေ့ပြန် မှတ်မိနေသလိုမျိုးပါ။ ဒါကို ဘုရားရှင်က ဇာတိဿရဉာဏ်ရရှိသူများလို့ မိန့်တော်မူပါတယ်။

ဘုရားရှင်ပါရမီဖြည့်စဉ် တေမိမင်းသားဘ၀ဖြစ်စဉ်က တေမိမင်းဟာ မွေးကင်းစ လသားအရွယ်လောက်မှာ ဘုရင်ကြီးက ထီးဖြူအောက်မှာ မင်းသားလေးကို သိပ်ထားပါတယ်။ မင်းသား နိုးလာတဲ့အခါ ထီးဖြူကြီးကို မြင်လိုက်ရတယ်။ ဒီအခါမှာ မင်းသားဟာ အတိတ်ဘ၀ ဘုရင်ဖြစ်ခဲ့တာကို သတိရတယ်၊ တဆက်တည်း ဘုရင်ဖြစ်စဉ်မှာ ရာဇ၀တ်သားတွေကို အမျိုးမျိုး အမိန့်ချတာကို သွားမြင်တယ်။ ဘုရင်ဘ၀ကနေ ငရဲကျခံရေတာကို မြင်ပြန်တယ်။ ငရဲဘ၀ကနေ တာဝတိံသာနတ်ပြည်မှာ နတ်ဖြစ်ရတယ်။ အဲဒီကနေတဆင့် ယခု မင်းသားဘ၀ဖြစ်လာရတယ်။ ဒီအကြောင်းကို မင်းသားလေးဟာ မင်းဖြစ်ရမှာကို ကြောက်ရွံ့တဲ့အတွက် ဘ၀တစ်လျှောက်လုံး ဆွံ့အ ယောင်ဆောင်ခဲ့တယ်။

လူဝင်စားဆိုတဲ့ ဇာတိဿရဉာဏ်ရရှိတဲ့သူများဟာ ဘုန်းကံကြီးမားကြတဲ့သူများသာ ဖြစ်ပါတယ်။ ယခုခေတ်မှာလည်း အနည်းအကျဉ်း ရှိကြပါတယ်။ လူဝင်စားလို့ခေါ်တဲ့ အတိတ်ဘ၀ပြန်မြင်သူများ ဟာ သေခါနီးမှာ ရောဂါဝေဒနာ ပြင်းထန်စွာ မခံစားလိုက်ရဘဲ တွေဝေမှုနည်းပါးစွာနဲ့ ရုတ်တရက်ကွယ်လွန်ကာ လူဘ၀လာဖြစ်ကြရတဲ့ သူတွေများပါတယ်။

လူဝင်စားအတုများလည်း ရှိသေးတယ်။ မိခင်ဝမ်းတွင်း ပဋိသန္ဓေနေစဉ် မိခင်ကအပြင်မှာ လူတစ်ယောက်သေဆုံးတာကို စွဲစွဲလန်းလန်းဖြစ်ခဲ့ပါတယ်။ မွေးလာတဲ့ကလေးဟာ မိခင်စိတ်ဓါတ်များ ကူးစက်ကာ ကလေးစကားပြောတတ်ကာခါစ သူဟာ သေဆုံးသွားသူ ဖြစ်ကြောင်း ပြောပါတော့တယ်။ ဒါပေမဲ့ ထိုကလေးမျိုးဟာ နောင်ကြီးလာတဲ့အခါ မေ့လျော့သွားတတ်ပါတယ်။ ဒါက လူဝင်စားအတုဖြစ်ပါတယ်။ ဇာတိဿရဉာဏ်ရသူများကတော့ ငယ်ရွယ်စဉ်မှ အသက်ကြီးတဲ့အထိ အသေးစိတ် ပြောတတ်နေပါတယ်။

လူဝင်စားတာဟာ ဘ၀အဆက်ဆက်တစ်ယောက်ထဲလားဆိုတာကို ပြောပါအုံးမယ်။ လူဝင်စားတယ်ဆိုတာ အရပ်သုံးစကားပါ။ အချို့သူများက လူဝင်စားတာဟာ အရင်ဘ၀က ခန္ဓာကိုယ်ကြီးကို ထားခဲ့ပြီး ၀ိညာဉ်လေးက ဒီဘက်ခန္ဓာကိုယ်ထဲ ၀င်လာတယ်လို့ ယူဆကြဟန်ရှိပါတယ်။ ခန္ဓာကိုယ်ထဲမှာ အသက်ကောင်ခေါ်တဲ့ လိပ်ပြာကောင်လေးရှိတယ်။ အဲဒီအသက်ဆိုတဲ့ လိပ်ပြာလေးက ခန္ဓာအဟောင်းက စွန့်ခွာသွားတာကိုပဲ အသက်ထွက်သွားတယ်၊ အသက်ကောင်လေးထွက်သွားပြီး တစ်ခြားဘ၀အသစ်ခန္ဓာမှာ အသက်ကောင်လေး တစ်ဖန်ပြန်ဝင်လာတယ်လို့ မှတ်ထင်ကြတယ်။

အမှန်က သတ္တ၀ါတွေမှာ အသက်ကောင်၊ လိပ်ပြာကောင်၊ ၀ိညာဉ်ကောင်ဆိုတာတွေ မရှိပါဘူး။ သတ္တ၀ါတွေမှာ ရုပ်နာမ်သာရှိပါတယ်။ ဒီဘက်ဘ၀မှာ ရုပ်ရော နာမ်ရော ချူပ်ဆုံးသွားပီးမှ ဘ၀သစ်မှာ ရုပ်နာမ်အသစ်သွားဖြစ်တာပါ။ လူဝင်စားဆိုတာက ယခင်ဘ၀ကဟာ တွေပြန်မှတ်မိတာကို ပြောတာပါ။ ဒါဖြင့် လူဝင်စားဟာ ယခင်ဘ၀ကရော တစ်ယောက်ထဲမဟုတ်ဘူးလားဆိုတော့ မဟုတ်ပါဘူး။ ဒါပေမဲ့ အကြောင်းအကျိုးဆက်စပ်မှုတော့ရှိတယ်လို့ ပြောရပါမယ့်။

ဥပမာ-သရက်စေ့လေးတစ်ခုကို ပျိုးထောင်လိုက်တဲ့အခါ သရက်စေ့အသွင်ပျောက်ပြီး အပင်လေးတွေဖြစ်လာတယ်။ သရက်ပင်ကြီးလာတော့ သရက်သီးလေးတွေ သီးလာတယ်။ ဒါဖြင့် ပျိူးထောင်တဲ့အခါတုန်းက သရက်စေ့နဲ့ ယခုသီလာတဲ့ သရက်သီးရဲ့အစေ့က အတူတူလားဆိုတော့ မျိုးစေ့ကသန့်သန့် ယခုသီးလာတဲ့ သရက်စေ့က သန့်သန့်မို့ မတူပါဘူး။ ဒါပေမဲ့ သရက်မျိုးစေ့ကြောင့် ယခု အသီးသီးလာရတဲ့အတွက် ယခုသီးလာတဲ့သရက်သီးများဟာ ယခင်သရက်မျိုးစေ့နဲ့ အကြောင်းအကျိုး ဆက်နေတယ်။

နောက်ဥပမာတစ်ခု ပြောပြပါအုံးမယ်၊ လှိုဏ်ခေါင်းတစ်ခုထဲမှာ လူတစ်ယောက်က အားကုန် တစ်ချက်အော်လိုက်မယ်ဆိုပါစို့၊ အော်လိုက်တဲ့အသံကြောင့် ပဲ့တင်သံတွေဟာ ဆက်ကာ ဆက်ကာ အသံတွေ တစ်ခုပီးတစ်ခု ဆက်သွားပါတယ်။ ပထမအော်လိုက်တဲ့အသံဟာ ဒုတိယ တတိယ ဆက်ကာ ဆက်ကာထွက်တဲ့ ပဲ့တင်သံနဲ့ အတူတူလားဆိုတော့ တစ်ခုစီပါ။ မတူပါဘူး၊ ဒါပေမဲ့ ပထမအသံကြောင့် ဒုတိယ၊ တတိယအသံများ ဆက်ကာ ဆက်ကာ ဖြစ်ပေါ်လာတယ်၊ ပထမအသံမရှိရင် ဒုတိယအသံ မမြည်လာနိုင်သလို ဒုတိယအသံမရှိရင် တတိယအသံ မမြည်လာနိုင်ပါဘူး။ အသံ တစ်ခုနဲ့တစ်ခုဟာ မတူသော်လည်း တစ်ခုနဲ့တစ်ခု အကြောင်းအကျိုး ဆက်စပ်နေတယ်ဆိုတာ ငြင်းလို့ မရပါဘူး။

ဒီလိုပါပဲ ယခင်ဘ၀နဲ့ ယခုဘ၀ဟာ တူသလားဆိုတော့ မတူပါဘူး၊ ဘ၀နှစ်ခု မတူပေမဲ့ ယခင်ဘ၀ ကံအကြောင်းတရားကြောင့် ကံရဲ့အကျိုးတရားးအနေနဲ့ ဘ၀အသစ်လာဖြစ်ကြရတာပါ။ ဘ၀တစ်ခုနဲ့တစ်ခုဟာ တစ်ယောက်ထဲမဟုတ်ပေမဲ့ အကြောင်းအကျိုးဆက်စပ်နေတယ်ဆိုတဲ့ အကြောင်း ဖြေကြားပေးလိုက်ပါတယ်။

ဦးကောဝိဒ(မြိတ်) http://venkawwida.com/မှ